Jesaea 19
19
Isor do Misorren koe sạjạikoa
1 #
Jir 46.2-26; Jeh 29.1—32.32 Misor disạm babotre Probhu Isorakʼ katha do nonka kana:
Ńelpe, Probhu Isor do mitʼṭecʼ coṭkar rimilte Misor disạmteye hijukʼkana. Uni samaṅre Misorren boṅga murhutʼko doko thar tharaokʼa, ar Misorren hoṛ doko hae nisạsokʼa.
2Probhu Isore meneda, “Iń do Misorren hoṛkoge Misorren hoṛko upạrteń uskurkoa; onate boeha do boeha upạrte, aḍepaseren hoṛ do aḍepaseren hoṛko upạrte, nagraharen hoṛ do nagraharen hoṛko upạrte, ar rajosṭiren hoṛ do rajosṭiren hoṛko upạrteko lạṛhạiya. 3Misorrenko doko hae nisạsokʼa, ar iń do onkoakʼ goṭawakʼko bạń jo baha ocoytakoa. Ente onko do boṅga murhutʼko ar gocʼ hoṛ ḍakʼkaoko, ar jan guruko ṭhen khon solhako hataoeda. 4Iń do mitʼṭen kurmutạha mạlikakʼ tire Misorrenkoń jimạkoa; mitʼṭen botoranicʼ raj do onko cetanre raje calaoa.” Ar noa kangea phạdkoren Probhu Isorakʼ katha do.
5Nil gaḍa reakʼ dakʼ do ańjetʼ rohoṛokʼa, ar gaḍako do rohoṛte paṛagokʼa. 6Soḍokʼko do seakʼa; Misor reakʼ nalako do ạdhikʼa ar ańjedokʼa; pạṭiol ar chuchi do goso cabakʼa; 7Nil gaḍa aṛe reakʼ sanam dareko hõ rohoṛokʼa. Gaḍa aṛe reakʼ itạ rohoe khetko hõ rohoṛte paṛagokʼa; carako hõ tolmojokʼte jhãorakʼa, ar cetʼge baṅ tahena. 8Jạilạko hõko hae haeyokʼa ar nil gaḍare okoe do bạ̃ṛsiko oḍao onko doko homor halaṅa. Ar okoe dakʼre jhạliko caḍoe onko doko nijorokʼa. 9Ar okoe do mĩhĩ mushnạ sutạmko benaoetʼkan ar okoe do mĩhĩ kicricʼko tearetʼkan onko doko as chuṭạukʼa. 10Disạmren kham khunṭi doko kaca kucạkʼa ar din mujuriko do jotoge jiwire dukko ńama.
11Soanren cetan hudạren kạmiyạko doko bebujgea; Pharaoren ạkilan sosolhako do ạuṛiyakʼ solhako emokʼkana. Ape do cekate Pharaope men daṛeae kana, “Iń do ạkilan hoṛko modren mitʼ hoṛ ar sedaeren raj bõsren kạnạń mente?” 12Amren ạkilan hoṛ ńitokʼ do okare menakʼkoa? Misor upạrte phạdkoren Probhu Isor okae ṭhik dohoakatʼ ona do apnarteko baḍaema ar amko metam ma. 13Soanren cetan hudạren kạmiyạko do bebuj lekako hoyakana, ar Memphisren mukhiyạko doko ạnḍicʼakana; ar Misorren khũṭkoren mathako do bạṛicʼ horteko sen akana. 14Probhu Isor do onko talare ạulạ jhạulại hoyocoakada, onate bubulicʼ cetʼleka acʼakʼ becʼ cetanreye konḍe manḍekʼkan onkage onko do jotowakʼ kạmire Misorko konḍe manḍe ocoyedea. 15Misor talare bohokʼ se canḍbol, khijur ḍạr se pạṭiol, okoe hõ cetʼge bako ceka daṛeakʼa.
Misorrenko do Probhu Isorko sewawaea
16Enhilokʼ Misorren hoṛko do maejiu lekako hoyokʼa. Onko upạrte phạdkoren Probhu Isor do tiye rakabtaea ar ona ńelte onko do botorteko thar tharaokʼa. 17Ar Jihudạ disạm do Misorrenko lạgitʼ mitʼṭecʼ torasge hoyokʼa. Phạdkoren Probhu Isor do onko upạrte oka cekae lạgitʼe ṭhik akawan ona iạte onko doko botorokʼa.
18Enhilokʼ Misor reakʼ mõṛẽ goṭecʼ nagraha do Kanan reakʼ pạrsiteko roṛa ar phạdkoren Probhu Isorre pạtiạrko tahena menteko kiriyạkʼa. Ar ona nagrahako modre mitʼṭecʼ do siń cando reakʼ nagrahako metakʼa.
19Enhilokʼ Misor disạm talare Probhu Isor ńutumte mitʼṭecʼ pinḍ ar ona reakʼ simạnare mitʼṭecʼ tham khunṭi tahena. 20Ar noage hoyokʼa Misor disạmre phạdkoren Probhu Isor ńutumte mitʼṭecʼ cinhạ ar goha do. Onkoakʼ santao iạte onko do tinre Probhu Isor ṭhenko raga unre onko ṭhen mitʼṭen babańcaoicʼ ar rurukhiyạicʼe kolea ar uni do onkoe bańcaokoa. 21Nonkate Probhu Isor do Misorrenko ṭhen apnartetʼe sodorokʼa ar enhilokʼ onko do Probhu Isorko aṅgocea. Onko do janwarko samaṅkoa ar phosolko samaṅa arko sewawaea ar Probhu Isor ṭhen manotakʼko purạutakoa. 22Ar Probhu Isor do Misorren hoṛkoe ńẽtʼkoa; uni doe ńẽtʼkoa ar boge hõe bogekoa. Onko do Probhu Isor secʼko ạcurokʼa, ar uni do onkoakʼ nehõre ańjomtakoa are bogekoa.
23Enhilokʼ Misor khon Ạsur hạbicʼ do mitʼṭecʼ raj ḍaharge hoyokʼa. Ạsurrenko do Misorte ar Misorren do Ạsurteko calao hijukʼa. Unre Ạsurren ar Misorrenko do mitʼ soṅgeteko dewa sewaea. 24Enhilokʼ Israel do Misor ar Ạsur tulucʼ tesaricʼe lekhakʼa ar dhạrtire onko do bhorankoko hoyokʼa. 25Phạdkoren Probhu Isor do niạ menteye bhorakoa, “Bhoranko hoyokʼma Misorrenko, ińren hoṛkoge, Ạsurrenko do ińakʼ ti reakʼ kạmige; ar Israelrenko do ińakʼ ạidạrirenkoge”
Santali Bible © Bangladesh Bible Society, 2021.