Izai 45
45
Siris, instriman Bondie
1Ala seki LESEGNER pe dir so mesi, Siris.
Mo finn pran to lame drwat
pou fer bann pei ploye divan twa,
e bann lerwa perdi zot pouvwar.
Pou ouver divan twa
bann laport lavil ki ti ferme.
2Momem ki pou mars divan twa.
Mo pou fer montagn vinn plat.
Mo pou kas bann laport an-bronz,
mo pou kas bann serir feray.
3Mo pou donn twa bann trezor ki ti dan marenwar,
bann rezerv ki ti kasiet,
pou ki to kone ki momem LESEGNER,
ki apel twa par to nom, Bondie Izrael.
4Akoz mo serviter Zakob,
e Izrael ki mo finn swazir,
mo finn apel twa par to nom.
Mo donn twa enn nom; me twa, to napa konn mwa.
5Momem LESEGNER, pena personn kouma mwa.
Apar mwa, pena lezot Bondie.
Mo pe may twa; me twa, to napa konn mwa.
6Asterla, depi les ziska lwes, tou dimoun pou kone
ki pena enn lot kouma mwa:
momem LESEGNER, pena lot.
7Mo fasonn lalimier. Mo kree marenwar.
Mo fer lape. Mo kree maler.
Momem LESEGNER ki fer tousala.
8Lesiel, fer laroze tonbe.
Ki bann niaz devers lazistis.
Ki later ouver e les delivrans anfler.
Ki anmemtan li fer lazistis zerme.
Momem LESEGNER ki finn kre tousala.
9Ayo! Maler pou seki rezinbe ar so Kreater.
Li enn sinp vaz-later parmi lezot!
Eski larzil dir so potie: “Ki to pe fer?”
Eski travay ki to finn fer pou dir twa: “To pena lame!”
10Maler pou seki dir so papa: “Ki kalite zanfan to finn fer?”
E maler pou seki dir enn mama: “Ki kalite zanfan to finn donn nesans?”
11Ala seki LESEGNER pe dir,
Bondie Izrael, so kreater:
“Zot ki pe poz mwa kestion lor mo bann zanfan.
Zot pe donn mwa lord lor louvraz ki mo lame finn fer.
12Momem ki finn fer later
e ki finn kre dimoun pou res lor later.
Momem ki, ar mo lame finn deroul lesiel,
e ki finn donn lord tou bann zetwal.
13Momem ki finn fer Siris leve dan lazistis,
e ki pou met drwat tou so bann larout.
Limem ki pou rekonstrir mo lavil,
e pou fer mo bann deporte revini,
san okenn lapey,
samem LESEGNER Toupwisan pe dir.
14Ala seki LESEGNER pe dir:
“Rises Lezip ek komers Kous, bann Sebait,
sa bann dimoun ki bien ot la, twa ki pou erite.
Zot pou vinn to bann esklav.
Zot pou mars deryer twa,
zot pou ale ar lasenn.
Zot pou prostern divan twa.
Zot pou priye twa: “Pena lot Bondie, apar zis seki kot twa-la!
Pena lot, pena lot Bondie”.
15Vremem twa to enn Bondie ranpli ar mister,
Bondie Izrael nou sover.
16Zot, bann fabrikan idol, zot mars dan laont,
zot tou dan imiliasion.
17LESEGNER pou sov Izrael.
Pou sov li pou touzour.
Zot pou nepli gagn onte. Nepli pou ena okenn laont ek dezoner
lor zot ankor.
18Parski ala LESEGNER pe dir, kreater lesiel:
“Limem Bondie ki finn fasonn later,
ki finn form li e ki finn rann li solid.
Li pa finn kree li vid,
li finn fasonn li pou ki li abite.
Momem LESEGNER, pena personn kouma mwa.
19Mo pa finn kasiet an finfon enn pei
pou mo koze;
mo pa finn dir desandan Zakob:
“Rod mwa dan vid!”
Momem LESEGNER ki proklam lazistis,
ki anons bann kiksoz vre.
Bann idol pa kapav sov Babilonn
20Rasanble zot, vini!
Koste zot tou ansam, bann ki ankor vivan dan bann pep!
Zot bann san-konpran,
bann ki transport zot bann idol dibwa,
ki priy enn bondie
ki pa kapav sov zot.
21Rakonte, explik zot ka.
Ansam, fer zot reynion.
Kisannla ti proklam sa dan lepase.
Kisannla ti anons sa, sa lepok la?
Pa momem, LESEGNER?
Pena lezot Bondie apart mwa.
Enn Bondie ki zis e ki kapav sov zot,
pena lot apart mwa.
22Zot, ki lot kote later, vire get mwa
e zot pou sove,
parski momem Bondie, pena lot apart mwa.
23Mo fer serman lor momem,
seki sort dan mo labous, samem lazistis.
Enn parol ki napa pou sanze:
Wi, divan mwa tou zenou pou ploye,
tou lalang pou fer serman lor mwa.
24Zot pou dir: “Dan LESEGNER tousel
ena lazistis ek lafors.”
Tou bann ki ti sofe kont li
pou koste kot li, ranpli avek laont.
25Dan LESEGNER bann desandan Izrael
pou trouv laviktwar e zot pou loue mwa LESEGNER!
Kreol Morisien OT Portions © Bible Society of Mauritius, 2020.