2 Samuel 20
20
Dạud upạrte Sebawakʼ hul
1 #
1 Raj 12.16; 2 Bõs 10.16 Benjamin-gusṭiren Bikri hopon Seba ńutuman mitʼṭen haḍrap hoṛ do unre onḍeye tahẽkana. Uni do sakwa oroṅketʼteye menkeda,
“Dạud cetanre aleakʼ do jãhãn dạbiteakʼ bạnukʼtalea,
Jisạiren hopon cetanre jãhãn ạidạri hõ bạnukʼtalea.
E Israelko, ape do apan ạpin oṛakʼte ruạṛ joṅpe.”
2Unre Israelren sanam hoṛ do Dạudko bạgiyadete Bikri hopon Sebako pańjakedea. Menkhan Jordan khon Jerusalem hạbicʼ Jihudạren hoṛko do goṭa hor raj são sãoteko calaoena.
3 #
2 Sam 16.22
Dạud Jerusalemre acʼakʼ oṛakʼteye ruạṛ hecʼen khan okoe gel goṭen chuṭki era oṛakʼ horhoe lạgitʼe doho oṭoletʼko onko do mitʼṭecʼ oṛakʼreye dohokatʼkoa ar oṛakʼ horhoe lạgitʼe bebostakeda. Uni do onko jom-ńũ ar kicricʼ khạnḍwạkʼkoe ematʼkoa menkhan onko ṭhen do ar bae bolo baṛalena. Ar onko do onḍe rạnḍi maejiu lekako tahẽyena ạuriko gujukʼ hạbicʼ.
4Inạ tayom raj do Amasae metadea, “Pe din bhitrite Jihudạren hoṛko iń ṭhenem hohoạgukoa ar am hõ nonḍem tahena.” 5Amasa do Jihudạren hoṛ hohowako lạgitʼe calaoengea menkhan raje ṭhik akade tahẽkan khon hõ bạ̃ṛti okteye hataokeda.
6Unre Dạud do Abisaeye metadea, “Absalom aboakʼ tinạkʼ bae loksan akatʼ ona khon hõ Bikri hopon Seba do ḍhere loksan tabona. Ńitokʼ am do ińren hoṛkoante uni khudạue lạgitʼ oḍok calakʼme. Ar baṅkhan uni do jãhãn pạcrite esetʼ nagrahae sendra ńamle khan abo ṭhen khone dạṛ paskaokʼa.” 7Unre Joab ar uniren hoṛko do, Kerethiko ar Pelethiko ar sarecʼ birbanṭako do Abisae tabere tahẽkate Bikri hopon Seba khudạue lạgitʼ Jerusalem khonko oḍokena.
8Onko do Gibeonre menakʼ maraṅ dhiri ṭhenko seṭeren khan Amasae sãoteko ńapamena. Joab do unre lạṛhại phạdkoakʼ kicricʼe horokʼ akatʼ tahẽkana ar ḍanḍa paṭheakʼ khapre hõ tarwaṛe tahẽkantaea. Uni do tohotʼ gurokʼ hoṛ leka laha secʼe sen idiyen khan khap khon tarwaṛe do otre ńurentaea.
9Joab do Amasae metadea, “E boeha cetʼ leka menama?” Ar niạ menkate cokʼae lạgitʼ jojom tite uniyakʼ gocoye sapʼketʼtaea. 10Menkhan Amasa do Joabakʼ ti reakʼ tarwaṛe do bae kheyalleda. Ar Joab do tarwaṛete uniyakʼ lacʼe boskaoketʼtaea. Onate uniyakʼ lacʼ do bogocʼ oḍokente otre ńurena. Ar Amasa ńẽde reakʼ jạṛuṛ do baṅ hoylena. Uni doe gocʼena. Inạ tayom Joab ar uniren boeha Abisae do Bikri hopon Seba kin khudạu idikedea.
11Joabren mitʼṭecʼ hoṛ do Amasawakʼ mạ̃ṛĩ ṭhen teṅgoyenteye menkeda, “Okoe Joabe dulạṛede ar okoe doe Dạud secʼren kan uni do Joabe pańjayema.” 12Amasawakʼ mạ̃ṛĩ do unhõ tala ḍaharre mãyãmre jobe akan tahẽkana. Joabren uni hoṛ doe ńelkeda, lạṛhại phạdko jotoge Amasae ṭhen hecʼkateko teṅgokʼ kana, onate uni do ḍahar khon khetre Amasae or pheḍkedea ar mitʼṭecʼ kicricʼteye poṭomkadea. 13Amasa hor khone ocokʼkede khan sanam hoṛ do Joabko pańja idikedete Bikri hopon Sebako khudạu idikedea.
14Seba do Israelren sanam gusṭiko talate ar Beriyikoakʼ ṭoṭhako secʼte Abel-Betmaka hạbicʼe senena. Ar hoṛko do onḍeko Sebako khudạu idikedea ar nagrahateko boloyena. 15-16Ona tayom Joab sãote sanam lạṛhại phạdko do hecʼkate Abel-Betmakako gheraokeda. Onko do nagraha bahre pạcri sãote mitʼṭecʼ daṛaṅ pinḍhạko upʼ rakapʼkeda. Ar ona tayom tinre bhitri reakʼ pạcri rạputʼko ehopʼena unre mitʼṭecʼ budan maejiu do nagraha bhitri khon ãṭ aṛaṅte hohowateye menkeda, “Ańjompe, ańjompe, Joab nonḍe hijukʼ metaepe jemon uni tulucʼ iń galmarao daṛeakʼ.” 17Ar Joab do uni secʼe laha idiyen khane uni do Joabe kulikedea, “Am do cetʼ Joab kanam?”
Uni doe menkeda, “Hẽ, iń doń Joab kangea.”
Maejiue menkeda, “Amren kạ̃ṛmĩyakʼ katha baṛe ańjomme.”
Uni doe menkeda, “Ańjometʼgeạń.”
18Maejiue menkeda, “Sedaeren hoṛko menetʼ tahẽkana, ‘Abelte senkate sopolha hataome. Ar nonkate onko do sanamakʼ babotreko miṭmaṭetʼ tahẽkana. 19Ale do Israelko talare ale do sulukokʼ ar pạtiạranko kanale. Am do Israelko tala reakʼ gogo lekan nagraha marao giḍikakʼ do cedakʼem khojkana. Probhu Isorakʼ sompotti ar Israelko do cedakʼ utʼko reakʼ dom kurumuṭu kana?”
20Joab doe menkeda, “Utʼ kakʼ se jarkhar reakʼ kạmi iń khon do sahaṛ akae tahenma, hẽ sahaṛ akaege tahenma. 21Katha do onka baṅkana. Ephrayim disạm reakʼ buru ṭoṭharen Bikri hopon Seba ńutuman mitʼṭecʼ hoṛ do Dạud upạrte tiye tulakada. Am do eken uni hoṛ moto ińakʼ tire soprotkaeme, enḍekhan niạ nagraha khon iń doń calao joṅa.”
Maejiu do Joabe metadea, “Uniyakʼ bohokʼ do pạcri cetantele capatʼgotʼama.”
22Ona tayom uni maejiu do ạkilan kathakowante nagraharen sanam hoṛko ṭhene senena. Ar hoṛko do Bikri hopon Sebakʼ bohokʼko makʼ ńurhạketʼte Joabko capatʼgotʼadea. Unre Joab do sakwae oroṅkeda ar uniren hoṛko do nagraha khonko uṭhạuente apan ạpin oṛakʼteko ruạṛena. Ar Joab do Jerusalemren raj ṭhene ruạṛ calaoena.
23Joab do Israelren sanam lạṛhại phạdkoren maraṅ subedare tahẽkana ar Jehoyada hopon Benaya do Dạudren rurukhiyạko Kerithiko ar Pelethikoren subedare tahẽkana; 24ar kạmire okoeko jormoṭ ocokʼkan tahẽkan onko ńel todarotko reakʼ bhar do Adoram cetanre tahẽkana; Ahilud hopon Jehosaphat do Itihãs olokʼicʼe tahẽkana; 25Sewa do rajren olokʼicʼ; ar Sadok ar Abiathar do naekekin tahẽkana 26ar Jayirren Ira hõ Dạudren sosolhayicʼ naekeye tahẽkana.
Santali Bible © Bangladesh Bible Society, 2021.