Kạhtukko 1
1
Kạhtukko reakʼ dam
1 #
1 Raj 4.32
Dạudren hopon Israelren raj Solomonakʼ dhorom sopolha.
2Noako ol hoyakana jemon hoṛko do bhage bud ar cecetʼakʼko ńam,
jemon onkoakʼ bud bicạr baḍhaokʼtako,
3ar jemon eṭakʼko sãote hudiskateko calakʼ,
jemon onko do jotoko tulucʼ lek leka, hok ar dhorom salakʼko beohar,
4jemon lelha hoṛ do budanko hoyokʼ
ar juạnko do bud ar ạkilko ńam,
5Ạkilan hoṛ do noa sopolhako ańjomma arko cetʼjoṅ ma.
Ar budanko do ańjomkate calakʼ horreko gạkhuṛokʼma.
6Jemon hoṛko do phen reakʼ kathako ar khạndri reakʼ kathako
ar ạkilankoakʼ kathako ar kudumko bujhạu daṛeakʼ.
7 #
Job 28.28; Ser 111.10; Kạh 9.10 Probhu Isor botorae do ạkil reakʼ etohopʼ kana,
menkhan lelha hoṛ do ạkil ar sikhạunako nihạ̃tetʼ kana.
Juạnko lạgitʼ sopolha
8E bạbu, ạpumakʼ solha baṛe ańjomtaeme;
ar eṅgamakʼ cecetʼakʼko do alom phesṛao giḍikakʼa.
9Onako do amakʼ bohokʼ lạgitʼ ṭhosok mukuṭ
ar hoṭokʼ reakʼ do mala kana.
10E gidrạtiń, kạkại hoṛ bạṛicʼ horteko idilem khan
alogem rebenokʼa.
11Jãhãegeye metam, “Dela ale sãote hijukʼme,
ar khũn lạgitʼ dela tãṛãkʼ akae bon tahenma,
ar miridos hoṛ sabe lạgitʼ dela bon coko hataṛokʼma.
12Onko do jiwetʼ hoṛmowante
cetʼleka patal purite, metatʼme ona khạndṛuṅteko pheḍokʼkan,
onkage dela, abo do jiwetʼte
onko bon utʼgotʼkakoma;
13enḍekhan damanakʼ jinisko bon ńamjoṅa,
ar luṭakʼ jiniskote aboakʼ oṛakʼ duạr bon perejtabona.
14Amakʼ bhạg do ale sãotege dohoyme,
ar aboakʼ ṭaka reakʼ thạilạkʼ do mitʼṭecʼge tahenma.”
15E bạbu, onko tulucʼ do alom calakʼa,
ar onko khon do sahaṛ akae tahenme;
16ente onkoakʼ jaṅga do kại secʼge ńir calakʼ kana,
ar mãyãm joro ocoy lạgitʼko thare marekʼ kana.
17Hoṛko mena, “Ńeńelkan cẽṛẽ samaṅre
pạsi oḍao do nahakgea.”
18Noko hoṛ do akotege khũnokʼ lạgitʼko tãṛãgokʼ kana,
ar ḍhao maraokʼ lạgitʼ apnargeko oko tahenkana.
19Bạṛicʼ upạite jãhãnakʼ lab lạgitʼ okoeko dạdạrkan
onko sanamkoakʼ dosa do onkage hoyokʼtakoa;
ar okako lab onate onkoakʼ jion do nosṭokʼtakoa.
Ạkil reakʼ hoho
20 #
Kạh 8.1-3
Ạkil do hor horte ãṭ aṛanteye hohoyeda,
ar bajarkore aṛaṅe ańjom ocoyeda.
21Uni do ãṭ aṛaṅte rão rão kulhikore dobạṭiạkoreye hohoyeda,
ar nagraha reakʼ phaṭok duạrte bolokʼ jokhecʼe meneda,
22“E lelha hoṛko, ape do ar tinạkʼ din apeakʼ
lelhatetʼpe dulạṛa?
landa dhudhutʼko do ar tinạkʼ din onare
rạskạko ńama?
Ar bebujko hõ ar tinạkʼ din ạkilko kurudakʼa?
23Ińakʼ ḍanṭaope luturakʼ khan,
ińren Jiu do apereń dulkea,
ar ińakʼ mon reakʼ kathań baḍae ocokepea.
24Apeń hohowatʼpere ape do bape hetawatʼtińạ,
ar tiyiń ạwilletʼre okoe hõ bape moneyada.
25Ape do ińakʼ hukumkoge bape hetawatʼa,
doskoń udukʼatʼpere hõ bape aṅgocleda,
26Unre apeakʼ maraokʼ ńelte iń doń landaya,
ar muhinrepe paṛaolenre apeakʼ tamasań ńela.
27Muhin do birbão leka apere hecʼlenre,
ar hoedakʼ lekae oṭaṅ idilepere,
gạr ar dukrepe unumlenre,
unre iń do tamasań ńela.
28“Unre bebujkoko hohoạńạ menkhan bạń moneyakoa;
ińko ńam baṛayińạ menkhan bako ńam daṛeạńạ.
29Onko do ạkilko kurud akawada
ar Probhu Isor botorae hõ bako khojleda.
30Ona iạte onko do ińakʼ solha hõ bako ataṅleda,
samka sạṭikʼ lạgitʼ okań menletʼ ona do jaṅgateko lebetʼ gańjaokeda;
31Akoakʼ kạmi reakʼ kuṛại doko ńamgea,
ar apnarakʼ sopolha reakʼ jotege lacʼko perejtakoa.
32Lelha hoṛ do muhinteko calakʼge onkoakʼ gujukʼ reakʼ karon do hoyokʼa,
bebujko do akoakʼ nicindokʼgeye ḍahao maraokoa;
33Menkhan okoe ińakʼ kathako ańjom onko do khạtirjomako girobasokʼa;
onko do sulukteko tahena, ar bạṛicʼakʼ do bako botorakʼa.”
Santali Bible © Bangladesh Bible Society, 2021.