Jesaea 64
64
1Serma oṛecʼkate baṛem pheḍ hecʼlen khan! Ar am samaṅre buruko dalmalaolen khan! 2Seṅgel cetʼleka jhurikoe jol ocoyte dakʼe heḍecʼ ocoy onkage am hõ pheḍ hijukʼte amren bạiriko ṭhen sodorokʼme, jemon jạt jạtrenko am samaṅre botorteko thar tharaokʼ. 3Ar oka bale as akan onkan botorakʼkom kạmiletʼre am dom pheḍ hecʼena ar buruko do am samaṅre daldalaolena. 4#1 Kor 2.9 Ona sedaeakʼ piṛhi khon am chaḍa ar jãhãe Isorakʼ katha do okoe hõ luturte bale ańjom akada, ar mẽtʼte hõ bale ńel akadea, one uni do acʼ ńeńelko lạgitʼe kạmiyetʼkan. 5Okoe do Isorakʼ sana leka kạmi lạgitʼ rạskạko ńametʼkan ar amko disạyetʼmete amakʼ horteko calakʼkan onko goṛowako lạgitʼ am dom hijukʼ kana; menkhan ale dole kại akada ar ḍher din khon inạ dosarege menakʼlete ale cetanre ạḍim raṅgao akana. Enḍekhan cekate bańcao dole ńama? 6Ale sanamkoge besapha hoṛko lekale hoyakana ar aleakʼ sanam dhorom kạmi do mạilạ kicricʼ leka hoyakantalea. Ale sanamkoge sakam lekale tolmocʼ akana, aleakʼ kại do hoe lekageye oṭaṅ idiyetʼlea. 7Am do okoe hõ bako hohowam kana se nehõram lạgitʼ am ṭhen do okoe hõ bako hijukʼkana, ente ale dom dea giḍiakatʼlea ar aleakʼ ghạṭko iạte jarkharokʼ lạgitʼem aṛakʼ akatʼlea.
8Enre hõ, E Probhu Isor, am do aleren Baba kanam. Ale do hasa kanale, ar am dom kuṅkạl kana; ale sanamkoge amakʼ ti reakʼ kạmiko kanale. 9E Probhu Isor, alom edre sạṅgińokʼa; ar aleakʼ ghạṭko jaejug hạbicʼ alom disạ dohoytalea. Alele nehõram kana, ale secʼ baṛe beṅgedme, ente ale sanamkoge amren hoṛ kanale. 10Amakʼ sonot nagrahako do hahaṅkar ṭoṭha hoyakana; Sion reakʼ dosa hõ onkage hoyakana, hẽ, Jerusalem hõ ujạṛ akana. 11Aleren hapṛamko okare amko sarhaoetʼme tahẽkan aleakʼ ona sonot ar ṭhonokanakʼ koejoṅ oṛakʼ do seṅgelte ḍahao marao akana ar amem kusiyakʼkan tahẽkanakʼko do jarkhar akana. 12E Probhu Isor, niạko tayom hõ cetʼ am do duṛupʼ hape akanem tahena? Am do cetʼ hape akan tahente ãṭte sạjạiyem emalea?
Santali Bible © Bangladesh Bible Society, 2021.