Jesaea 26
26
Sarhao sereń
1Enhilokʼ Jihudạ disạmre niạ sereńko sereńa:
Jihudạ disạmre kajak nagraha menakʼ tabona;
Isorakʼ babańcaoge hoyokʼa ona reakʼ pạcri ar gaṛko do.
2Ape do phaṭok-duạrko jhijpe
jemon dhorom ar pạtiạrko dohoyetʼ jạtrenkoko bolo daṛeakʼ.
3Okoeyakʼ mon amre tahẽ uricʼ akan
uni do purạ suluktem dohoyedekana,
ente uni do am cetanreye bhorsakʼ kana.
4Ape do Probhu Isorre jaejug bhorsa akan tahenpe,
ente Probhu, Isor do jaejugren asray buru kanae.
5Okoe usul ṭhạ̃ireko girobasokʼ kan onko doe copotʼ akatʼkoa;
uni do ona cetan nagrahakoe copotʼ ocoyeda.
Ona do ot hạbicʼgeye copotʼeda, ar dhuṛireye milạueda.
6Santaokʼko ar reṅgecʼko do jaṅgate onako lebetʼ gańjaoa.
7Isor botorae hoṛkoakʼ hor do somangea;
E dhoromicʼ, am do Isor botoraekoakʼ horem somaneda.
8Hẽ, Probhu Isor, ale do amakʼ dhorom hortele taṛametʼkante
am koyokʼ horre menakʼlea;
aleakʼ khojokʼakʼ do amakʼ kạmi hotete sodorokʼme baṛe.
9Ińakʼ jiwi do ńindạ am lạgitʼe rakʼeda.
ińren jiu do am lạgitʼe ahkaokʼ kana.
Dhạrtire amakʼ hok bicạr hecʼlenre
prithimiren hoṛ do dhorom reakʼ cecetʼakʼ ko ńama.
10Bedhorom hoṛko daya udukʼakore hõ
onko do dhorom bako ceda;
hokakʼ disạmre onko do dusṭạmiko kạmiya
ar Probhu Isorakʼ mạhima hõ bako aṅgoca.
11 #
Ibr 10.27
E Probhu Isor, amakʼ ti do coṭte tul akan tahen kana,
menkhan onko do ona bako ńeleda.
Amren hoṛko lạgitʼ amakʼ ãṭ baṛeko
ńelma arko lajaokʼma;
ar seṅgel do amren bạirikoe jom cabakoma.
12E Probhu Isor, suluk baṛe teṅgo aleme;
ente okale ceka daṛeakatʼ
ona sanamakʼge am do ale lạgitʼem kạmi akatʼa.
13E Probhu, aleren Isor,
am chaḍa eṭakʼ Probhuko hõ ale cetanre mạlikiko calaoleda,
menkhan ale do eken amgele aṅgocetʼmea.
14Gocʼ akanko do ar bako jiwedokʼa;
onkoren jiu do ar bako beretʼa.
Onko do sạjạikatem meṭao giḍi akatʼako;
onkoakʼ disạ hõm marao akatʼtakoa.
15E Probhu Isor, am do onko jạtrenkom baḍhao akatʼkoa;
ar onko jạtrenkom baḍhao akatʼkote sarhaoem ńamakada;
am do disạm reakʼ sanam simạkom phaelao akada.
16E Probhu Isor, kosṭokʼre onko do amko ńam baṛaketʼmea;
ar amakʼ sạjại paṛaoatʼkore
onko do nehõrate khae khoe koejoṅko phuṭạuatʼmea.
17Bhạrti hoṛmo maejiu do janame oktere
cetʼleka bedonteko eṛseń toṛseń baṛae,
E Probhu Isor, ale hõ am samaṅre onkagele hoyakana.
18Ale dole bhạrti hoṛmo akana, ar bedontele eṛseń toṛseń baṛaekana,
menkhan ale do hoegele janam akada.
Ar ale hotete disạm do baṅ rukhiyạlena,
dhạrtiren hoṛ hõ ale hotete jion do bako ńamleda.
19Menkhan amren gocʼakan hoṛ doko bańcaokʼa;
onkoakʼ hoṛmo do jiwetʼ ruạṛokʼtakoa.
Ape okoe do dhuṛirepe girobasokʼ kan,
ape do dela ebhenokʼpe ar rạskạte andoṛpe.
Setakʼ reakʼ sisir dakʼ cetʼleka dhạrtiye purṭhạ ocoyetʼ
onkage am do gocʼko jiwiyem danakoa.
20E ińren hoṛko, do calakʼpe, apeakʼ kandhate bolokʼ bayokʼpe ar duạr sińkakʼpe; ar thoṛa ghạṛicʼ lạgitʼ oko hataṛokʼpe, one khĩs ạuri cabakʼ hạbicʼ. 21Ńelpe, dhạrtiren hoṛko kại reakʼ sạjại emako lạgitʼ Probhu Isor do acʼakʼ tahen ṭhạ̃i khone oḍok hijukʼ kana. Dhạrti do acʼre joro akan mãyãme sodora; ar acʼre khũn akanko do bae dapalkoa.
Santali Bible © Bangladesh Bible Society, 2021.