Numeri 1
1
Hoṛ lekha
1 #
Num 26.1-51
Israelko Misor disạm khonko oḍok hecʼen tayom dosar bochor reakʼ dosar cando reakʼ pạhil hilokʼ Probhu Isor do sinại hahaṅkarre ńapamokʼ tạmbure Mose galmaroadeteye metadea, 2-3“Am do gusṭi ar gharońjko lekate Israelko modren okoeko herel hoponakʼ umer do bargel se ona khon ḍher, metakʼme okoe do lạṛhạiko oḍok calao daṛeakʼ onkan mitʼke mitʼ herel hoponakʼ ńutum olkate mimitʼ dol lekate Aron ar am do onko ben lekhakoa. 4Onko do mimitʼ gusṭi khon mitʼ hoṛkate amko goṛowama, ar uni hoṛ do onko gusṭiren mathae hoyokʼa. 5Okoe amko goṛowam onkoakʼ ńutum do hoyokʼ kana Ruben gusṭiren Sedeurren hopon Elisur, 6Simeon gusṭiren Surisadaeren hopon Selumiel, 7Jihudạ gusṭiren Aminadabren hopon Nahason, 8Isakar gusṭiren Juarren hopon Nethanel, 9Sebulon gusṭiren Helonren hopon Eliab, 10Josephren hoponko modre Ephrayim gusṭikoren Amihudren hopon Elisama ar Manase gusṭiren Pedasurren hopon Gamaliel, 11Benjamin gusṭiren Gideonren hopon Abidan, 12Dan gusṭiren Amisadaeren hopon Ahieser, 13Aser gusṭiren Okranren hopon Pagiel, 14Gad gusṭiren Deulren hopon Eliasaph, 15Ar Napthali gusṭiren Enanren hopon Ahira.”
16Israelko tala khon okoe hoṛko bahal ocoyen onko doko hoyokʼkana onkoren hapṛamkoakʼ gusṭiren mukhiyạko ar Israelkoren eṭakʼ eṭakʼ khũṭren mathakoge. 17-18Probhu Isor okoekoakʼ ńutume menletʼ Mose ar Aron do onko kin hohowatʼkoa ar inạ bochor reakʼ dosar cando reakʼ pạhil hilokʼ do sanam Israel hoponko mitʼ ṭhenkin jarwaketʼkoa. Ar Israel hoponko do gusṭi ar gharońj reakʼ ńutum lekate onkoren hapṛamkoakʼ opromko emkeda. Ar unkin do bargel se ona khon ḍher umeran herel hoponkoakʼ ńutumkin ol caṛhaoketʼtakoa. 19Sinại hahaṅkarre Probhu Isorakʼ hukum leka Mose do hoṛkoe lekhaketʼkoa.
20Israelren maraṅicʼ hopon Ruben bõsrenko modre okoekoakʼ umer do bargel se ona khon bạ̃ṛti umer hoyakantako, metakʼme okoeko do lạṛhại lạgitʼ oḍokʼ calakʼ lekako tahẽkan, onko do gusṭi ar gharońj reakʼ oprom lekate onkoakʼ ńutum ol caṛhaoentakoa. 21Ruben gusṭi khon tinạkʼko ńamen onko hoṛkoakʼ lekha do pongel turui hajar mõṛẽsae tahẽkana.
22Simeon bõsrenko modre okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate jotokoakʼ ńutum ol caṛhaoentakoa. 23Simeon gusṭi khon tinạkʼ hoṛko ńamen onkoakʼ lekha do mõṛẽgel are hajar pesae tahẽkana.
24Gad bõsrenko mod khon okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate sanamkoakʼ ńutum ol caṛhaoentakoa. 25Gad gusṭi khon tinạkʼ hoṛko ńamen onkoakʼ lekha do pongel mõṛẽ hajar turui sae mõṛẽgel.
26Jihudạ bõsrenko modre okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 27Jihudạ gusṭi khon tinạkʼko ńamen onko hoṛkoakʼ lekha do eaegel pon hajar turuisae tahẽkana.
28Isakar bõsko modren okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 29Isakar gusṭiko khon tinạkʼko ńamen onko hoṛkoakʼ lekha do mõṛẽgel pon hajar ponsae tahẽkana.
30Sebulon bõsrenko modren okoekoakʼ umer do bargel se ona khon bạ̃ṛti hoyakantako, metakʼme okoeko do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 31Sebulon gusṭi khon tinạkʼko ńamen onko hoṛkoakʼ lekha do mõṛẽgel eae hajar ponsae tahẽkana.
32Josephren hoponko talare Ephrayem bõsrenko modren okoekoakʼ umer do bargel se ona khon ḍher, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 33Ephrayem gusṭiko khon okoeko ńamen onko hoṛkoakʼ lekha do pongel hajar mõṛẽsae tahẽkana. 34Manase bõsrenko modren okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 35Manase gusṭi khon tinạkʼko ńamen onko hoṛkoakʼ lekha do pegel bar hajar barsae tahẽkana.
36Benjạmin bõsrenko modren okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 37Benjạmin gusṭiren tinạkʼko ńamen onko hoṛkoakʼ lekha do pegel mõṛẽ hajar ponsae tahẽkana.
38Dan bõsrenko modren okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 39Dan gusṭi khon tinạkʼko ńamen onko hoṛkoakʼ lekha do turuigel bar hajar eae sae tahẽkana.
40Aser bõsrenko modren okoekoakʼ umer do bargel se ona khon bạ̃ṛti, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 41Aser gusṭirenko khon tinạkʼko ńamen onko hoṛkoakʼ lekha do pongel mitʼ hajar mõṛẽsae tahẽkana.
42Napthali bõsrenko modre okoekoakʼ umer do bargel se ona khon ḍher, metakʼme okoe do lạṛhại lạgitʼ oḍok calakʼ lekako tahẽkan, onko do gusṭi ar gharońj reakʼ oprom lekate ńutum ol caṛhaoentakoa. 43Napthali gusṭi khon tinạkʼko ńamen onko hoṛkoakʼ lekha do mõṛẽgel pe hajar ponsae tahẽkana.
44Mose, Aron ar Israelren gelbar mukhiyạko hotete noko hoṛ doko lekha ocolena. Onko do jotoge apan ạpin bõsren mathako tahẽkana. 45Sanam Israelko modre okoekoakʼ umer do bargel se ona khon bạ̃ṛti tahẽkan, metakʼme okoe do lạṛhại lạgitʼ oḍok calakʼ lekako tahẽkan, onko do gharońj lekateko lekha ocoyena. 46Onkoakʼ lekha do jotote turui lakh pe hajar mõṛẽsae mõṛẽgel tahẽkana.
47Menkhan onko sãote Liwi gusṭiren hoṛkoakʼ lekha do baṅ hoylena. 48Probhu Isor do Moseye galmaraoade tahẽkana, 49“Liwi gusṭiren do alom lekhakoa, se hoṛ lekhako jokhecʼ hõ eṭakʼ Israelko sãote alom mitʼkoa. 50Goha tạmbu reakʼ asbabko ar ona reakʼ sanamakʼ ńel jut reakʼ bhar do onko cetanrem dohoya. Onkoakʼ kạmi do hoyokʼa sekʼwa tạmbu ar ona reakʼ asbabko gokʼ bhạriạ idiya. Ar noa ńel jut reakʼ bhar hõ onko cetanrem dohoya ar onko do noa beṛhaete ḍerakʼ hoyokʼtakoa. 51Sekʼwa tạmbu tinre uṭhạukʼa unre Liwikoge ona doko samṭaoa arko bereda. Ar eṭakʼ jãhãe hoṛ onḍeye sorokʼ enḍekhan uni doe gocʼ ocokʼa. 52Apan ạpin dol lekate Israelko do akoakʼ tạmbuko bereda. Ar jotoge akoakʼ niṭ akatʼ ṭhạ̃ire apan ạpin nisạn ṭhen phạd phạdko ḍerakʼa. 53Israelko cetanre Probhu Isorakʼ edre jemon alo paṛaokʼ onate Liwiko do sekʼwa tạmbu beṛhaeteko ḍerakʼa. Ar sekʼwa tạmbu ńej jut reakʼ bhar hõ onkorege tahena.”
54Probhu Isor Mose okalekae hukumade tahekan onkage Israelko doko kạmikeda.
Santali Bible © Bangladesh Bible Society, 2021.