Jesaea 32
32
Dhoromren raj
1Ńelpe, mitʼṭen raj do dhoromte raje calaoa ar disạm cakʼlaoko do hok reakʼko bicạra. 2Onkoren mimitʼko do birbão hoe khon okokʼ jaega ar hoe dakʼ khon danaṅokʼ jaegako hoyokʼa, ar khaṅgoṭ jaegare do ạtukʼ dakʼ lekako hoyokʼa, ar loraokʼkan disạmre do mitʼṭecʼ dhiri reakʼ umul lekankoge. 3Unre okoeko ńeńel onkoakʼ mẽtʼ do baṅ jạpidokʼtakoa, ar okoeko ańjom onko do ańjomtegeko tahena. 4Ạuṛahakoakʼ mon do bhage bicạre ńamjoṅa, ar thotṛa hoṛ do pusṭạute kathako roṛa. 5Bebujicʼ hoṛ do bhodro bae ńumogokʼa, ar bodmas hoṛ hõ manoticʼ mente ar bae lekhakʼa, 6ente bebujicʼ do bebuj kathageye roṛa ar uniyakʼ mon do dusṭạmiyakʼe ponthaya. Uni do hirkhạwakʼkoe kạmiya ar Probhu Isor reaṅ henosta kathakoe roṛa. Uni doe nonkaea jemon reṅgecʼ edekanicʼ hoṛ do jomakʼ aloe ńam ar tetaṅ edekanicʼ hõ dakʼ aloe ńam. 7Bodmaskoakʼ kạmi do bạṛicʼgetakoa; nacarkoakʼ nehõr hok reakʼ kanrehõ onko do eṛe kathate maraoko lạgitʼ bạṛicʼakʼ phundiko aṭaoa. 8Menkhan bhage hoṛ do bhageakʼe goṭaea ar acʼakʼ bhage kạmirege lạgiạ paṛao akane tahena.
Jerusalemren maejiuko
9E nirdạndi tahenkan maejiuko, ińakʼ katha baṛe bataope. E khạtir monan kuṛiko, ińakʼ kathako luturakʼtińpe. 10E khạtir monan kuṛiko, mitʼ bochor khon thoṛa bạ̃ṛti okte hoylen khange ape do botortepe thar tharaokʼa, ente darkha nạ̃ṛĩ do nosṭokʼa, ar ona reakʼ jo bahakʼ okte do ar baṅ hijukʼa. 11E nirdạndi tahenkan maejiuko ar khạtir monan kuṛiko, ape do botortepe thar tharaokʼa; ape do apeakʼ kicricʼko bhạnduṛkate ḍanḍare gõṛẽ kicricʼ paṭhe joṅpe. 12Bhage bhage khet baṛge ar jote perecʼ darkha nạ̃ṛĩ lạgitʼ apeakʼ koṛam ceṭagtape. 13Jạnum ar rạṅgạinite perecʼ ińren hoṛkoakʼ disạm lạgitʼ koṛam ceṭagtape. Hẽ rạskạ ar hulạste perecʼ oṛakʼ duạr ar andoṛte perecʼ nagraha lạgitʼ koṛam ceṭagtape. 14-15Tin hạbicʼ cetan khon sonot jiu abore bae dul ocokʼ ar hahaṅkarre bhage jumi ar bhage jumi do bir gajaṛ leka baṅ hoyokʼ, unhạbicʼ gaṛre ar rão rãokʼkan nagrahare do celege bako tahena, ar buru ar pahra buruńj do dander leka hoyokʼa. Ar ona do bir gadhakoakʼ rạskạjoṅ reakʼ ṭhạ̃i ar janwarkoakʼ ạtiń jaegakoge hoyokʼa. 16Ona tayom hahaṅkarre do hok reakʼ bicạr ar jo bahakʼkan bagwanre do dhoromge girobasokʼa. 17Ar dhorom do suluk reakʼ jo hoyokʼa, ar ona iạte jaejug lạgitʼ khạtirjoma ar bhorsage hijukʼa. 18Ińren hoṛko do sulukte perecʼ jaegare, khạtirjomako tahen jaegare ar nirdạndi tahen jaegare girobas akanko tahena. 19Arelte bir do chaka chunokʼa ar nagraha do otre mitʼ são utạrokʼa. 20Bhạgangeape ape do, one okoe dakʼ aṛe aṛere itạpe eretʼkan ar aperen ḍaṅgra ar gadhako nirdạndi ạtiń lạgitʼpe aṛakʼkako kan.
Santali Bible © Bangladesh Bible Society, 2021.