Levitikus 17
17
Mãyãm do sonotakʼkana
1Probhu Isor do Moseye galmaraoadea, 2“Probhu Isorakʼ noa hukum do Aron ar uniren hoponko ar sanam Israelkom baḍae ocokoa. 3-4Israel gharońjrenko modren jãhãe hoṛ ḍaṅgra se merom se bheḍa dãṛẽye monejoṅ enḍekhan uni do Probhu Isorakʼ ḍera tạmbu samaṅre, metakʼme ńapamokʼ tạmbu reakʼ duạr ṭhen Probhu Isor ńutumte samaṅokʼakʼ menkate dãṛẽye hoyokʼa. Ar onka baṅkate jãhãe ḍera talare se ḍera bahrereye dãṛẽye enḍekhan uni do mãyãm iạte dạyireye paṛaokʼa. Ar ona mãyãm khạtirte acʼakʼ jạtrenko khone meṭao ocokʼa. 5Israelkoren okoeko janwar ṭạnḍireko samaṅokʼkan onko do Probhu Isor ṭhen ạguko reakʼ hukum emakana. Ar onko do ńapamokʼ tạmbu reakʼ duạr ṭhen Probhu Isor ńutumte sulukren samaṅokʼakʼ menkate samaṅko hoyokʼa. 6Ńapamokʼ tạmbu reakʼ duạr ṭhen Probhu Isorakʼ pinḍre naeke do uni janwarakʼ mãyãme irciyakʼa ar Probhu Isore kusiyakʼ jut so lekate janwarakʼ itil doe jeretʼ giḍikakʼa. 7Probhu Isorre bepạtiạr iạte boda-bhutko ńutumte janwar dãṛẽkate apnartetʼ aloko ạkhrińokʼma. Noa do mitʼṭecʼ niạm leka piṛhike piṛhi manao idiy hoyokʼtakoa.
8-9“Onkom metakoa, jãhãe Israel se onko talareye girobasokʼkan jãhãe jạtren hoṛge jeredokʼ samaṅokʼakʼ se eṭakʼ jãhãnakʼ samaṅokʼakʼge Probhu Isor ńutumte samaṅokʼ lạgitʼ ńapamokʼ tạmbu reakʼ duạr ṭhen bae ạgui, enḍekhan uni do acʼ jạtrenko khone meṭao ocokʼa.
10 #
Gen 9.4; Lev 7.26,27; 19.26; Bib 12.16,23; 15.23 “Jãhãe Israel hoṛ se onko talareye girobasokʼkan eṭakʼ jãhãn jạtren hoṛge mãyãme jom enḍekhan uni doń dea giḍikaea ar acʼakʼ jạtrenko khoniń meṭao utạrea, 11#Ibr 9.22ente mãyãmrege jiwi do tahen kana. Onate apeakʼ jiwi bodolte iń do pinḍ cetanre apeakʼ kại reakʼ puruchun lạgitʼ iń bebosta akatʼpea. Ar mãyãmre jiwi menakʼte ona do kại reakʼe puruchuneda. 12Ona iạte iń do Israelkoń men akawatʼkoa, onko ar ako talareko girobasokʼkan eṭakʼko hõ jemon mãyãm aloko jom. 13Jãhãe Israelko se onko talareye girobasokʼkan eṭakʼ jãhãn jạtren hoṛge jãhãn janwar se cẽṛẽ jomkoa menteye gocʼko enḍekhan mãyãm do hasare topakakʼ hoyokʼtaea, 14ente sanam jiwiyankoakʼ jiwi do onkoakʼ jiwetʼ mãyãmrege menakʼa. Ona iạtege iń do Israelkoń metakokana jemon janwarakʼ mãyãm aloko jom, ente mitʼke mitʼ jiwiyankoakʼ jiwi do onkoakʼ mãyãm kana. Ar okoe ona mãyãme jom uni do acʼ jạtrenko khone meṭao ocokʼa.
15“Jãhãege gocʼ janwar se bir janwar tite cirạ ocoakan janwarakʼ jele jom, baṅ do Israelkoge cetʼ baṅ do onko talareko girobasokʼkan eṭakʼ jạtren hoṛkoge cetʼ, uni do acʼakʼ kicricʼkoe saphaetaea are ḍạbrạ saphakʼa. Ar ạyupʼ hạbicʼ besapha akane tahena, ar ona tayom do chut meṭaokʼtaea. 16Menkhan kicricʼko bae saphaetae ar ḍạbrạ hõ bae ḍạbrạkʼ enḍekhan uni do acʼakʼ bedhorom iạte dạyireye paṛaokʼa.”
Santali Bible © Bangladesh Bible Society, 2021.