Amos 7
7
Pohoko, seṅgel ar sạhul baber
1Probhu Isor do noa dorsone ńel ocokedińạ: Dosarakʼ phosol jokhecʼ rajakʼ bhag reakʼ ghãs irketʼ tayom tinre ghãs do arhõ omon rakabokʼkan tahẽkana unre Probhu Isor do jhãke jhãk pohokoe ṭhik dohoketʼkoa. 2Onko do tinre disạm reakʼ hạriạṛ dare sakamko jom cabakeda unre iń do nehõrkateń menkeda, “E Probhu Isor, ikạkakome baṛe. Jakob do cekateye teṅgo ruạṛokʼa? Uni ma coṅ ạḍiye huḍińge.”
3Unre Probhu Isor do mone ạcurketʼteye menkeda, “Onka do ar baṅ hoyokʼa.”
4Ona tayom Probhu Isor do ar mitʼṭecʼ dorsone udukʼạdińa. Probhu Isor do sạjại emokʼ lạgitʼ seṅgele hohowadea. Ar ona seṅgel do jalapuriye jomkeda ar ot hõ jojome ehopʼena. 5Unre iń do nehõrenteń menkeda, “E Probhu Isor, nehõramkạnạń ma thirokʼme. Jakob do cekateye teṅgo ṭarhaokʼa? Uni ma coṅe huḍińge.”
6Unre Probhu Isor do ona ńutumte kastaoenteye menkeda, “Onka do ar baṅ hoyokʼa.”
7Ona tayom Probhu Isor do ar mitʼṭecʼ dorsone ńel ocokedińa. Uni do sạhul baber hataokate sạhul baber jokhate benaoakʼ mitʼṭecʼ bhit aṛereye teṅgo akan tahẽkana. 8Uni doe metadińạ, “Amos, cetʼem ńeleda?”
Ińiń roṛ ruạṛadea, “Mitʼṭecʼ sạhul baber.”
Unre Probhu Isore menkeda, “Ińren hoṛ Israelko talare iń do mitʼṭecʼ sạhul baber iń dohoyeda; onko do ar bạń dayawakoa. 9Isahak bõsren hoṛkoakʼ than boṭkocʼko ar Israelakʼ koejoṅ reakʼ eṭakʼ ṭhạ̃iko do maraokʼ giḍikʼa. Iń do tarwaṛete Jerobiam bõsrenko upạrteń teṅgona.”
Amos ar Amasiạ
10Tayomte Bethelren naeke Amasiạ do Israelren raj Jerobiam ṭhen noa khobore kolkeda, “Amos do Israelko talare am upạrte mitʼṭecʼe soṛojontroyetʼkana. Disạmren hoṛko do uniyakʼ katha bako sahao daṛeakʼkana. 11Amose meneda, ‘Jerobiam do tarwaṛeteye gocʼ ocokʼa ar Israel do khạṭige acʼakʼ disạm khon eṭakʼ disạmteye bondi idi ocokʼa.’ ”
12Unre Amasiạ do Amose metadea, “E ńeńelicʼ, am do sạṅgińokʼme. Ar Jihudạ disạmte calakʼme. Onḍege nạbiyme ar jom ạsulokʼme. 13Bethelre do ar alom nạbiya, ente noa do rajakʼ sonot ṭhạ̃ikana ar rajosṭi reakʼ mundil kana.”
14Amos do Amasiại roṛ ruạṛdea, “Iń do nạbi hõ bạń tahẽkana, ar nạbiren celahõ bạń tahẽkana; iń do mitʼṭen gupiyicʼgeń tahẽkana, ar loa darekoń ńel todarotetʼ tahẽkana. 15Menkhan Probhu Isor do bhiḍi merom gukʼpi khone hoho ạgukedińteye metadińạ, ‘am do senkate ińren Israelko ṭhen nạbi lekate katha roṛme.’ 16Enḍekhan ńitokʼ do Probhu Isorakʼ katha ańjomme. Am dom menetʼkana, ‘Israel upạrte alom nạbiya ar Isahakakʼ bõsrenko upạrtehõ alom porcara.’ 17Ar onatege Probhu Isor doe meneda, ‘amren bạhu do nagrahare kusumbiye hoyokʼa, ar amren hopon ar hoponerako do tarwaṛeteko gujukʼa. Amakʼ disạm do jokha baberteko hạṭińjoṅa ar am do mitʼṭecʼ bhonḍ disạmrem gujukʼa. Israelren hoṛ do khạṭige akoakʼ disạm khon eṭakʼ disạmteko bondi idi ocokʼa.’ ”
Santali Bible © Bangladesh Bible Society, 2021.