Mikạ 3
3
Mukhiyạ ar nạbiko upạrte katha
1Iń Mikạgeń meneda, E Jakobren mukhiyạko, metakʼme Israel bõsren disạm cakʼlaoko, ape do ańjompe. Ape do cetʼ hok reakʼ bicạr babotre baḍae baṅ lek kantapea? 2Ape do bhageakʼ kạmipe hirkhạwakʼ kana ar bạṛicʼakʼ kạmi dope dulạṛeda; Ape do ińren hoṛkoakʼ hoṛmo khon harta ar jaṅ khon jelpe chaḍaoetʼtakoa; 3Ape do ińren hoṛkoakʼ jelpe jometʼkana, onkoakʼ harta chaḍaokate jaṅko dope rạputʼ gejereda; ape do celaṅ reakʼ jel leka onkope kuṭiyetʼkoa. 4Okte darakana tinre ape do Probhu Isor ṭhenpe rakʼjoṅa, menkhan uni do bae roṛ ruạṛapea. Unre uni do ape secʼ khon acʼakʼ mẽtʼãhãe danaṅtaea, ente ape do bạṛicʼakʼpe kạmikana.
5Okoe nạbiko ińren hoṛko bạṛicʼ horteko idi akatʼko ar onko jãhãeye jom ocoakatʼko enḍekhan onko do “Suluk ” menteko roṛ sodora; menkhan bako jom ocoko enḍekhan onko do uni upạrte lạṛhại lạgitʼko sapṛaokʼa. Ona iạte Probhu Isor do onko nạbikoe metakokana, 6“Ape lạgitʼ ńindạ daraekana, ape do cetʼ dorsonge bape ńela; ape lạgitʼ do ńut daraekana, ape do nạbi lekate cetʼge bape roṛ daṛeakʼa. Ape lạgitʼ cando doe hạsurokʼa ar siń do ńutokʼa.” 7Onate dorson ńeńelko doko lajao ocokʼa gonokko doko bemanot ocokʼa. Onko do jotoge mẽtʼãhãko danaṅtakoa, ente Isor do cetʼ roṛ ruạṛge bae emakoa. 8Menkhan Jakob do acʼakʼ behokakʼ reakʼ, ar Israel do acʼakʼ kại reaṅ baḍae ocoye lạgitʼ Probhu Isorren Jiu reakʼ daṛete, ar dhorom reakʼ bicạrre dilteń perecʼ akana.
9E Jakob bõsren mukhiyạko, ar Israelren bõsren disạm cakʼlaoko, ańjompe. Ape do dhorom reakʼ bicạrpe nihạ̃tetʼkana ar sojheakʼ dope konḍea ocoyetʼa. 10Ape do mãyãmte Sion, ar behokakʼte Jerusalempe benao rakapʼ akada. 11Onḍenko mukhiyạ do ghus jomkateko bicạra, ar naekeko do ṭakate cecetʼakʼko emokʼa ar nạbiko hõ ṭaka hataokateko nạbiya. Ar Probhu Isorakʼ gokʼṛo reakʼ as dohokateko mena, “Probhu Isor do cetʼ abo talare bạnuiya? Abo cetanre jãhãn muhin do baṅ hijukʼa.” 12#Jir 26.18 Onatege Sion do ape iạte khet baṛge lekae cas ocokʼa, ar Jerusalem do dhaṅ dhaserakʼ ḍhipi leka hoyokʼa, ar koejoṅ oṛakʼ reakʼ buru do jhạuạkote dapal esedokʼa.
Santali Bible © Bangladesh Bible Society, 2021.