Levitikus 13
13
Harta rog reaṅ niạmko
1Inạ tayom Probhu Isor do Mose ar Arone metatʼkinạ, 2“Jãhãe hoṛ hoṛmo reakʼ hartare jãhãn laṭa loṭo se bhumri se mitʼ bar ṭaklakʼ ṭiklạkʼ rakapʼae ar ona tayom do murhucʼjom rog leka ńelokʼtae, enḍekhan uni do naeke Aron se uniren jãhãeṭakʼ hopon ṭhene ạgu ocokʼma. 3Ar naeke do uniyakʼ harta reakʼ ona roge ńeltaea. Ar onḍenakʼ upʼko ponḍ akan khan ar rog do hartate bolo akan khan ona do murhucʼjom rog mente bujhạu hoyokʼa. Unre naeke do ona ńel tayom besapha menteye lại sodorea. 4Ar uniyakʼ harta reakʼ ona ṭaklakʼ ṭiklạkʼre ponḍge menakʼ khan ar harta bhitri hạbicʼ baṅ bolo akan khan ar onḍenakʼ upʼko hõ baṅ ponḍ akan khan, enḍekhan naeke do eae din hạbicʼ hoṛko khon uni hoṛe begar dohokaea. 5Ar eae din hilokʼ naeke do arhõe ńel doṛhaetaea. Ar inạko dinte ona rog harta bhitri hạbicʼ baṅ bololen khan enḍekhan uni do arhõ eae din begarreye dohokaea. 6Ar eae din hilokʼ naeke do arhõe ńeltaea. Ar inạko dinte hartare pasnao baṅkate cabalen khan uni do saphageae menteye lại sodorea, ente ona do eken bhumri kana ar jãhãnakʼ do baṅkana. Unre uni hoṛ do acʼakʼ kicricʼkoe saphaetaea ar ona tayom doe sapha utạrokʼa.
7“Naeke do uni hoṛ saphageae menteye lại sodore tayom hõ uni hoṛakʼ hartare bhumri pasnao idikʼ enḍekhan uni do arhõ naeke ṭhen senkateye ńel ocoytaea. 8Unre naeke do arhõe ńeltaea. Ar inạko dinte rog do sạrige hartare pasnao akan khan uni do besapha menteye lại sodorea, ente ona rog do murhucʼjom rog kana.
9-10“Jãhãe hoṛakʼ hartare murhucʼjom rog ńellen khan uni do naeke ṭhen idiye hoyokʼa ar naeke do onae ńeltaea. Ar hartare laṭa loṭo rakapʼ akan khan ar onḍenakʼ upʼ hõ ponḍge menakʼ khan ar ona laṭa loṭo cetanre berel ghao menakʼ khan, 11enḍekhan bujhạu hoyokʼa ona do mareyakʼ murhucʼjom rog kantaea. Ar naeke do uni hoṛ besapha menteye lại sodorea. Ar uni do begar dohoye reakʼ jạruṛ bạnukʼa ente uni ma besaphage menae. 12Menkhan rog do uniyakʼ goṭa hoṛmore pasnao akantae khan ar bohokʼ khon jaṅga hạbicʼ menakʼtae, 13enḍekhan naeke do mońjteye ńelea. Ar sạrige goṭa hoṛmore menakʼtae ar ponḍge khan uni do sapha menteye lại sodorea. Menkhan goṭa hoṛmo ponḍge menakʼtae iạte uni do besaphayicʼ doe baṅkana. 14Menkhan ona tayom hõ jodi uni hoṛakʼ hoṛmore berel ghao ńellentae khan uni doe besaphagea. 15Ar naeke do ona ghao ńeltayom besapha menteye lại sodorea. Ente uniyakʼ rog do besaphagea; ona do murhucʼjom rog kana. 16Ona tayom berel ghao arhõ ponḍ ruạṛlentae khan uni do arhõ naeke ṭhen calakʼ hoyokʼtaea. 17Unre naeke do arhõe ńeltaea. Ar uniyakʼ goṭa hoṛmo reakʼ rog sạrige ponḍgetae khan uni do sapha mentegeye lại sodorea, ente uni doe saphagea.
18-19“Ar jãhãeakʼ hoṛmore ojo janamkate boge tayom ona jaegare ponḍge phoka se arakʼ macha ponḍ ṭiklạkʼ dag ńelokʼ enḍekhan uni do naeke ṭhen calakʼ hoyokʼtaea. 20Ar naeke do onae ńeltaea. Ar harta bhitri hạbicʼ ona boloakan ar onḍenakʼ upʼko hõ ponḍge pherao akan khan naeke do besapha menteye lại sodorea, ente murhucʼjom rog do ona jaegare hoyakantaea. 21Menkhan naeke do jãhãn ponḍ upʼ onḍe bae ńelńam ar harta bhitri hạbicʼ ona baṅ bolo akan ar caba lạgidokʼkan enḍekhan naeke do eae din hạbicʼ eṭakʼko khon begarreye dohoyea. 22Menkhan hartare ona pasnao idikʼkan khan naeke do besapha menteye sodorea, ente ona do mitʼṭecʼ rog kana. 23Menkhan ona baṅ pherao akan ar baṅ pasnao akan khan ona do ojo reakʼ dag kana. Ar naeke do unre sapha menteye lại sodorea.
24“Jãhãe hoṛmoreye lo emanlen khan ar ona lo reakʼ berel ghaore arakʼ se ponḍ ṭiklạkʼ pherao akan, 25enḍekhan naeke do ona hõ biḍạukateye ńela. Ar onḍenakʼ upʼko ponḍge khan ar rog do harta bhitri hạbicʼ bolo akan khan enḍekhan ona ojo jaegare murhucʼjom rog hoyakana mente bujhạu hoyokʼa. Ar naeke do besapha mente uniye lại sodorea, ente noa do mitʼṭecʼ murhucʼjom rog kana. 26Menkhan naeke biḍạukate, onḍenakʼ upʼko begor ponḍ ar harta bhitri hạbicʼ baṅ bolo akane ńel bickom milạu ruạṛ akan, enḍekhan naeke do eae din hạbicʼ eṭakʼko khon begargeye dohokaea. 27Ona eae din hilokʼ naeke do arhõe biḍạutaea, ar unre hartare pasnao akane ńel enḍekhan naeke do besapha menteye lại sodorea, ente ona do murhucʼjom rog kana. 28Menkhan onkage tahen ar hartare baṅ pasnao akan ar milạu idikʼkan, enḍekhan lo iạte phulạu akana mente bujhạu hoyokʼa. Unre naeke do sapha menteye lại sodorea, ente ona do eken mitʼṭecʼ lo dag kana.
29“Ar jãhãe herel se maejiuakʼ bohokʼ se gocore rog reakʼ lokhon ńelokʼtae, 30enḍekhan naeke do onae biḍạutaea. Ar rog do harta bhitri hạbicʼ bolo akan ar onḍenakʼ upʼko sasaṅ ar pạlkuge khan uni hoṛ do besapha menteye lại sodorea, ente ona do bohokʼ ar goco reakʼ murhucʼjom rog kana. 31Menkhan naeke do ona roge ńela ar harta bhitri hạbicʼ baṅ bolo akan khan ar onare hende upʼ bạnukʼ khan naeke do eae din hạbicʼ eṭakʼko khon begarreye dohokaea. 32Ona tayom eae din hilokʼ naeke do arhõ biḍạukateye ńeltaea ona do pasnao akana se baṅ ar ona reakʼ upʼko hõ pạlku akana se baṅa ar harta bhitrite boloakana se baṅa, 33enḍekhan babatʼ jaega badkate uni hoṛakʼ eṭakʼ upʼko do hoyo giḍikatae hoyokʼa. Ar inạ tayom naeke do arhõ eae din eṭakʼko khon begargeye dohokaea. 34Ona eae din hilokʼ naeke do arhõe biḍạutaea ar unre hartare ona baṅ pasnao akan ar bhitrite hõ baṅ bolo akan, enḍekhan naeke do sapha menteye lại sodorea. Ar uni do kicricʼkoe saphaetaea are saphakʼa. 35Sapha lại tayom uniyakʼ hoṛmore ona babatʼ do arhõ pasnao idilentae khan, 36enḍekhan naeke do arhõe ńel dohṛaetaea. Ar babatʼ do arhõ pasnao akantae khan ar pạlku upʼko sasaṅge khan ona do baṅ biḍạu hoyokʼa, ente uni hoṛ doe besaphagea. 37Menkhan naeke do lahate lekageye ńel ar ona babatʼ jaegare hende upʼko janamokʼ enḍekhan bujhạu hoyokʼa ona do boge akana. Ar naeke do sapha akana menteye lại sodorea.
38“Jãhãe herel se maejiuakʼ hartare ṭaklạkʼ ṭiklạkʼ, metakʼme ponḍ ṭaklạkʼ ṭiklạkʼ dag ńelokʼ, 39enḍekhan naeke do ona hõ biḍạukateye ńela. Ona dagko ponḍge khan bujhạu hoyokʼa hartare poṭakʼ rog hoyakana mente ar onate uni hoṛ do jãhãn loksan baṅ hoyokʼtaea, uni doe saphagea.
40“Jãhãe hoṛakʼ bohokʼ upʼko ńur iạteye ceḍege khan enḍekhan uni doe saphagea. 41Bohokʼ samaṅ reakʼ upʼko ńur iạte jãhãeye cạ̃idạge khan uni hõe saphagea. 42Menkhan uniyakʼ ceḍe bohokʼ se cạ̃idạ bohokʼre rog reakʼ jãhãn arakʼ macha ponḍ dag ńelokʼ khan bujhạu hoyokʼa uniyakʼ bohokʼre se cạndire murhucʼjom rog hoyakana. 43Ar naeke do biḍạukate murhucʼjom rog leka bohokʼre se cạndire arakʼ macha bharaogeye ńeltae , 44enḍekhan bujhạu hoyokʼa uni hoṛ do murhucʼjom rog hoyakantaea ar onateye besaphagea. Ar naeke do besapha menteye lại sodorea.
45“Nonkan rog okoeyakʼ hoyokʼ uni do oṛecʼ kicricʼ horog hoyokʼtaea. Ar upʼ do aṛakʼge tahentaea. Uni do acʼakʼ mẽtʼ betʼkate ãṭ aṛaṅte ‘besapha, besapha,’ roroṛ hoyokʼtaea. 46Uniyakʼ hoṛmore tinạkʼ din rog tahentae unạkʼ din uni do besapha akane tahena. Ar ḍera bahrere eskar tahen hoyokʼtaea.
Rog ar dagko reakʼ niạmko
47-48“Ar jãhãn kicricʼre murhucʼ jom rog menakʼ khan baṅ do upʼ reakʼ kicricʼge cetʼ baṅ do musnạ reakʼ kicricʼge cetʼ baṅ do hartare se harta reakʼ jiniskorege hoyokʼ, 49ar ona jaegare thoṛa hạṛiạr se arakʼ macha ponḍge ńelokʼ enḍekhan bujhạu hoyokʼa ona do eṭakʼ lekan murhucʼ jom rog kana. Ar ona do naeke udukʼae hoyokʼa. 50Ar naeke do mońjte ńelkate eae din hạbicʼ eṭakʼ jinisko khon begarreye dohokakʼa. 51-52Ona tayom eae din hilokʼ naeke do arhõ onae ńel doṛhaea. Ar inạko dinre kicricʼ se otorre se bharnare se hartare se harta reakʼ jinis cetanre rog pasnao akan khan tobe bujhạu hoyokʼa ona do murhucʼ jom rog kana ar onako jinis do besaphagea. Unre ona do atar giḍikakʼ hoyokʼa, ente ona do mitʼ lekan murhucʼ jom rog kana. Onate seṅgelre atar giḍikakʼ hoyokʼa.
53“Menkhan naeke do ona kicricʼre se otorre se bharnare se hartare se harta reakʼ jinis cetanre baṅ pasnao akane ńel, 54enḍekhan uni do ona jinis ạrupʼ saphae lạgitʼe hukuma. Ar ona tayom arhõ eae din hạbicʼ eṭakʼakʼ jinisko khon begarreye dohokakʼa. 55Ona tayom naeke do arhõ onae ńela. Ar pasnao baṅkate onkage menakʼ khan bujhạu hoyokʼa ona do besaphagea. Ona jinis reakʼ bahre ar bhitri jãhã secʼrege murhucʼjom rog tahen, ona do seṅgelre atar giḍikakʼ hoyokʼa. 56Ar saphaketʼ tayom ona jaega do arhõ polsoge ńelokʼ enḍekhan naeke ona polso jaega doe oṛecʼ giḍikakʼa. 57Menkhan ona jinisre arhõ polso dag ńelokʼ khan bujhạu hoyokʼa ona do pasnao akana. Ar ona murhucʼjom rogakʼ jinis do seṅgelre atar giḍikakʼ hoyokʼa. 58Ona jinis saphae tayom polso dag baṅ ńelokʼ khan ona do arhõ sapha doṛhae hoyokʼa, ar onate ona do saphakʼa.”
59Noako niạm lekate murchucʼjom rogakʼ, upʼ se musnạ kicricʼ, se otorre se bharnare se hartare se harta reakʼ jãhãn jinisre sapha se besapha mente lại sodor hoyokʼa.
Santali Bible © Bangladesh Bible Society, 2021.