Sosolhayic̕ 9
9
Sanamkoakʼ ses dosa do mitʼgea
1Ona iạte iń do niạko reaṅiń hudiskeda ariń ńelkeda, dhorom ar ạkilan hoṛko ar onkoakʼ kạmi do jotoge Isorakʼ tire menakʼa. Okoehõ bako baḍaea onko samaṅre cetʼ menakʼa mente- dulạṛ se edre. 2Sanamkoakʼ ses dosa do mitʼgea- baṅ doe dhoromicʼkan ar baṅ doe bedhoromicʼkan, baṅ doe bhageyicʼkan are baṅ doe bhõnḍicʼkan, dãṛẽ samaṅge cetʼ ar baṅ samaṅge cetʼ. Bhage hoṛ do kạkại hoṛ khon cetʼte hõ bae sorosa; ar kiriyạkʼicʼ hoṛ hõ baṅ kiriạyicʼ khon bae sorosa.
3Siń cando latarre okako hoyokʼkan ona modre duk reakʼ do hoyokʼkana, sanamko inạ mitʼ dosage hoyokʼtakoa. Ona chaḍa manwa ontor do dukte perecʼgea ar jiwetʼe tahen bhor uniyakʼ ontorre do khepatetʼ tahena, ar ona tayom uni doe gujukʼa.
4Jiwetʼ hoṛkoakʼ as do menakʼgea; ar gocʼicʼ dhạcri kul khon jiwetʼ setageye bhagea. 5Jiwetʼ hoṛ doko baḍaegea, onko do gujukʼ hoyokʼtakoa mente, menkhan gocʼko do cetʼ hõ bako baḍaea. Onko lạgitʼ kuṛại do bạnukʼa, ente onkoakʼ katha do hiṛińena. 6Onkoakʼ dulạṛ, kurud ar hiskạ do laharege caba akana; siń cando latarre jãhãnakʼge hoyokʼ onare onkoakʼ do jãhãn bakhrage bạnukʼtakoa.
7Onate am do senkate rạskạte jomme ar sukte darkha rasa ńũ joṅme, ente Isor do amakʼ niạko kạmi reakʼ laha khongeye kusi ạgu akawada. 8Jao okte amakʼ kicricʼ do ponḍge tahenma ar bohokʼre sunum ojokʼ kate rạskạkʼme.
9Siń cando latarre Isor okako dine emakawatʼme, amakʼ jion reakʼ onako dinre amren bạhu, okoe dom dulạṛede, uni sãote sukte khemaome, ente siń cando latarre amakʼ jion ar amakʼ kosṭoteakʼ khaṭaokʼre noa do amakʼ kuṛại kana. 10Amakʼ tire jãhãnakʼ kạmige hijukʼ ona do amakʼ goṭa daṛete kạmime, ente oka ṭhạ̃item calakʼkan ona gujukʼ jaegare jãhãn kạmi se hudis se bidiạ se ạkil mente cetʼge bạnukʼa.
11Siń cando latarre iń do arhõń ńelakada, ona do hoyokʼkana:
Ńir hapaorakʼre coṭkarkoge jao okteko jitạukʼa, ona do baṅa;
daṛeankoge jao okteko jitạukʼa, ona hõ baṅa;
ạkilankoge jao okte lacʼ bikʼ jomakʼko ńama ona hõ baṅa;
budankoge jao okteko kisạ̃ṛokʼa, ona hõ baṅa;
gạkhuṛ hoṛge jao okte ạtko ńama, ona hõ baṅa;
ente okte ar bhạg do sanamko lạgitʼge menakʼa.
12Okoe hõ bae baḍaea tinreye gujukʼa mente. Cetʼleka hako do jhạlireko aṭkaokʼ ar cẽṛẽ do jhampare onkage muhin do manwa cetanre ackage hijukʼa ar muhinreye paṛaoakʼ.
Lelhatetʼ khon ạkil do sorosgea
13Iń do siń cando latarre ạkil reaṅ nonkan mitʼṭecʼ iń ńelkeda ar ińakʼ bujre ona do sorosakʼge tahẽkana. 14Mitʼṭecʼ huḍiń nagrahare thoṛa hoṛko tahẽkana. Ar mitʼṭen daṛean raj do ona upạrte hecʼkateye gheraokeda ar ona akromon lạgitʼe sapṛaoena. 15Ona nagrahare do mitʼṭen ạkilan reṅgecʼ hoṛe tahẽkana. Uni do acʼakʼ ạkilte nagrahae rukhiyạkeda, menkhan uni reṅgecʼ hoṛ do celege bako disạ doholedea. 16Onateń menkeda, “Daṛe khon ạkilge sorosa,” Menkhan reṅgecʼ hoṛkoakʼ ạkil do nihạ̃tokʼ kana ar uniyakʼ katha do celege bako ańjomleda.
17Bebujkoakʼ disạm cakʼlaoyicʼakʼ kạu kạu aṛaṅ khon
ạkilankoakʼ sulukte perecʼ katha ańjomge bhagea.
18Lạṛhại reakʼ sajbaj khon ạkil do sorosgea,
menkhan mitʼṭen kại hoṛ do ạḍi utạr boge kạmiye bạṛija.
Santali Bible © Bangladesh Bible Society, 2021.