Numeri 28
28
Dinạm hilokʼ reakʼ samaṅokʼakʼko
(Exodus 29.38-46)
1-2Probhu Isor do Mose Israelko noako hukumako lạgitʼe metadea, “Kusi ocoyiń reakʼ jut so lekate iń ńutumte seṅgelteakʼ samaṅokʼakʼ lạgitʼ ape do niṭ akatʼ oktere iń ńutumte jomakʼ samaṅokʼ lạgitʼ alope hiṛińa.” 3Uni do noako hukumako lạgitʼ hõe metadea, “Seṅgelteakʼ samaṅokʼakʼ lạgitʼ Probhu Isor samaṅre din hilokʼ reakʼ jeredokʼ samaṅokʼakʼ lạgitʼ aperen mitʼ bochor umerren barea niphuṭ utạr bheḍa hopon ạgukin hoyokʼtapea. 4Unkin modren mitʼṭen bheḍa hopon do setakʼ jokhecʼpe samaṅea ar eṭagicʼ do cando hạsur tayom. 5Ona sãote jomakʼ samaṅokʼakʼ lạgitʼ mitʼ keji irạl sae gram holoṅ hõ ạgui hoyokʼtapea. Noa holoṅ sãote mitʼ liṭar jạitun reakʼ koṭecʼ oḍok sunum hõ lagaokʼa. 6Noa do jao hilokʼ reakʼ jeredokʼ samaṅokʼakʼ kana one okaṭakʼ do sinại burure bandhaolen. Noa do seṅgelteakʼ mitʼṭen samaṅokʼakʼ kana one ona reakʼ jut so do Probhu Isore kusiyakʼkan. 7Mimitʼ bheḍa sãote ạguakʼ mitʼ liṭar bubulakʼte coḍor samaṅokʼakʼ do samaṅ hoyokʼa. Sonot tạmbu reakʼ racare Probhu Isor ńutumte noa coḍor samaṅakʼ samaṅ hoyokʼa. 8Ar eṭagicʼ bheḍa hopon do cando hạsur tayom samaṅe hoyokʼa. Ona sãote setakʼ reakʼ jomakʼ samaṅokʼakʼ leka ar coḍor samaṅokʼakʼ hõ tahena. Noa do seṅgelteakʼ mitʼṭecʼ samaṅokʼakʼ kana one ona reakʼ jut so do Probhu Isore kusiyakʼkan.
Jirạukʼ mãhã reakʼ samaṅokʼakʼ
9“Jirạukʼ mãhãre barea mitʼ bochor umerren niphuṭ utạr bheḍa hopon samaṅkin hoyokʼa. Ona sãote coḍor samaṅokʼakʼ jinis ar jomakʼ samaṅokʼakʼ lạgitʼ sunumre sipiyakʼ pe keji turui sae gram holoṅ hõ tahena. 10Ar din hilokʼ jeredokʼ samaṅokʼakʼ ar ona sãoteakʼ coḍor samaṅokʼakʼ chaḍa mimitʼ jirạukʼ mãhãre niạ jeredokʼ samaṅokʼakʼge samaṅ hoyokʼa.
Cando reakʼ pạhil samaṅokʼakʼ
11“Mimitʼ cando reakʼ pạhil dinre Probhu Isor ńutumte jeredokʼ samaṅokʼakʼ lạgitʼ barea ḍaṅgra, mitʼṭen bheḍa ar mitʼṭen mitʼ bochorren eae goṭen bheḍa hopon samaṅko hoyokʼa. Ar onko jotoge jemon niphuṭ utạrko hoyokʼ. 12-13Jomakʼ samaṅokʼakʼ lạgitʼ mimitʼ ḍaṅgra sãote sunumre sipiyakʼ mõṛẽ keji ponsae gram holoṅ emokʼ hoyokʼa; ar bheḍa sãote do pe keji turui sae gram ar mimitʼ bheḍa hopon sãote mitʼ keji irạl sae gram holoṅ lagaokʼa. Noa do Probhu Isor ńutumte jeredokʼ samaṅokʼakʼ kana, seṅgelteakʼ mitʼṭecʼ samaṅokʼakʼge one ona reakʼ jut so do Probhu Isore kusiyakʼkan. 14Coḍor samaṅokʼakʼ lạgitʼ mimitʼ ḍaṅgra sãote mitʼ liṭer pe poa darkha rasa emokʼ hoyokʼa; bheḍa sãote do mitʼ liṭar mitʼ poa ar mimitʼ bheḍa hoponko sãote mitʼ liṭer sunum emokʼ hoyokʼa. Noa do cando reakʼ jeredokʼ samaṅokʼakʼ kana. Noa do cando pichạ goṭa bochorge korao hoyokʼa. 15Jaoge jeredokʼ samaṅokʼakʼ ar ona sãoteakʼ coḍorokʼ samaṅokʼakʼ chaḍa mitʼṭen merom boda hõ kại ńutumte samaṅe hoyokʼa.
Bańcaokʼ porob
(Levitikus 23.5-14)
16 #
Exo 12.1-13; Bib 16.1,2 “Bochor reakʼ pạhil cando reakʼ gelponakʼ tạrikre Probhu Isor ńutumte bańcaokʼ porobpe porobokʼa. 17#Exo 12.14-20; 23.15; 34.18; Bib 16.3-8Ona cando reakʼ gelmõṛẽ tạrik hilokʼ mitʼṭecʼ porobokʼ hoyokʼa. Unre eae din hạbicʼ bin khạmiyanakʼ piṭhạ jojom hoyokʼtapea. 18Pạhil hilokʼ do mitʼṭecʼ sonot jarwakʼpe hoeocoya ar enhilokʼ do jãhãnakʼ cetʼge alope kạmiya. 19Enhilokʼ do Probhu Isor ńutumte seṅgelteakʼ samaṅokʼakʼ menkate barea ḍaṅgra, mitʼṭen bheḍa ar eae goṭen mitʼ bochor umerren bheḍa hoponkote jeredokʼ samaṅokʼakʼpe samaṅa. Ar onko do jemon jotoge niphuṭ utạrko hoyokʼ. 20-21Jomakʼ samaṅokʼakʼ lạgitʼ mimitʼ ḍaṅgra sãote sunumre sipiyakʼ mõṛẽ keji ponsae gram holoṅ emokʼ hoyokʼa; ar bheḍa sãote do pe keji turui sae gram holoṅ ar mimitʼ bheḍa sãote do mitʼ keji irạl sae gram holoṅ emokʼ hoyokʼa. 22Noako sãote kại ńutumte puruchun lạgitʼ mitʼṭen merom boda hõ ạguiye hoyokʼtapea. 23Setakʼ jokhecʼ jaoge jeredokʼ samaṅokʼ chaḍa noako samaṅokʼakʼ hõ samaṅ hoyokʼa. 24Nonkage eae din hạbicʼ din hilokʼge Probhu Isor kusi ocoye reakʼ jut so lekate noako jomakʼte seṅgelteakʼ samaṅokʼakʼ mente samaṅ hoyokʼa. Ar jaoge okaṭakʼ jeredokʼ samaṅokʼakʼ ar ona sãoteakʼ coḍorokʼ samaṅokʼakʼ menakʼ ona hõ samaṅ hoyokʼa. 25Eae din hilokʼ do mitʼṭecʼ sonot ńapamokʼ sabhape hoeocoya ar enhilokʼ do jãhãnakʼ cetʼge alope kạmiya.
Eae hapta reakʼ porobko
(Levitikus 23.15-22)
26 #
Exo 23.16; 34.22; Bib 16.9-12 “Eae hapta reakʼ porob dinre, metakʼme pạhilre rakabokʼ phosol samaṅokʼ hilokʼ tinre Probhu Isor ńutumte nãwã phosolpe samaṅa enhilokʼ do mitʼṭecʼ sonot ńapamokʼ sabhape hoeocoya ar enhilokʼ do jãhãnakʼ cetʼge alope kạmiya. 27Enhilokʼ ape do Probhu Isor kusi ocoye lạgitʼ jut so lekate aperen barea ḍaṅgra, mitʼṭen bheḍa ar eae goṭen mitʼ bochor umerren bheḍa hoponkote mitʼṭecʼ jeredokʼ samaṅokʼakʼ reakʼ porobpe hoeocoya. 28-29Jomakʼ samaṅokʼ lạgitʼ mimitʼ ḍaṅgra sãote sunumte sipiyakʼ mõṛẽ keji pon sae gram holoṅ emokʼ hoyokʼtapea; ar bheḍa sãote do pe keji turui sae gram holoṅ ar mimitʼ bheḍa hopon saõte do mitʼ keji irạl sae holoṅ emokʼ hoyokʼa. 30Kại puruchun lạgitʼ noako sãote mitʼṭen merom boda hõ ạguiye lagaoapea. 31Noako samaṅokʼakʼ ar ona sãoteakʼ coḍor samaṅokʼakʼ sãote jaoge jeredokʼ samaṅokʼakʼ ar ona sãoteakʼ jomakʼ samaṅokʼakʼ hõ samaṅ hoyokʼtapea. Ar onko joto janwarge jemon niphuṭ utạrko tahen.
Santali Bible © Bangladesh Bible Society, 2021.