Numeri 9
9
Bańcaokʼ porob
1 #
Exo 12.1-13
Israelko Misor disạm khonko oḍok hecʼen dosar bochor reakʼ pạhil candore Probhu Isor do Sinại reakʼ hahaṅkarre Moseye galmaraoadea, 2“Israelko jemon niṭ akatʼ oktere bańcaokʼ porobko porobokʼ. 3Onko do niṭ akatʼ oktere, metakʼme niạ cando reakʼ gelponakʼ dinre siń cando hạsurokʼ tayom sanamakʼ niạm leka niạ porobko palonma.”
4Niạ katha ańjomkate Mose do Israel hoponko bańcaokʼ porobokʼ lạgitʼe metatʼkoa. 5Onate bochor reakʼ pạhil cando reakʼ gelponakʼ dinre siń candoe hạsuren tayom onko do sinại hahaṅkarreko porobena. Ar Probhu Isor do Mose okalekae hukumade tahẽkan onkage Israelko do jotowakʼko kạmikeda.
6Ona jokhecʼ onko modren thoṛa hoṛ do mitʼṭecʼ mạ̃ṛĩko joṭetʼletʼte ar besaphako tahẽkante enhilokʼ bańcaokʼ porob bako palon daṛeada. Onate onko do enhilokʼge Mose ar Aron ṭhenko calaoena. 7Onko do Moseko metadea, “Ale do mitʼṭecʼ mạ̃ṛĩle joṭetʼletʼte besaphare menakʼlea. Onate cetʼ Israelko sãote niṭ akan oktere Probhu Isor ńutumte samaṅokʼakʼ bale samaṅ daṛeakʼa?”
8Moseye roṛ ruạṛatʼkoa, “Probhu Isorakʼ hukum ạuripe baḍae hạbicʼ tạṅgi hataṛpe.”
9Unre Probhu Isor do Moseye galmaraoadea, 10“Israelkom metakoa, onko se onko bõsko modren jãhãege mạ̃ṛĩye joṭetʼakatʼ iạte besaphage menae khan se sạṅgiń reakʼ daṛan horreko tahẽkante bako porob daṛeakatʼ onko hõ Probhu Isor ńutumte bańcaokʼ porobko porob daṛeakʼa. 11Onko do dosar cando reakʼ gelponakʼ dinre siń cando hạsurokʼ tayom noa porobko porobokʼa. Ar bin khạmiyanakʼ piṭhạ ar haṛhatʼ aṛakʼ sãote bańcaokʼ porob reakʼ jelko joma. 12#Exo 12.46; Jhn 19.36Menkhan setakʼ hạbicʼ do cetʼge sarecʼ dohokakʼ baṅ hoyokʼa se uniyakʼ jãhãn jaṅko hõ baṅ rạpudtae hoyokʼa. Bańcaokʼ porob palon jokhecʼ sanam niạmko manao hoyokʼa. 13Menkhan besapha hoṛe baṅkan se daṛan horren hoṛ hõe baṅkan ar bańcaokʼ porob bae manao, enḍekhan uni do niṭ akatʼ oktere Probhu Isor ńutumte bae samaṅletʼte acʼakʼ jạtrenko khone marao ocokʼa. Uni do acʼakʼ kại reakʼ kuṛạiye ńama.
14“Israelko talareko girobasokʼ kan eṭakʼ jạtren jãhãege Probhu Isor ńutumte bańcaokʼ porobe porobokʼ, enḍekhan uni do porob reakʼ niạm lekate porobokʼ hoyokʼtaea. Israel ar eṭakʼ jạtren sanamkoge niạ mitʼ niạmge manao hoyokʼtakoa.”
Sekʼwa tạmbu cetanre rimil
(Exodus 40.34-38)
15Oka hilokʼ sekʼwa tạmbu, metakʼme goha tạmbu umul hoyen hilokʼge ona do Probhu Isorakʼ rimilte danaṅ esetʼena. Ar ạyupʼ khon setakʼ hạbicʼ sekʼwa tạmbu cetanre ona rimil do seṅgel muṭhạn leka ńelena. 16Ona tayom khon onkage hoyokʼ ehopʼena. Ar sekʼwa tạmbu do ona rimilte danaṅge tahẽyena ar ńindạ do seṅgel muṭhạn leka ńelokʼkan tahẽkana. 17Ar sekʼwa tạmbu cetan khon tinre rimil ocogokʼkan tahẽkana unre Israelko do onḍe khonko uṭhạukʼkan tahẽkana. Menkhan okare ona rimil teṅgokʼkan tahẽkan onḍege onko doko ḍerakʼkan tahẽkana. 18Onko do Probhu Isorakʼ hukum lekageko mohnḍakʼkan tahẽkana ar Probhu Isorakʼ hukum lekageko ḍerakʼkan tahẽkana. Ar sekʼwa tạmbu cetan khon rimil ạuri ocogokʼ hạbicʼ Israelko do onḍeko tahenkan tahẽkana. 19Sekʼwa tạmbu cetanre rimil tinre ḍher din tahenkan tahẽkana unre Israelko do Probhu Isorakʼko bataoetʼ tahẽkana ar bako uṭhạukʼkan tahẽkana. 20Oka oka do sekʼwa tạmbu cetanre rimil thoṛa din tahenkan tahẽkana. Ar Israelko do Probhu Isorakʼ hukum lekage ḍerareko tahenkan tahẽkana ar uniyakʼ hukum lekageko uṭhạukʼkan tahẽkana. 21Oka oka do ạyupʼ khon setakʼ hạbicʼ rimil tahenkan tahẽkana. Ar setakʼ bela tinre rimil ocogokʼkan tahẽkana unre onko do arhõko uṭhạukʼkan tahẽkana. Baṅ do sińkan ar baṅ do ńindạkan onko do rimil ocokʼlen khangeko mohnḍakʼkan tahẽkana. 22Bar din hoyokʼ se mitʼ cando hoyokʼ se ona khon ḍher din hoyokʼ, tinạkʼ din rimil sekʼwa tạmbu cetanre tahenkan tahẽkan unạkʼ dinge Israelko do ḍerareko tahenkan tahẽkana. Menkhan rimil ocokʼlen khan onko do arhõko mohnḍakʼkan tahẽkana. 23Probhu Isorakʼ hukumtege onko doko ḍerakʼkan tahẽkana ar Probhu Isorakʼ hukumtegeko mohnḍakʼkan tahẽkana. Mose hotete emakʼ hukum lekage onko do Probhu Isorakʼ hukumko dohoyetʼ tahẽkana.
Santali Bible © Bangladesh Bible Society, 2021.