Sosolhayic̕ 7
7
Ạkil reakʼ katha
1 #
Kạh 22.1
Damanakʼ sunum khon bhage ńutumokʼge bogea,
janam din khon gujukʼ dinge bhagea.
2Bhoj oṛakʼte calakʼ khon homor oṛakʼte calakʼge bogea,
ente sanam manwage mitʼ din gujukʼ hoyokʼtakoa;
ar jiwetʼko do onako moneyakʼma.
3Rạskạkʼ khon bhabnakʼge bhagea,
ente mẽtʼãhãre duk tahẽlenrehõ ontorre do suk tahẽdaṛeakʼa.
4Ạkilan hoṛakʼ mon do homor oṛakʼre tahena,
menkhan bebujkoakʼ mon do rạskạwakʼ oṛakʼrege.
5Bebujkoakʼ sereń ańjom khon
ạkilan hoṛkoakʼ egere bhagea.
6Ṭukucʼ latarre jạnum sahan cetʼ leka oṭejokʼ;
bebujkoakʼ landa hõ onkage.
Noa hõ ạuṛiyakʼgea.
7Ạkilan hoṛe julum khan uni do bebujicʼ lekae hoyokʼa,
ar ghus do buje nosṭoea.
8Jãhãnakʼ reakʼ etohopʼ khon mucạtʼge bhagea,
ar bạḍại khon sombhurikʼge bhagea.
9 #
Jak 1.19
Amakʼ mon do alom kạhĩs ocoytama,
ente kạhĩs do bebujkoakʼ koṛamre gạḍiạu akan tahena.
10“Nahakʼ khon Sedaeakʼ dinkoge cedakʼ bhage tahẽkana?”
Niạ katha do alom kuliya,
ente budan hoṛkoakʼ nonka kukli do baṅ sajaokʼa.
11Ạkil do sompotti ńamakatʼ leka bhage jinis kana;
jiwetʼ hoṛko lạgitʼ ona do sorosgea.
12Ṭaka poesa lekage ạkil doe rukhiyạgea,
tobe ạkil reakʼ sorostetʼ do hoyokʼkana
ạkil do ạkilan hoṛakʼ jiwiye rukhiyạitaea.
13Isorakʼ kạmiko ạribạndhitae pe.
Uniye konḍea akatʼakʼ do okoeye sojhe daṛekea?
14Suk dinkore rạskạkʼme;
menkhan duk dinre do niạko katha hudisokʼme,
Isor cetʼleka suke dohoakatʼ onkage duk hõe dohoakada,
jemon manwa do acʼakʼ tayom din reakʼ cetʼge
aloe baḍae daṛeakʼ.
15Ińakʼ noa ạuṛiyakʼ dinkoreń ńelakada,
mitʼṭen dhorom hoṛ do acʼakʼ dhoromtetʼreye gujukʼ kana,
ar mitʼṭen bedhorom hoṛ do acʼakʼ bạṛicʼakʼre
ḍher dine bahaokʼ kana.
16Apnarakʼ mẽtʼre ḍher do alom dhoromokʼa se ḍher ạkilan hõ alom hoyokʼa.
Cedakʼ am do apnartetʼem maraokʼa?
17Bedhoromre alom tahena, ar bebujicʼ hõ alom hoyokʼa.
Okte ạurire do cedakʼem gujukʼa?
18Niạ banar sopolhage sapʼ dohoyme, okaṭakʼ hõ alom aṛakʼ giḍikakʼa;
okoe hoṛ Isore botorae
uni do jãhãnakʼge ạḍi do bae bạ̃ṛtiya.
19Gel goṭecʼ disạm cakʼlaoko nagraha tinạkʼ bako daṛe ocoy
ạkil do mitʼṭen ạkilanicʼ hoṛ ona khon hõ bạ̃ṛtiye daṛe ocoyea.
20Dhạrtire nonkan dhorom hoṛge bạnukʼkoa
okoe jao okte bhageakʼe kạmikan, ar tishõ bae kạiyetʼ.
21Hoṛko roṛ baṛae sanam kathako do alom luturakʼa,
baṅkhan, amren guti ame sarapam kanem ańjom boteja;
22ente am do amakʼ ontorem baḍaegea,
am hõ eṭakʼko ḍher dhaoem sarap akatʼkoa.
23Iń do niạko ińakʼ ạkilte biḍạukateń ńelkeda, ariń menkeda,
“Ạkilan hoyokʼte hõń hoyokʼgea.”
Menkhan ona do iń khon sạṅgińre tahẽyena.
24Jion reakʼ asol manetetʼ do khạndrigea,
ona do baṅ ṭạmḍạu tiyogokʼa;
ar okoe ona doe sendra ńam daṛekea?
25Ona iạte iń do mon iń murukkeda
jemon ạkil ar jotowakʼ tayomre oka goṭawakʼ menakʼ
onań baḍae daṛeakʼ ar biḍạu ar khoj hataokateń ńel daṛeakʼ,
ariń bujhạu daṛeakʼ, bạṛicʼakʼ do bebujtetʼ kana mente
ar bebujtetʼ do khepawakʼge.
26Ińiń ńelkeda, gujukʼ khon hõ uni maejiu doe haṛhatʼgea,
uniyakʼ mon do mitʼṭecʼ jhampa ar jhạli leka ar uniyakʼ tikin do sikṛige.
Ar okoe hoṛ Isore kusi ocoye
uni do uniyakʼ ti khon apnartetʼe rukhiyạkʼa,
menkhan kại hoṛ do jhạlireye paṛaokʼa.
27Sosolhayicʼe meneda, “Ńelme, jotowakʼ tayomre oka goṭawakʼ menakʼ
ona ńela mente iń do dhape dhap lahakate
adomakʼ bisoekoń baḍaekeda.
28Iń do ạkil reakʼ iń sendrakeda menkhan bạń ńamleda
unre iń do hajar hoṛko talare
sarhao lek mitʼṭen khạṭi herel hoponiń ńamkedea,
menkhan onko talare khạṭi mitʼṭen maejiu hõ bạń ńamledea.
29Eken niạgeń baḍae daṛeada,
Isor do manwa khạṭigeye benaoledea,
menkhan manwa do aema lekan ghạṭ secʼko calaoena.”
Santali Bible © Bangladesh Bible Society, 2021.