Numeri 34
34
Kanan disạm reakʼ simạnako
1-2Probhu Isor do Mose Israelko noa hukumakoe metadea, “Kanante bolokate sompotti mente oka disạmpe emocokʼ ona reakʼ simạna do nonka hoyokʼa: 3-4“Edom disạm reakʼ simạna aṛe reakʼ oka Sin hahaṅkar menakʼ ona reakʼ thoṛa hĩs do apeakʼ disạm reakʼ dạkhin secʼ hoyokʼtapea. Ar Purub secʼ apeakʼ noa dạkhin simạna do buluṅ doreão reakʼ mucạtʼ hạṭiń khon ehopʼkate Akrabim buru horte paromkate Sin buluṅ doreão secʼ ucuń bolokate Kades reakʼ dạkhin hạbicʼ calakʼa. Ar ona tayom do Hasor Adar secʼ hecʼkate Asmon hạbicʼ calakʼa. 5Ona tayom onḍe khon ạcurkate Misor ńutuman okaṭakʼ rohoṛ gaḍa menakʼ ona secʼte jalapurire senkate mucạdokʼa.
6“Apeakʼ disạm reakʼ pạchim secʼ simạnako do jalapuri hạbicʼ hoyokʼa. Noage apeakʼ pạchim senakʼ mucạtʼ simạ do tahena.
7-9“Utạr secʼakʼ simạ lạgitʼ do jalapuri khon Hor buru ar Hor buru khon Hamat hạbicʼ mitʼṭecʼ simạna dagpe ṭhika dohokakʼa. Ar onḍe khon ona simạna dag do Sedad secʼte Siphron hạbicʼ parom calakʼa ar Hasar Enante senkate mucạdokʼa. Ar noage hoyokʼa apeakʼ utạr secʼ reakʼ mucạtʼ simạna do.
10“Purub secʼ reakʼ simạna lạgitʼ do Hasar Enan khon Sepham hạbicʼ mitʼṭecʼ simạna dagpe ṭhik dohokakʼa. 11Noa simạna dag do Sepham khon Enan secʼte Ribla hạbicʼ pheḍ hijukʼa ar Kenerot doreão reakʼ jaegako secʼte calao idikʼa. 12Ona tayom niạ simạna dag do jordan reakʼ buluṅ doreãote senkate mucạdokʼa.
“Beṛhaetaeakʼ niạko simạna dag bhitrire noage hoyokʼa apeakʼ disạm do.”
13 #
Num 26.52-56
#Josu 14.1-5 Inạ tayom Mose do Israelko hukumatʼkoteye metatʼkoa, “Ape do gulibãṭ hotete Probhu Isorakʼ hukum leka disạm do aperen are gusṭi ar Manasekoren adha gusṭi talarepe hạṭińakoa ar apeakʼ sompottipe hoeocoya. 14Ente Ruben gusṭirenko, Gad gusṭirenko ar Manaseren adha gusṭiren bõsko do laharege akoakʼ sompottiko ńamakatʼ tahẽkana. 15Onko do Jerikho samaṅ secʼ jordan purub aṛere sompottiko ńamkeda.”
Disạm hạṭiń lạgitʼ mukhiyạkoko bhar ocokʼkan
16Probhu Isor do Moseye metadea, 17“Sompotti lekate okoe disạmko hạṭińape unkin dokin hoyokʼkana naeke Eleasar ar Nunren hopon Josuạ. 18Ar sompotti hạṭińape reakʼ kạmire goṛo emakin lạgitʼ mimitʼ gusṭiko khon mitʼṭen mukhiyạ do hataoe hoyokʼa. 19Onko mukhiyạko doko hoyokʼ kana: Jihudạ gusṭiren Jephun hopon Kaleb: 20Simeon gusṭiren do Amihud hopon Samuel; 21Benjạminren gusṭiren do Kision hopon Elidad; 22Dan gusṭiren do Jogli hopon Buki; 23Josephren hopon Manase gusṭiren mukhiyạ Ephodren hopon Haniel; 24Josephren hopon Ephrayem gusṭiren mukhiyạ Siphtanren hopon Kemuel; 25Sebulon gusṭiren mukhiyạ Parnak hopon Elisaphan; 26Isakar gusṭiren mukhiyạ Asanren hopon Paltiel; 27Aser gusṭiren mukhiyạ Selomi hopon Ahihud; 28Napthali gusṭiren mukhiyạ Amihud hopon Pedahel.”
29Kanan disạmre Israelko talare sompotti lekate jaega hạṭińako lạgitʼ Probhu Isor do noko hoṛkoe doholetʼkoa.
Santali Bible © Bangladesh Bible Society, 2021.