Bikʼcạrko 2
2
Bokim ṭhen Probhu Isorren goḍet
1Probhu Isorren goḍet do Gilgal khon Bokimre hecʼkate Israelkoe metatʼkoa, “Iń do Misor disạm khoniń oḍok ạgu akatʼpea ar oka disạm emape lạgitʼ aperen hapṛamko ṭheniń gokʼletʼ ona disạmteń ạgu akatʼpea. Ińiń menakada, ‘ape lạgitʼ oka bondobosiń dohoakatʼ ona do tishõ bạń rạpuda. 2#Exo 34.12,13; Bib 7.2-5Ape do noa disạmren hoṛko tulucʼ jãhãnakʼge bondobos alope dohoya ar onkoakʼ pinḍkope rạputʼ giḍikatakoa.’ Menkhan ape do ińakʼ katha bape bataoleda. Cekate nonka dope kạmikeda? 3Ona iạte ńitokʼ iń metape kana, ape ṭhen khon noko hoṛ do ar bạń laga oḍokkoa; onko do ape lạgitʼ jhampa lekako hoyokʼa, ente onkoren debotakoakʼ jhạlirepe paṛaokʼa. ”
4Probhu Isorren goḍet do tinre Israelko ṭhen niạko kathae menkeda unre onko do ãṭ aṛaṅte rarakʼko ehopʼena. 5Ar ona jaega reakʼ ńutum do Bokimko dohokeda (metakʼme “Rakʼjoṅ”). Probhu Isor ńutumte onḍe onko do janwar samaṅokʼakʼko samaṅkeda.
Bebatao arko bhagao ocokʼkan
6Josuạ do Israelkoe bidạ baṛaketʼko khan onko do apan ạpin hĩs reakʼ jaega dokhol lạgitʼko calaoena. 7Josuạ tinạkʼ din jiwetʼe tahẽkan ar ona tayom dinkore okoe murubbiko jiwetʼko tahẽkan unạkʼ din Israelko do Probhu Isorko sewawadea. Israelko lạgitʼ Probhu Isor oka bhageakʼkoe kạmiletʼ ona do onkoren murubbiko ko ńelleda. 8Ar Probhu Isorren guti Nunren hopon Josuạ do mitʼsae gel bochor umerreye gocʼena. 9#Josu 19.49,50Ar Timnat-heres ńutumanakʼ mitʼṭecʼ jaegareko topakedea. Ona jaega do Ephrayim gusṭirenkoakʼ buru ṭoṭha reakʼ Gas buru utạr secʼre tahẽkana.
10Josuạ okteren Israelko do gocʼente akoren hapṛam ṭhenko calaoen khan onkoakʼ jaegare onkoren hoponkoko hecʼena. Onko do Probhu Isor bako baḍae akade tahẽkana ar Israelko lạgitʼ Probhu Isor okakoe cekaletʼ ona hõ bako baḍaekan tahẽkana. 11Ar Probhu Isorakʼ mẽtʼre oka bạṛicʼakʼ kan onageko kạmiyetʼ tahẽkana. Onko do Bakʼal debotako sewawae kan tahẽkana. 12Onkoren hapṛamkoren Probhu Isor, okoe do Misor disạm khone oḍok ạguletʼko tahẽkan uni do jaogeko bạgiyaekan tahẽkana. Onko do ako beṛhaeten jạtren eṭakʼ eṭakʼ debota secʼko ạcurokʼkan tahẽkana arko pujạwako kan tahẽkana, ar onkate Probhu Isorakʼ pitko caṛhao ocoyetʼ tahẽkana. 13Ar nonkate onko do Probhu Isor bạgikate Bakʼal debota ar Asṭoret debiko sewawae kan tahẽkana. 14Ona iạte Probhu Isor do Israelko luluṭkoakʼ tireye jimạyetʼko tahẽkana. Onko do onkoakʼ jiniskoko luṭetʼ tahẽkana. Uni do onkoren beṛhaeten bạiriakʼ tireye jimạyetʼko tahẽkana, ar onate bạiriko upạrte bako teṅgo daṛeakʼkan tahẽkana. 15Israel hoponko tinre lạṛhạiko oḍok senokʼkan tahẽkana unre Probhu Isor okae kiriạ akan tahẽkan onkage uniyakʼ ti do onkoakʼ bhạlại alo hoyokʼ lạgitʼ onko upạrteye tahenkan tahẽkana, ar maraṅ muhin talareko paṛaokʼkan tahẽkana. 16Unre Probhu Isor do onko talare disạm cakʼlaokoe teṅgoyetʼko tahẽkana. Onko do luluṭko reakʼ ti khon Israelkoko rukhiyạyetʼko tahẽkana, 17Menkhan enhõ Israel hoponko do disạm cakʼlaokoakʼ katha bako luturakʼkan tahẽkana. Probhu Isor cetanre pạtiạu doho baṅkate debotako cetanre apnarko ṭehãḍokʼkan tahẽkana arko sewawako kan tahẽkana. Onkoren hapṛamko Probhu Isorakʼ oka horteko taṛametʼ tahẽkan ona hor khon thoṛa ghạṛicʼ khangeko ghańjeṛokʼ kan tahẽkana. 18Probhu Isor do tinre onko lạgitʼ jãhãe disạm cakʼlaoyicʼe teṅgoyetʼko tahẽkana unrege uni do onko tulucʼe tahenkan tahẽkana. Ar disạm cakʼlaoyicʼ tinạkʼ din jiwetʼe tahenkan tahẽkan unạkʼ din bạirikoakʼ ti khon Israelkoe rukhiyạyetʼko tahẽkana. Onko do santao iạte tinreko rakʼetʼ tahẽkana unre Probhu Isor do onko cetanreye dayakʼ kan tahẽkana. 19Menkhan disạm cakʼlaokoko gocʼlen khan hoṛko do arhõ debota secʼko lawerokʼkan tahẽkana arko sewawako kan tahẽkana ar hapṛamko khon hõ bạṛicʼakʼ horteko taṛametʼ tahẽkana. Onko do okalekate hõ bạṛicʼakʼ hor ar bạṛicʼ hewa bako bạgiyakʼkan tahẽkana.
20Ona iạte Probhu Isor do Israelko cetanre edreteye menkeda, “Nokoren hapṛamko okaṭakʼ iń bondobosatʼko tahẽkan ona do noko bako manao akada ar ińakʼ katha hõ bako ańjom akada. 21Ona iạtege Josuạwakʼ gujukʼ oktere okoe jạtrenko disạmreko tahẽkan onko do Israelko samaṅ khon bạń laga ńirkoa. 22Ar akoren hapṛamko leka ińakʼ horteko calakʼa se baṅa ona do noko jạtrenko hoteteń biḍạukoa.” 23Probhu Isor do noko jạtrenko soṅge soṅgete bae laga ńirletʼkoa ar onko do disạmregeye dohokatʼkoa. Uni do Josuạwakʼ tire bae jimạletʼkoa.
Santali Bible © Bangladesh Bible Society, 2021.