Jakob 3
3
Alaṅ dobnao reaṅ
1E boehako, ape modre sanamkoge guru do alope hoyokʼa, entepe baḍaegea, abo do guru iạte eṭakʼko khon arhõ kajak bicạr hoyokʼtabona. 2Abo do sanamkoge ạḍi lekate bon behokeda. Jãhãe katha hotete bae behoketʼ khan enḍekhan uni doe dhoromgea; ar uni do goṭa hoṛmoe sambṛao daṛeakʼ kana.
3Sadomkoakʼ mocare jhinbo lagaole khan, jãhãtege calakʼ moneyabon onḍege bon idi daṛeakoa. 4Arhõ ńelpe, jahaj do maraṅgere hõ ar kajak hoete ṭhelao idikʼkanre hõ calaoicʼ do eken mitʼṭecʼ huḍiń paṭwarte jãhãsecʼge monae ontegeye idi daṛeakʼ kana. 5Alaṅ hõ onkage; hoṛmo reakʼ mitʼṭecʼ huḍiń utạrakʼ hạṭińkanre hõ ona do ạḍi maraṅ maraṅ kathakoe roṛa. Arhõ huḍiń huḍiń seṅgelte mitʼṭecʼ napṛakʼ bire ḍahao marao daṛeakʼa! 6Onkage alaṅ hõ ṭhik seṅgel leka. Aboakʼ hoṛmore tinạkʼ hạṭińko menakʼ ona modre alaṅ do mitʼṭecʼ bedhorom dhạrti lekana. Norok seṅgelre lokʼte ona do goṭa hoṛmoe nosṭoyeda ar jion reakʼ horre seṅgele salgaoeda.
7Manwa do joto lekan janwarko, cẽṛẽko, leńokʼ ṭunḍạńko ar dakʼren jiwiyankoe koboj daṛeakoa arko kobojetʼkogea, 8menkhan alaṅ do okoe hõ bae koboj daṛeakʼa. Ona do baṅ sambṛaokʼa, bạṛicʼ ar botor bisanakʼte perecʼgea. 9#Gen 1.26 Noa alaṅte aboren Probhu Isor, metakʼme Isor Baba bon sarhaoede kana, arhõ noa alaṅte uniyakʼ muṭhạnte benao akan hoṛ bon sarapako kana. 10Aboakʼ inạ moca khonge sarhao ar sarap noa banarge oḍokokʼ kana. E ińren boehako, nonka hoyokʼ do baṅ bhagea. 11Inạ mitʼ jaega khon ạtu oḍok hijukʼkan dakʼre do cetʼ heṛem ar haṛhatʼ dakʼ tahengea? 12E boehako, loa darere jạitun do cetʼ jo daṛeakʼgea? Se darkha nạ̃ṛĩre cetʼ loa jo do jokʼgea? Onkage raham dakʼre heṛem dakʼ do baṅ ńamokʼa.
Bar lekan akel
13Ape modre akel ar budan hoṛ doe okoekana? Uni do acʼakʼ bhage cạl-colonte akel khon oḍokokʼkan mạ̃hirtetʼ reakʼ kạmiye udugma. 14Menkhan apeakʼ ontor do hiskạte haṛhatʼ ar dola duli menakʼ khan enḍekhan akel reakʼ do alope sarhaokʼa, ar sạriyakʼ do alope ạuṛiyaga. 15Nonkan akel serma khon do baṅ pheḍ hijukʼa, bickom ona reakʼ jopoṛao do dhạrti reakʼ bạṛicʼ sana ar bạṛicʼ jiuko sãotege; 16ente okare hiskạ ar dola duli tahen onḍege gulmal ar joto lekan bedhoromakʼko hõ tahena. 17Menkhan oka akel serma khon hijukʼkan ona do pạhilre khạṭi, ar ona tayom do sulukte perecʼgea; onare sahao daṛe ar mạ̃hirtetʼ tahena; ona do daya ar bhage kạmire perecʼtetʼge, bin digdhạ ar bin phạsiarawakʼge. 18Okoe sulukokʼ lạgitʼko kurumuṭukan onko do sulukte itạko ereda ar ona reakʼ jo do hoyokʼ kana dhorom jionge.
Santali Bible © Bangladesh Bible Society, 2021.