Ester 9
9
Jihudikoakʼ jitạukʼ
1Adar cando reakʼ, metakʼme gelbar cando reakʼ gelpeakʼ dinre rajakʼ hukum kạmi purạukʼ reakʼ okte do seṭerena. Enhilokʼ Jihudikoren bạiriko do onko domaoko reakʼko asokʼkan tahẽkana, menkhan ghoṭna do ulṭạuena. Okoe do Jihudikoko hirkhạwako kan tahẽkan onkoge Jihudi ṭhenko jaṅga latar ocoyena. 2Okoe do Jihudiko marao utạrkoko menletʼ Jihudiko do onko akromonko lạgitʼ Ahasberos rajakʼ sanam tabe disạmre nij nij nagrahareko jarwayena. Ar onko upạrte celege bako teṅgo daṛeada, ente eṭakʼ sanam jạtren hoṛko do onkoko botorako kan tahẽkana. 3Tabe disạmren sanam cetan hudạren kạmiyạko, disạmren cakʼlaoko ar rajren eṭakʼ eṭakʼ kạmiyạko do Jihudikoko goṛowatʼkoa, ente onko do Mordekaiko botoradea. 4Mordekai do raj doṅgolre maraṅicʼe hoyena; uniyakʼ ńutum do sanam tabe disạmkore pasnao idiyena ar dinke dine daṛe idiyena.
5Ar Jihudiko do akoren bạiriko gogocʼko ehopʼena ar okoe onkoko hirkhạwako kan tahẽkan onko cetanre do akoakʼ kusi lekako kạmikeda. 6-10Susan gaṛre onko do mõṛẽsae hoṛko gocʼketʼkoa. Onko do Jihudạren bạiri Hamadatharen hopon Hamanren gel goṭen hoponko gocʼketʼkoa. Onkoakʼ ńutum do hoyokʼkana Parsandatha, Dalphon, Aspatha, Poratha, Adalia, Aridatha, Parmasta, Arisai, Aridai ar Baisetha. Menkhan onko do luṭakʼ jinisre ti bako lagaoleda. 11Susan gaṛre okoeko gocʼ ocolen onkoakʼ lekha do enhilokʼge rajko baḍae ocokedea. 12Raj do unre Ester rạniye metadea, “Susan gaṛre Jihudiko do mõṛẽsae hoṛ ar Hamanren gel goṭen hoponko gocʼ akatʼkoa. Rajakʼ sarecʼ tabe disạmkore baṅ cetʼko cekawakatʼ. Ńitokʼ amakʼ ńehõr joṅakʼ do cetʼ tam? Ńitʼhõ jãhãnakʼgem khoj onagem emocokʼa. Ar onkage hoyokʼa.”
13Ester rạniye roṛ ruạṛkeda, “Maharaj bhageye bujhạuetʼ khan tobe teheń leka gapa hõ Susanren Jihudiko jemon hukumko ńam; ar Hamanren gel goṭen hopon doko pạsi ocokʼma.”
14Raj do ona hoyokʼ reakʼgeye hukumkeda. Susanre rajakʼ ona hukum do lại jạhirena ar hoṛko do Hamanren gel goṭen hoponko pạsiketʼkoa. 15Susanren Jihudiko do Adar cando reakʼ gelponakʼ dinre mitʼ ṭhenko jarwayena ar onḍe do pesae hoṛko gocʼketʼkoa, menkhan jãhãn luṭakʼ jinis do bako hataoleda.
16Inạko dinre rajakʼ tabe disạmren sarecʼ Jihudiko hõ akoakʼ jiwi rukhiyạitako lạgitʼ ar onkoren bạirikoakʼ ti khon rukhiyạ ńam lạgitʼ mitʼ ṭhenko jarwayena. Onko do akoren eae gel mõṛẽ hajar bạiriko gocʼketʼkoa menkhan jinisko do bako luṭletʼtakoa. 17Adar cando reakʼ gelpeakʼ dinrre niạ ghoṭna hoyena ar gelponakʼ dinre doko jirạuena. Ar enhilokʼ do bhoj ar hulạsanakʼ din lekateko palonkeda. 18Menkhan Susanren Jihudiko do gelpe ar gelponakʼ dinre mitʼ sãoteko jarwa mitʼena. Ona tayom gel mõṛẽakʼ dinre onko doko jirạuena ar enhilokʼ do bhoj ar hulạsanakʼ din lekateko palonkeda. 19Ona iạte atoren Jihudiko, metakʼme okoe do begor pạcrite esetʼ jaegakoreko girobasokʼ kan tahẽkan onko do Adar cando reakʼ gelponakʼ dinre do rạskạwakʼ din ar bhoj reakʼ din ar eṭakʼko jomakʼ kolako reakʼ din lekateko palonkeda.
Purim porobko porobokʼ kan
20Mordekai do niạko ghoṭnae ol dohokeda ar Ahasberos rajakʼ rajosṭi reakʼ sor sạṅgiń sanam tabe disạmren Jihudiko ṭhen ciṭhi olkateye kolkeda. 21Uni do hukume emena onko do jao bochor Adar cando reakʼ gelpon ar gel mõṛẽakʼ niạ banar dinge jemonko palon. 22Niạ reakʼ karon do hoyokʼkana, niạkin dinre Jihudiko do akoren bạirikoakʼ ti khon rukhiyạko ńamleda ar inạ candoge onkoakʼ duk ar hae haeyokʼ do sukte pheraolena. Uni do onkoe olatʼkoa jemon onakin din do hulạsateko manao arko bhoj ar eṭakʼko ṭhen do jomakʼ ar reṅgecʼko do sandesko emakote ona dinko manao.
23Onate Jihudiko cetʼlekako ehopʼletʼ ar Mordekai cetʼ lekae olletʼ onkage banar din palon lạgitʼko rebenena. 24Inạ reakʼ karon do hoyokʼkana, sanam Jihudikoren bạiri Agagi Hamadatharen hopon Haman do Jihudiko gocʼko ar marao utạrko reakʼe soṛojontroleda ar ona iạte uni doe Puretʼ akatʼ, metakʼme gulibãṭ akatʼ tahẽkana. 25Menkhan raj do Hamanakʼ soṛojontro tinreye baḍaekeda unre uni do ona olakʼ hukume emena jemon Jihudiko upạrte Haman oka dusṭạmi phundiye aṭaoletʼ ona do uniyakʼ bohokʼrege paṛaokʼ ar uniren hoponko hõ jemonko pạsi ocokʼ. 26-27Ona iạtege “Puretʼ” katha khon niạkin din do “Purimko” metakʼkana. Ar ona ciṭhire cetʼko ol tahẽkan ar onko cetanre cetʼko hoylen ona iạte Jihudiko doko ṭhik doholeda je, mitʼṭecʼ niạmko dohoya. Onko ar onkoren hoponko okoe do Jihudi jạtko hatao akatʼ onko sanamkoge ona ciṭhi reakʼ hukum ar niṭ akatʼ okte leka jao bochor niạ banar din jemonko palon. 28Tabe disạm reakʼ mitʼke mitʼ nagrahare mitʼke mitʼ gharońjre piṛhike piṛhi niạ bar dinko disạya arko palona. Onate Jihudiko tala khon Purim reakʼ ona banar din palon do tisge baṅ bondokʼa ar onkoren hoponkoakʼ mon khon hõ baṅ meṭaokʼa.
29Ona iạte Abihayilren hoponera Ester rạni ar Jihudi Mordekai do Purim reakʼ niạ ạn ṭarhao lạgitʼ niạ dosarakʼ ciṭhi ektiạri salakʼkin olkeda. 30Ar Ahasberos rajosṭi reakʼ mitʼsae bargel eae goṭecʼ tabe disạmren Jihudiko ṭhen Mordekai do suluk ar rukhiyạ reakʼ ciṭhiye kolkeda. 31Ona ciṭhi kol hoylena jemon onko do niṭ akan oktere Jihudi Mordekai ar rạni Esterakʼ hukum leka Purim reakʼ niạ banar din palon lạgitʼko ṭarhao daṛeakʼ, one cetʼ leka onko do akoren ar onkoren bõsko lạgitʼ judạ judạ upạs ar rakʼ homor reakʼ dinko ṭhikletʼ tahẽkan. 32Esterakʼ hukumte Purim reakʼ niạko niạm do kajak utạrena ar ol dohoyena.
Santali Bible © Bangladesh Bible Society, 2021.