Jesaea 22
22
Jerusalem reaṅ katha
1Dorson reakʼ buru-nala babotre Probhu Isorakʼ katha do nonka:
Am do ńitokʼem ceka akante, amren hoṛko do chat cetanteko rakapʼ kana? 2E gulmalte perecʼ nagraha, E kạumạu ar andoṛetʼkan nagraha, amren gocʼ hoṛko ma tarwaṛete se lạṛhạite ma bacoko gocʼ akan. 3Amren mukhiyạko do jotoge mitʼ domteko dạṛ pạnḍucʼ akada; ar akʼ begortege onko doko sapʼ ocoakana. Ar amre okoeko sapʼ ocolen, onko do sạṅgińteko dạṛletʼre hõ jotoge mitʼ domteko bondi idi ocoakana. 4Ona iạteń menkeda, “Iń ṭhen khon calakʼpe; ar hũk hũk rakʼ ocowạńpe. Ińren hoṛko marao akante jiwi raṛecʼtiń lạgitʼ do alope kurumuṭuiya.”
5Phạdkoren Probhu Isor ṭhen khon dorson reakʼ buru nalare do heṛan botorge hoyakana, onḍe do ḍamaḍol ar lebetʼ gańjao ar andmandao reakʼ dinge hecʼakana. Ona do pạcri rạputʼ giḍikakʼ ar buru-nala ṭhen rakʼjoṅ reakʼ mitʼṭecʼ din kangea. 6Elamrenko do sar ṭhoṅgako gugukeda; rãt gạḍi ar aswarikoantege. Ar Kirrenko do ḍhalanteko sapṛao akana. 7Amakʼ bachao akatʼ buru-nala do rãt gạḍite perecʼ akana, ar nagraha reakʼ phaṭok duạrkore do aswarikoko sapṛao dohoakana. 8Jihudạ reakʼ rurukhyiạ reakʼ do sạṅgiń ocoakana.
Enhilokʼ ape do bir oṛakʼ reakʼ khanḍa bhanḍa secʼpe beṅgetʼkeda. 9Ape do Dạud nagraha reakʼ bhitkore aema paṛakʼkope ńelkeda ar latar reakʼ pukhrire dakʼpe jarwakeda. 10Ape do Jerusalem reakʼ oṛakʼ duạrpe lekhakeda ar pạcri benao kajak lạgitʼ onakope rạputʼkeda. 11Mare pukhri reakʼ dakʼ dohoy lạgitʼte ape do banar pạcrikin talare mitʼṭecʼ dakʼ dohoy lạgitʼ pukhripe benaokeda. Menkhan okoe onae hoyocoletʼ uni secʼ do bape beṅgetʼleda, ar ḍher din lahare okoe niạko reakʼe goṭaletʼ uni hõ bape botoradea.
12Enhilokʼ phạdkoren Probhu Isor do rakʼ ar homor lạgitʼ, bohokʼ reakʼ upʼ hoyo poṭortape lạgitʼ ar gõṛẽ kicricʼ horokʼ lạgitʼe hohowatʼpe tahẽkana. 13#1 Kor 15.32 Menkhan ńelpe, ape do onḍe ḍaṅgra ar bheḍape guretʼkoa, jel ar darkha rasape ńũiyetʼte rạskạ arpe hulạsokʼ kana. Arpe meneda, “Dela, bon jom-ńũwanrege, ente gapa do bon gujukʼa.”
14Phạdkoren Probhu Isor do niạ katha iń ṭhene sodor akada, “Apepe gujukʼre hõ niạ kại do baṅ ikạkʼtapea. Iń phạdkoren Probhu Isorge niạ kathań meneda.”
15Phạdkoren Probhu Isorre meneda, “Am do raj ar bhanḍariko ṭhen calakʼme, ar raj oṛakʼ reakʼ dạyike ńamakatʼ Sebna ṭhen senkate metaeme, 16‘nonḍe do cetʼem ceka kana? Ar nonḍe amakʼ topa lae lạgitʼ, usul jaegare amakʼ topa ṭhạ̃i ṭhik lạgitʼ, ar buru kholaokate jirạukʼ jaega benao lạgitʼ ạidạri do okoeye em akatʼmea?
17Sontorokʼme, E daṛean hoṛ, Probhu Isor do sapʼkateye lebda giḍime lạgidokʼ kana. 18Uni do beṛhaete ghiriạ ạcurkate mitʼṭecʼ maraṅ okocʼ disạmreye lebda giḍikama. Onḍe dom gujukʼa, ar amakʼ napae napae rãt gạḍiko do doho akange tahena. Am do amren mạlikakʼ raj oṛakʼem besonot akada. 19Iń do amakʼ hudạ khoniń ocokʼmea; ar amakʼ ṭhạ̃i khoniń ḍheka ńurmea.
20Enhilokʼ ińren guti Hilkiạren hopon Eliakim iń hoho ạguiyea. 21Ar amakʼ kicricʼ iń horokʼaea ar uniyakʼ ḍanḍare amakʼ ḍanḍa totlakʼ iń tolaea ar amakʼ kạmi reakʼ bhar do unireń jimạkakʼa. Uni do Jerusalem ar Jihudạreko girobasokʼ kan bõskoren go baba lekae hoyokʼa. 22#Sod 3.7 Uniyakʼ tarenre Dạud bõs reakʼ choṛaniń dohoaea; uni do onae jhija ar celege ona do bako siń daṛeakʼa, ar uniye sińlere ona do cele hõ bako jhicʼ daṛeakʼa. 23Mitʼṭecʼ keṭecʼ jaegare khunṭi leka uni doń bitʼkaea, uni do apatakʼ bõs lạgitʼ mitʼṭecʼ ṭhonok reakʼ siṅghạsone hoyokʼa. 24Uniyakʼ bõsrenkoakʼ sanam bojha do uniyakʼ tarenre ladekʼa. Joto lekan kạṭicʼ lạtu bhajanko cetʼleka uniyakʼ bharreko akakakʼ onkage uniren gidrạko ar bõsko hõ uniyakʼ tarenreko akakokʼa. 25Okaṭakʼ khunṭi do kajak jaegareko kuṭạm jalatʼletʼ enhilokʼ ona do bocʼ hijukʼa; ona do makʼ kuṭrạkʼa ar ona cetanre okako aka tahẽkan onako do getʼ ńur ocokʼa.’ ” Noa do phạdkoren Probhu Isorakʼ katha kana. Niạko hoyokʼa, ente Probhu Isor do acʼge onae meneda.
Santali Bible © Bangladesh Bible Society, 2021.