Jesaea 40
40
Isorren hoṛko lạgitʼ jiwi raṛecʼ
1Aperen Isorre meneda, “Ińren hoṛko jiwi raṛecʼ emakope,
Jiwi raṛecʼ emakope.
2Jerusalemren hoṛko sãote mạ̃hir salakʼ katha roṛpe,
ar onko ṭhen niạ katha lại sodorpe,
onkoakʼ duk ar kosṭo do caba akana,
onkoakʼ ghạṭko do ikạ akantakoa,
onkoakʼ sanam kạiko reakʼ jo do
Probhu Isor ṭhen khon purạgeko ńamakada.”
3 #
Mat 3.3; Mrk 1.3; Jhn 1.23 #
Luk 3.4-6
Mitʼṭecʼ ãṛaṅ doe hohokana
“Hahaṅkarre Probhu Isor reakʼ hor tearkataepe;
khaṅkarre aboren Isor lạgitʼ
mitʼṭecʼ ḍahar mitʼsãope.
4Mitʼke mitʼ buru-nala do dhapaokʼa,
buru ḍuṅgriko do copodokʼa,
harcatʼ hurcutʼakʼ do mitʼsãokʼa,
ar khoedakʼ lopakʼakʼ do bilạn ṭạnḍikʼa.
5Unre Probhu Isorakʼ ṭhonokʼ sodorokʼa,
ar manwa jạtren sanamko do mitʼte uniko ńela;
Probhu Isorge noako katha doe meneda.”
6 #
Jak 1.10,11; 1 Pat 1.24,25 Mitʼ hoṛakʼ aṛaṅe meneda, “Hohoeme”
Ińiń menkeda, ‘Cetʼ menteń hohoea?”
“Manwako do ghãs leka kanako,
onkoakʼ ṭhonoktetʼ do ṭạnḍi reakʼ bahako lekage.
7Ghãs do rohoṛokʼa ar baha hõ ńurokʼa,
Probhu Isorakʼ sãhetʼ onareye oṅlere.
Sạrige manwa do ghãs leka kanako.
8Ghãs do rohoṛokʼa ar baha do ńurokʼa
menkhan aboren Probhu Isorakʼ katha do jaejug tahẽ akan tahenkana.”
9E Sion, bhage sombat jạkʼhiricʼ,
am do usul burute rakapʼ calakʼme.
E Jerusalem, bhage sombat jạkʼhiricʼ,
am do ãṭ aṛaṅte hohoeme,
ar alom botorokʼa;
Jihudạ reakʼ nagraharen hoṛko metakom,
“Hạni ńelepe aperen Isor!”
10 #
Jes 62.11; Sod 22.12 Ńelpe, Probhu Isor do daṛe salakʼe hijukʼkana,
uniyakʼ daṛeanakʼ ti do raje calaoetʼtaea.
Ńelpe, kuṛại do uni sãorege menakʼa,
ar uniyakʼ hala ruạṛ do uni samaṅrege.
11 #
Jeh 3.15; Jhn 10.11 Uni do gukʼpiko leka acʼren bhiḍikoe gupikoa,
bhiḍi hoponkoe hobor samṭaokoa
ar hoborkateye idikoa,
hopon menakʼkotako eṅga do
bại bạiteye sotokʼ idikoa.
12Okoe dakʼko do acʼakʼ loṭteye soṅakada
ar sermako do okoe acʼakʼ bitạteye jokha akada?
Dhạrti reakʼ dhuṛi do ạṛire okoeye sahopʼ ocoakada
ar buru ar ḍuṅgriko hõ okoe tulạteye tulạ akada?
13 #
Rom 11.34; 1 Kor 2.16 Probhu Isorren jiu do okoeye calao akadea
ar uniren sosolhayicʼ lekate do okoeye solha akadea?
14Buj ńam lạgitʼ Probhu Isor do okoeyakʼ solhae hatao akada,
ar ṭhik hor do okoe uniye udukʼ akawadea?
Okoe uni do ạkile cetʼ akawadea
se buj bicạr reakʼ hore udukʼ akawadea?
15Ńelpe, boṅgan hoṛ jạtrenko do kanḍa reakʼ mitʼ ṭhopʼ dakʼ lekanako;
onko do tulạ reakʼ dhuṛi baraggeko lekhakʼ kana.
Jalapuri reakʼ ṭạpuko do lemeń dhuṛi lekae tul rakapʼeda.
16Lebanon reakʼ kaṭ do sahan lạgitʼ baṅ kulạukʼa
ar onaren janwarko hõ jeredokʼ samaṅokʼakʼ lạgitʼ bako kulạukʼa.
17Jạt jạtrenko do uni samaṅre cele hõko baṅkana;
onko do celege bae moneyetʼkoa;
uni ṭhen do ạuṛiyakʼgeko lekhakʼ kana.
18 #
Apos 17.29
Enḍekhan okoe tulucʼ Isor dope jurikea?
Ar cetʼ sãotepe jurikea?
19Kạrigol do chãchre goṛhon muṭhạne duleda;
ar sonhar do sonate onae toleda
ar ona lạgitʼ rupạ sikṛikoe benaoeda.
20Reṅgecʼ hoṛ do boṅga muṭhạn benao lạgitʼ
baṅ seakʼ kaṭgeye bachao joṅa.
Oka baṅ ḍikạ ḍaketʼ onkan boṅga muṭhạn benao lạgitʼ
uni do gạkhuṛ kạrigolgeye sendrayea.
21Ape do cetʼ bape baḍaea?
Ape do cetʼ bape ańjomeda?
Pạhil khonge cetʼ onako katha do baṅ lại akawatʼpea?
Dhạrti rehedokʼ khonge cetʼ bape bujhạu akada?
22Prithimi cetan reakʼ sermare
unige siṅghạsonreye duṛupʼ akana,
dhạrtiren hoṛko do sosrocʼ leka kanako.
Orwal leka uni do sermae pasnao akada,
tahen lạgitʼ tạmbu leka onae ṭaṅgao akada.
23Uni do rapajko cetat hõ bae hoeocoyetʼkoa
ar disạm cakʼlaoko hõ ạuṛiyakʼe lekhayetʼkoa.
24Enegeko rohoeyokʼ kana,
ar enegeko erogokʼ kana
ar enegeko rehedokʼ kana,
uni do onko cetanreye oṅeda ar onko doko tolmojokʼ kana;
mitʼṭecʼ hoe bharḍo leka uni doe oṭaṅ idiyetʼkoa.
25Uni sonoticʼe meneda,
“Okoe tulucʼpe juriyińa?
Ar okoe iń soman doe hoyokʼa?”
26Coṭ secʼ beṅgetʼ rakabpe ar ńelpe;
noako do okoeye sirjạu akada?
Unige ipilko do mimitʼ mimitʼteye oḍoketʼkoa;
unige onko mimitʼko ńutum ńumkateye hohowako kana.
Uniyakʼ napṛakʼtetʼ ar maraṅ daṛete
onkoren mitʼṭen hõ bako adokʼ kana.
27E Jakob, cedakʼem meneda,
E Israel, cedakʼem lạliseda,
“Ińakʼ hor do Probhu ṭhen khon danaṅ akana
ińakʼ hok reakʼ bicạr ńam lạgitʼ
ińren Isor do bae moneyạń kana?”
28Aben do cetʼ baben baḍaea?
Aben do cetʼ baben ańjomakada?
Probhu Isor okoe doe jaejugren Isorkan,
okoe do dhạrti reakʼ mucạtʼ simạko hõe benao akatʼ,
uni do bae laṅgakʼa, ar bae nijorokʼa,
uniyakʼ ạkil reakʼ khạndritetʼ do celehõ bako jokha daṛeakʼa.
29Uni do laṅga akankoe daṛe ocoyetʼkoa
ar nijorko do jore emako kana.
30Juạnko hõ laṅga arko thakao cabakʼ kana
ar juạn koṛako hõ laṅgateko gujukʼ kana,
31menkhan Probhu Isorre okoe asko dohoyetʼ
onko do nãwã daṛeko ńama.
Pajhaṛ cẽṛẽ leka onko do phạ̃kṛạ̃kʼ hotete coṭteko uḍạukʼa;
onko doko dạṛ idiya ar bako laṅgakʼa,
taṛamako ar bako nijorokʼa.
Santali Bible © Bangladesh Bible Society, 2021.