Izai 26
26
Zida sant laviktwar
1Sa zour-la pou sant sa kantik la dan pei Zida:
“Nou ena enn lavil bien proteze,
LESEGNER finn met miray ek ranpar
pou protez nou.
2Ouver laport:
les lepep ki fidel rantre,
pei ki viv lazistis.
3Seki tini ferm, to garanti li lape,
parski li finn met so konfians dan twa.
4Fer konfians LESEGNER pou touzour
parski LESEGNER enn ros solid pou leternite.
5Limem ki finn ranvers
bann ki ti res lao,
li finn abes lavil ki ti dan oter,
li finn desann li ziska later,
e finn fer li manz lapousier.
6Lavil-la pou vinn enn marspie,
lipie bann pov,
lipie bann feb pou mars lor li.
7Sime-la drwat pou seki fer lazistis.
To dres enn larout bien drwat pou seki fer lazistis.
8Vremem SEGNER, nou pe esper twa
lor sime ki to finn komann nou pou pran.
Mo nam pe dezir twa, pe apel twa,
pe kriye to nom.
9Dan lanwit, mo nam pe gagn swaf to prezans.
Mo lespri, mo leker, pe rod twa.
Kan to pronons to zizman dan sa lemond-la,
bann abitan later aprann lazistis.
10Me si nou gagn pitie pou bann move dimoun,
zame zot pa pou aprann seki zis.
Zot pratik lemal, mem dan pei kot sipoze ena lazistis.
Zot refiz rekonet grander LESEGNER.
11SEGNER, to lame finn leve,
e zot napa trouve!
Les zot trouv laflam ki to ena pou to pep, zot ava gagn onte.
Les dife ki to finn prepare pou to bann lennmi bril zot.
12SEGNER, to pou donn nou lape.
Wi, tomem ki finn permet nou fer tou seki nou finn fer.
13SEGNER nou Bondie,
bann lezot sef finn dominn nou;
me zis to nom tousel, nou rekonet.
14Bann mor napa pou reviv,
lonbraz napa pou leve,
parski to finn pini zot, to finn detrir zot,
to finn fer zot disparet dan memwar bann dimoun.
15To finn fer nou pei grandi, SEGNER.
Wi nou pei finn grandi, e to finn gagn laglwar.
To finn elarzi frontier nou pei.
16SEGNER, dan zot maler, zot finn rod twa.
Zot finn priye twa
kan to pinision ti lor zot.
17Nou ti divan twa, SEGNER,
kouma enn madam ansint
ki pe soufer e ki pe kriye kan li bizin akouse.
18Nou osi nou sipoze donn lavi. Nou finn soufer.
Me kan gete koumadir nou finn prodir zis divan.
Nou pa finn amenn enn delivrans lor pei,
pena okenn nouvo abitan lor later.
19To bann mor pou reviv, zot kadav pou resisite.
Leve, sante, zot ki res dan lapousier,
parski to laroze enn laroze lalimier,
e later pou redonn lavi bann mor.
20Ale mo pep, rant kot twa.
Ferm to laport;
kasiet ankor inpe letan,
ziska koler LESEGNER pase.
21Gete! Ala LESEGNER pe sorti dan so plas
pou li pini pese bann abitan later.
Later pou montre disan ki finn koule lor li.
Li pou aret kasiet bann viktim ki finn mor.
Kreol Morisien OT Portions © Bible Society of Mauritius, 2020.