Numeri 4
4
Kohat bõsren Liwikoakʼ kạmi
1Probhu Isor do Mose ar Arone galmaraoatʼkinạ, 2“Liwiko talare Kohat bõsrenko khon, gusṭi gusṭi ar gharońj gharońj lekate Kohatren hoponben lekhakoa. 3Kohatren pegel khon mõṛẽgel bochor umerren okoeko herel hoṛ do ńapamokʼ tạmbu reakʼko kạmi daṛeakʼ eken onko ben lekhakoa.
4“Ńapamokʼ tạmbure Kohatrenkoakʼ kạmi do hoyokʼa sonot utạrakʼ jinisko ńel todarot. 5Ḍera uṭhạukʼre Aron ar uniren hoponko do sekʼwa tạmbu bhitrite bolokate goha sinduk reakʼ dapalakʼ orwal raṛa pheḍkate onate sindukko poṭoma. 6Ar ona tayom do takhas (susuk) hartateko dapalkakʼa ar ona cetanre mitʼṭecʼ nil roṅakʼ kicricʼko aṭetʼakʼa, ar goha sinduk reakʼ ḍaṅkinko hurạṛkakʼa. 7Onko do samaṅakʼ piṭhạ dohowakʼ ṭebil cetanre mitʼṭecʼ nil roṅakʼ kicricʼko aṭetʼakʼa ar ona cetanre thạriko, bạṭiko, kạ̃ṛchuko ar cokʼḍor loṭakoko dohoya. Ar okaṭakʼ piṭhạ jao okte ṭebilre tahen ona do ṭebil cetanrege tahena. 8Noako cetanre mitʼṭecʼ arakʼ roṅakʼ kicricʼ aṭetʼkate takhas (susuk) hartateko poṭomkakʼa ar ṭebil reakʼ ḍaṅkin do ṭhik jaegareko gutu dohokakʼa. 9Marsal emokʼ lạgitʼ diuhe dohowakʼ ar ona reakʼ joto diuheko ar sultạ saphae reakʼ cimṭạko ar ona reakʼ ḍhạknicʼko ar sunum dohoy lạgitʼ bhajanko do mitʼṭecʼ nil roṅakʼ kicricʼteko poṭomkakʼa. 10Ar ona tayom asbabko sudhạ diuhe dohowakʼ do takhas (susuk) hartate bedhaokate gokʼ idiy reakʼ tokta cetanreko dohoya. 11Sona reakʼ pinḍ cetanre mitʼṭecʼ nil roṅakʼ kicricʼ aṭetʼkate onko do takhas (susuk) hartateko poṭomkakʼa ar pinḍ reakʼ ḍaṅkin hõ ṭhik jaegare hurạṛkakʼa. 12Sekʼwa tạmbu reakʼ kạmire beoharokʼakʼ sanam jinisko do nil roṅakʼ kicricʼte bedhaokate takhas (susuk) reakʼ hartate poṭomkate gokʼ idiy reakʼ tokta cetanreko dohoya. 13Rupạ pinḍ reakʼ sanam torocʼko giḍikate onko do mitʼṭecʼ beguni roṅakʼ kicricʼ ona cetanreko aṭetʼakʼa. 14Ona tayom onko do ona cetanre sekʼwa kạmi reakʼ sanam thạriko, bạṭiko, kạ̃ṛchuko, ḍhạknicʼko, jel rakapʼ kaṭa kạ̃ṛchũko ar mãyãm irciyakʼ bạṭiko ar pinḍ reakʼ sanam asbabko dohoya. Onko do ona cetanre takhas (susuk) hartako aṭetʼakʼa ar ona reakʼ ḍaṅkin do ṭhik jaegareko gutukakʼa.
15“Aron ar uniren hoponko tinre noa sonot jinis ar sonot ṭhạ̃i reakʼ asbab poṭom reakʼ kạmiko sạta ar hoṛko hõ ḍera samṭaokate uṭhạukʼ lạgitʼko sapṛaokʼa unre Kohatren hoponko do noako gokʼ idi lạgitʼko hijukʼa. Menkhan onko do sonotakʼ okaṭakʼ jinisge bako joṭetʼ daṛeakʼa. Arko joṭetʼ lekhan onko doko gujukʼa. Ńapamokʼ tạmbure okako jinis tahen ona do Kohatren hoponkoko gokʼ idiya. 16Diuhe reakʼ sunum, jut so mosolako reakʼ dhup, jomakʼ samaṅokʼakʼ ar ojokʼ bahalokʼ reakʼ sunum noako reakʼ bhar do naeke Aronren hopon Eliaser cetanre tahena. Goṭa sekʼwa tạmbu ar ona reakʼ sanamakʼ, metakʼme sonot ṭhạ̃i ar ona reakʼ asbabko ńel todarot reakʼ bhar do Eliaser cetanrege tahena.”
17Inạ tayom Probhu Isor do Mose ar Arone galmaroatʼkinạ, 18“Liwiko tala khon Kohat gusṭiren hoṛko jemon aloko maraokʼ. 19Ar sonot utạrakʼ jinis ṭhen senkate aloko gujukʼ bickom, jiwetʼko tahen ona lạgitʼ Aron ar uniren hoponko do sonot tạmbure bolokate apan ạpin kạmi ar apan ạpin bojhako hạṭińakoa. 20Menkhan sonotakʼ sanamakʼ jinisko ńel todarot lạgitʼ Kohatrenko do bhitrite bako bolo daṛeakʼa, mitʼ ghạṛi lạgitʼhõ baṅ. Arko bololen khan onko doko gujukʼa.”
Gerson bõsren Liwikoakʼ kạmi
21Probhu Isor do Moseye metadea, 22“Gusṭi gusṭi ar gharońj gharońj lekate am do Gerson hoponkom lekhakoa. 23Pegel khon mõṛẽgel bochor umerren Gerson bõsren okoe do ńapamokʼ tạmbu reakʼko kạmi daṛeakʼ eken onkogem lekhakoa.
24-25“Ńapamokʼ tạmbure kạmi lạgitʼ ar bojhako gokʼ idire Gerson bõsrenkoakʼ dạyik do hoyokʼkana sekʼwa tạmbu reakʼ mĩhĩ musnạ kicricʼ, ar ona cetanre aṭetʼakʼ merom upʼ reakʼ dapalakʼ, ar ona cetanre bheḍa harta reakʼ dapalakʼ ar takhas (susuk) harta reakʼ dapalakʼ ar ńapamokʼ tạmbure bolokʼ duạr reakʼ orwalko gokʼ idiya. 26Ona chaḍa sekʼwa tạmbu ar pinḍ beṛhaeteakʼ bakher raca reakʼ orwal, ar bakher racate bolokʼ duạr reakʼ orwalko, sekʼwa tạmbu reakʼ barahiko ar noako kạmire jạruṛokʼakʼ sanam jinisko gokʼ idiya. Ar nonkanakʼ tinạkʼ kạmi menakʼ ona jotoge Gersonren hoponko kạmi hoyokʼtakoa. 27Bojha gokʼ bhạriạ kạmi se ar eṭakʼ jãhãn kạmige, onko do jotoge Aron ar uniren hoponkoakʼ hukum leka kạmi hoyokʼtakoa. Ar okako jinis gokʼ bhạriạ lagao ako ona do onkope jimạwakoa. 28Ńapamokʼ tạmbure Gerson khũṭrenkoakʼ kạmi do noako kangea. Ar onkoakʼ kạmi ńel todarot reakʼ bhar do naeke Aronren hopon Ithamar cetanre tahena.
Merari bõsren Liwikoakʼ kạmi
29“Gusṭi gusṭi ar gharońj gharońj lekate aben do Merari hoponko ben lekhakoa. 30Pegel khon mõṛẽgel bochor umerren Merari hoponko okoe do ńapamokʼ tạmbu reakʼko kạmi daṛeakʼ eken onko ben lekhakoa. 31Ńapamokʼ tạmbu reakʼ kạmire Merarikoakʼ dạyik do hoyokʼ kana sekʼwa tạmbu reakʼ joto paṭako, hurạṛkakʼ ḍaṅkin, khunṭiko ar ganḍoko gokʼ idiy. 32Ona chaḍa, beṛhaetaeakʼ bakher raca reakʼ sanam ganḍoko ar khunṭiko, tạmbu reakʼ gońjko, bakher raca reakʼ orwal reakʼ barahiko ar onako reakʼ sanam asbabko ar onako kạmire jạruṛokʼakʼ sanam jinisko gokʼ idi hoyokʼtakoa. Ar okoe okaṭakʼko goga onape ṭhik akoa. 33Noa do hoyokʼ kana Merari bõsrenkoakʼ ńapamokʼ tạmbure kạmi reakʼ dạyik. Ar onkoakʼ kạmiko ńel todarot lạgitʼ bhar do naeke Aronren hopon Ithamar cetanre tahena.”
Liwikoakʼ lekha
34Gusṭi gusṭi ar gharońj gharońj lekate Mose, Aron ar Israelren mukhiyạko do Kohatrenkoe lekhaketʼkoa. 35Pegel khon mõṛẽgel bochor umer hạbicʼ okoe do ńapamokʼ tạmbu reakʼko kạmi daṛeakʼ, 36gusṭi lekate onkoakʼ lekha do jotote bar hajar eaesae mõṛẽgel tahẽkana. 37Noage Kohat bõsrenkoakʼ lekha do tahẽkana. Mose hotete Probhu Isorakʼ hukum lekage Mose ar Aron do onkokin lekhaketʼkoa.
38Gusṭi gusṭi ar gharońj gharońj lekate Gersonrenko hõko lekha ocoyena. 39Pegel khon mõṛẽgel bochor umer hạbicʼ okoeko ńapamokʼ tạmbu reakʼko kạmi daṛeakʼ, 40gusṭi gusṭi ar gharońj gharońj lekate onkoakʼ lekha do bar hajar turuisae pegel hoyena. 41Ar noage Gerson bõsrenkoakʼ lekha do tahẽkana. Probhu Isorakʼ hukum lekage Mose ar Aron do onkokin lekhaketʼkoa.
42Gusṭi gusṭi ar gharońj gharońj lekate Merarirenko hõko lekha ocoyena. 43Pegel khon mõṛẽgel bochor umer hạbicʼ okoe do ńapamokʼ tạmbure kạmi lạgitʼko hijukʼ, 44gusṭi gusṭi ar gharońj gharońj lekate onkoakʼ lekha do jotote pe hajar barsae hoyena. 45Noage Merari bõsrenkoakʼ lekha do tahẽkana. Probhu Isorakʼ hukum leka Mose ar Aron do onkokin lekhaketʼkoa.
46Mose, Aron ar Israelren mukhiyạko do nonkage gusṭi gusṭi ar gharońj gharońj lekate sanam Liwiko lekhaketʼkoa. 47-48Pegel khon mõṛẽgel bochor umer hạbicʼ okoe do ńapamokʼ tạmbure sapʼsosor ar jinisko gokʼ idi daṛeakʼ onkoakʼ lekha do jotote irạl hajar mõṛẽsae irạlgel hoyena. 49Probhu Isorakʼ hukum lekage Mose hotete mimitʼko apan ạpin sapʼdapʼ kạmi ar gogokʼ lạgitʼko ṭhik ocoyena.
Ar Probhu Isor oka hukume emlen onkage Mose do Liwikoe lekhaketʼkoa.
Santali Bible © Bangladesh Bible Society, 2021.