Jesaea 7
7
Immanuelakʼ cinhạ
1 #
2 Raj 16.5; 2 Bõs 28.5,6 Usiạren goṛomtetʼ, metakʼme Jothamren hopon Ahas do tinre Jihudạ disạmren raje hoyena unre Aramren Rathsin raj do Israelren raj Ramayelren hopon Pekoho soṅgekate Jerusalem upạrte lạṛhại lạgitʼe rakapʼ hecʼena, menkhan unkin do bạkin jitạu daṛeada.
2Unre Dạud bõsren hoṛko men ocoyena, “Aramren lạṛhại phạdko do gate lekate Ephrayimreko ḍera akana.” Niạ katha ańjomkate Ahas ar uniren hoṛkoakʼ mon do botorte hoete bir reakʼ dareko leka dalmalaoentakoa.
3Unre Probhu Isor do Jesaeae metadea, “Am ar amren hopon Sear-Jasub taben oḍok hijukʼte kicricʼ sobotʼ ghaṭ cetan gạḍiạ sãote mitʼakan dakʼ nala reakʼ muk ṭhen senkate Ahas sãote ńapamokʼ ben. 4Ar niạ katha ben metaea, ‘Sontor akan ar nirola monan tahenme ar alom botorokʼa. Dhũạkʼkan ona ṭhuṭkutʼ kuṭrạ ńelte, metakʼme Resin, Aramrenko ar Remaliạren hoponakʼ jaljalaokʼkan edre seṅgel ńelte mon do alom lạbṛukʼ ocoytama. 5Aramrenko, Ephrayem ar Remaliạren hopon do niạ menkate am maraome lạgitʼko soṛojontro kana, 6onko do Jihudạ upạrte lạṛhại lạgitʼko calakʼa ar ona dokholkate Tabeyel hopon do onḍenicʼ rajko benaoea. 7Menkhan iń Probhu Isor do noań meneda je, niạ lạṛhại do baṅ hoyokʼa, 8ente Aramren matha Damesek baṅ cetʼ ar Damesekren matha Resin raj baṅe cele kan? Turuigel mõṛẽ bochor bhitrite Ephrayem do nonkae marao utạrokʼa je, jạtrenko lekate uni do ar bae tahena. 9Ephrayimren matha Samariạ baṅ cetʼ kan, ar Samariạren matha Remaliạren hoponge baṅe celekan? Apeakʼ pạtiạure ṭehãḍ akanpe tahen khan ape do oka lekate hõ ohope teṅgo keṭecʼ daṛelena.’ ”
10Probhu Isor do arhõ Ahase metadea, 11“Am do amren Probhu Isor ṭhen menme jemon uni do mitʼṭecʼ cinhại udukʼam- ar ona cinhạ do patal puri khon serma hạbicʼ jãhãn ṭhạ̃iregeye udukʼam ma.”
12Menkhan Ahase menkeda, “Iń do ona bạń meneda, ar Probhu Isor hõ bạń biḍạuea.”
13Menkhan Jesaeae menkeda, “Dạud bõsren hoṛko, ańjompe. Manwawakʼ sombhuri biḍạu aṭkar do cetʼ baṅ ḍhera? Ape do cetʼ ińren Isorakʼ sombhuripe biḍạutaea? 14#Mat 1.23 Ona iạte Probhu Isor do acʼge ape ṭhen mitʼṭecʼ cinhại uduga. Ona do hoyokʼ kana, mitʼṭen kũạri kuṛi doe bhạrti hoṛmokʼa ar uniren do mitʼṭen koṛa gidrại hoyokʼtaea; ar uniyakʼ ńutum do Immanuel dohokʼtaea. 15-16Oka bạṛicʼakʼ kan ona phesṛao giḍikakʼ ar oka bhageakʼ ona bachao joṅ reakʼ oktere uni do dahe ar dumur rasae joma. Menkhan E Ahas raj, ona reakʼ okteko ạurirege okoeyem botorakin kan unkin banar rajakʼ disạm do ujạṛokʼa. 17Jihudạ ar Ephrayimakʼ begarokʼ din hilokʼ khon oka tisge baṅ hoyakan, Probhu Isor do am ar amren hoṛko ar amren apatakʼ bõsren hoṛko cetanre ona lekan mitʼṭen okteye ạguiya. Ar unre uni do Ạsurren raje ạguiyea.”
18Enhilokʼ Probhu Isor do Misor disạm reakʼ sạṅgiń gaḍako khon rõ ar Ạsur disạm khon dumurkoe gol ạgukoa. 19Onko do hecʼkate buru dhasnakore, buru paṛakʼkore, jạnum jhạuạkore ar ṭạnḍikoreko basakʼa. 20Enhilokʼ Probhu Isor do apeakʼ bohokʼ reakʼ upʼ, jaṅga reakʼ upʼ ar gocoko hoyo ocoytape lạgitʼ Phurạt gaḍa hanasa khon mitʼṭecʼ holatʼ, metakʼme Ạsur raje bhaṛa ạguiyea. 21-22Enhilokʼ jãhãege mitʼṭen gại se barea merome dohokin onko do nunạkʼko toako emokʼa, uni do dahe hõe jom daṛeakʼa. Ar disạmre okoeko tahen onko sanamkoge dahe ar dumur rasako joma. 23Enhilokʼ okako jaegare gelbar keji rupạ reakʼ dam mitʼ hajar goṭecʼ darkha nạ̃ṛĩ tahẽkan onḍe do eken jạnum ar rạṅgạinige tahena. 24Ar hoṛko do akʼ sarante onḍeko calakʼa, ente disạm do jạnum ar rạṅgạinite perejokʼa. 25Ar oka burure kuḍiteko casetʼ tahẽkan onḍe do jạnum botorte ar bako calakʼa; ona do ḍaṅgra ar bhiḍiko lạgitʼ ạtiń ṭạnḍiko hoyokʼa.
Santali Bible © Bangladesh Bible Society, 2021.