Numeri 17
17
Aronakʼ ṭheṅgare baha
1Inạ tayom Probhu Isor do Moseye galmaraoadea, 2“Israelko ṭhen senkate onkom metakoa onkoren hapṛamkoakʼ khũṭko leka mimitʼ khũṭren mukhiyạ ṭhen khon mitʼṭecʼkate jotote gelbar goṭecʼ ṭheṅga jemon amko emam. Ar am do onako ṭheṅgare onko mimitʼkoakʼ ńutumem ola. 3Liwi khũṭ reakʼ ṭheṅgare do Aronakʼ ńutumem ola, ente hapṛamkoakʼ khũṭ lekate mimitʼ khũṭren mukhiyạko lạgitʼ mitʼṭecʼkate ṭheṅga tahena. 4Ar ńapamokʼ tạmbu reakʼ goha sinduk samaṅre okare ape sãoteń ńapamokʼ onḍe ona ṭheṅgakom dohoya. 5Ar ińiń bachao akatʼ hoṛkoakʼ ṭheṅgare do bhoṭokʼ sagenokʼa. Ar nonkate aben upạrte Israel hoponkoakʼ karacʼ kurujokʼ do iń samaṅ khoniń thir ocoya.”
6Mose do sanam kathako Israelkoe baḍae ocoketʼkoa, ar hapṛamkoakʼ khũṭ lekate onkoren mimitʼ khũṭren mukhiyạko do mitʼṭecʼkate gelbar goṭecʼ ṭheṅgako emadea. Ona ṭheṅgako modre Aronakʼ ṭheṅga hõ tahẽkana. 7Mose do onako ṭheṅga hataokate goha tạmbure Probhu Isor samaṅreye dohokeda.
8 #
Ibr 9.4
Ar dosar hilokʼ Mose do goha tạmbuteye boloyen khan Liwi khũṭrenko dohoakatʼ ṭheṅgako modre eken Aronakʼ ṭheṅgare bhoṭokʼ sagen akan, baha akan ar badam jo hõ bele akane ńelkeda. 9Unre Mose do Probhu Isor samaṅ khon joto ṭheṅgakoe oḍok ạgukeda ar Israelko samaṅreye dohokeda. Ar onko mukhiyạ do ona ṭheṅgako ńelkeda, ar apan ạpinakʼ ṭheṅgako halaṅkeda.
10Inạ tayom Probhu do Moseye metadea, “Ṭhoṭhok hoṛko lạgitʼ mitʼṭecʼ cinhạ ńutumte Aronakʼ ṭheṅga do arhõ goha sinduk samaṅre dohokakʼme. Onate am do iń upạrte onkoakʼ karacʼ kurujokʼakʼem thir ocoytakoa, onate onko do ar bako gujukʼa.” 11Probhu Isor do Mose oka lekae hukumade tahẽkan onkageye kạmikeda.
12Noako ńelte Israelko do Moseko metadea, “Hae, ale dole gocʼena, arle maraoena, ar jotogele marao cabayena! 13Jãhãege Probhu Isorakʼ sekʼwa tạmbu ṭhene sorokʼ uni doe gujukʼa; enḍekhan ale do cetʼ sanamkogele gujukʼa?”
Santali Bible © Bangladesh Bible Society, 2021.