Izai 63
63
Vanzans lor Edom
1Kisann-la vinn depi Edom, depi Bokra, ar so linz rouz,
fier dan so zoli batman,
ki pe drese
dan so gran pwisans?
Momem sa, ki pe proklam lazistis,
ki ena pwisans pou sov zot.
2Kifer to linz rouz?
Kifer to finn abiy kouma seki kraz rezin dan preswar?
3Wi, mo finn travay dan preswar
e parmi bann pep, personn pa ti ar mwa.
Mo finn kraz zot dan mo koler.
Mo finn pil lor zot dan mo laraz.
Zot disan finn tas mo bann linz,
e finn sali tou mo bann zafer.
4Parski zour revans lamem, dan mo leker.
Lane finn arive, pou mo liber mo pep.
5Mo finn gete: pena personn pou ed mwa.
Mo ti rod led: pena personn pou ankouraz mwa.
Lerla mo prop lebra finn vinn sov mwa.
Mo laraz finn donn mwa kouraz.
6Mo finn kraz bann pep dan mo koler.
Dan mo laraz, mo finn soul zot
e mo finn fer zot disan fane lor later.
Memwar mizerikord Bondie
7Fidelite LESEGNER mo pou rapel.
Louanz pou LESEGNER,
pou tou seki LESEGNER finn akonpli pou nou,
pou so gran bonte pou lakaz Izrael,
pou tou seki li finn akonpli dan so mizerikord,
pou labondans so fidelite.
8Parski li dir: “Wi, zotmem mo pep,
bann garson ki pa koz manti.”
Lerla, li finn vinn zot sover.
9Dan tou zot langwas,
li pa finn anvoy okenn mesaze pou sov zot.
Dan so lamour e so konpasion,
limem ki finn raset zot, e ki finn sarye zot,
e ki finn port zot, tou lezour dan lepase.
10Me zot, zot finn revolte,
e zot finn fer so lespri sin sagrin.
Alor li finn sanze, li finn vinn enn lennmi pou zot.
Limem ki finn konbat kont zot.
11Li finn rapel letan lontan,
Moiz so serviter.
Kot li ete, seki ti sov zot depi lamer,
avek bann berze so troupo?
Kot li ete, seki ti met dan zot
so lespri sin;
12seki ti akonpagn lame drwat
Moiz ar so lebra pwisan?
Kisann-la ti fann lamer divan zot,
pou li fer so nom vinn renome pou touzour?
13Ler li ti fer zot travers fon lamer,
kouma enn souval dan dezer,
zot pa ti tonbe.
14Zot ti kouma enn troupo ki pe desann dan vale.
Lespri LESEGNER ti pe kondir zot, pou donn zot repo.
Koumsamem to finn kondir to pep,
e sanktifie to nom.
Lapriyer penitans
15Get depi lesiel, gete.
Depi to zoli lakaz sin.
Kot to pasion ek to lafors?
Kot to konpasion?
Pa ignor nou.
16Parski tomem nou papa,
parski Abraam pa finn konn nou,
e Izrael pa finn rekonet nou,
twa “LESEGNER nou papa ki liber nou”,
samem to nom depi touzour.
17Kifer SEGNER, to les nou elwagne ar to bann sime;
to rann nou leker dir, lwin ar to lakrint?
Revini akoz to bann serviter,
akoz to pep, to leritaz.
18Pou tigit letan, to pep sin finn profite.
Nou bann lennmi finn kraz to Tanp.
19Depi bien lontan, nou finn vinn enn bann ki to nepli gouverne, e ki nepli port to nom.
Ti pou bon si to ti desir lesiel, to desann; divan twa, montagn ti pou tranble.
Kreol Morisien OT Portions © Bible Society of Mauritius, 2020.