Sakariạ 2
2
Jokha baberante mitʼṭen hoṛ
1-2Ona tayom iń doń beṅgetʼ rakapʼketʼ khan jokha baber sapʼakatʼ mitʼ hoṛiń ńelkedea. Iń do uniń kulikedea, “Am do okatem calakʼkana?”
Uni doe metadińạ, “Jerusalem tinạkʼ osara ar tinạkʼ jeleńa ona jokha lạgitʼ iń calakʼkana.”
3Okoeṭakʼ serma goḍet do iń sãoteye galmaraokan tahẽkan uni doe calakʼkan tahẽkana, ar un jokhecʼ armitʼṭen serma goḍet do uni sãote ńapamokʼ lạgitʼe hecʼena. 4Uni doe menkeda, “Am do ńir senkate uni juạn koṛa metaeme, ‘Jerusalemre manwa ar janwar doko ḍher akante onare jãhãn pạcri do baṅ tahena. 5Probhu Isore meneda, uni acʼtetʼge ona beṛhaete seṅgel reakʼ pạcriye hoyokʼa ar uni do acʼakʼ ṭhonokte onḍeye tahena.’ ”
Disạmte ruạṛokʼ reakʼ hoho
6Probhu Isore meneda, “Ańjompe ar luturakʼtińpe. Iń do beṛhaete apeń sạṅgińletʼpea, menkhan ńitokʼ do utạr disạm khon ńir paskaokate hijukʼpe. 7E Sionren hoṛko, ape okoe do Babelrepe girobasokʼkan, ape do ńir paskaokʼpe ar hijukʼpe.”
8Phạdkoren Probhu Isor do acʼakʼ ṭhonok sodortae lạgitʼ onko jạtrenko ṭhene kol akadińạ one okoe do aboko luṭ akatʼbon. Uni doe meneda, “Jãhãege apeye joṭetʼpe uni do ińakʼ mẽtʼ reakʼ monigeye joṭeda. 9Iń do onko upạrte khạṭige ińakʼ tiyiń tultińạ, onate onkoren gutiko do onkoko luṭkoa.” Ar tinre ona hoyokʼa unrepe bujhạu daṛeakʼa, phạdkoren Probhu Isor do ińgeye kol akadińạ.
10Probhu Isore meneda, “E Sion-kuṛi, rạskạte sereńme ar hulạsokʼme, ente ińiń hijukʼkana, ar iń do ape talareń girobasokʼa. 11Enhilokʼ jạt jạtrenko do iń sãoteko midokʼa ar ińren hoṛko hoyokʼa. Ar iń do ape talareń girobasokʼa.” Ar tinre ona hoyokʼa unrepe baḍae daṛeakʼa, phạdkoren Probhu Isor do ape ṭhen ińe kol akadińạ. 12Sonot disạmre uniyakʼ sompotti lekate Probhu Isor do Jihudạ disạme ạidạrijoṅa ar Jerusalem do arhõe bachaojoṅa.
13E sanam manwako, ape do Probhu Isor samaṅre hape akan tahenpe, ente uni do bicạr lạgitʼ acʼakʼ sonot ṭhạ̃i khone oḍok hijukʼkana.
Santali Bible © Bangladesh Bible Society, 2021.