रोमी 5
5
परमेश्वरखाटा मिलाप
1होटबाटै कानै विश्वास जाट्चबाटै परमेश्वरौ म्याहासाङ धर्मी ठहरीस्च हो र प्रभु येशू ख्रीष्ट लकीङ न परमेश्वरखाटा कानुङ मिलाप छान्नने। 2येशू ख्रीष्टाङ विश्वास जाट्चबाटै परमेश्वरखाटा नयाँ सम्बन्धाङ जोडीयार कानै होसकुङ अनुग्रहौ अनुभव जाट्नने। चाहाँ कान होला न जीवामे र कान आदरौ योग्य परमेश्वरखाटा भेला छान्च आशाङ माह्राङ्ने। 3होडीक मट्टै होइन, दु:खाङ र कान माह्राङ्ले हीजैडेनाङ दु:खये दु:खकी सहडीकी ह्योक्च शक्ति याल्हे। 4दु:ख सहडीकी ह्योक्नाङ कान पाको छान्ने, कान पाको छान्च न्हुइङ मुक्तियो आशा डुप्ले। 5कान इसे आशाङ निराश माछान्ने हीजैडेनाङ परमेश्वरै कानकी पवित्र आत्मा याम्हने र पवित्र आत्मै कानुङ हृदयाङ परमेश्वरौ प्रेम न्हेपाक्ङ याम्हने।
6कान लहे न मुक्तियो लागि हीर जाट्की माह्योक्चबाटै ख्रीष्ट लाहा न कान पापीकुङ लागि ठिक समयाङ सीया। 7धर्मी भर्मीयो लागि सीकी मीमन जाट्च भर्मी डुप्की गाह्रो कुरा हो। सेछ भर्मीयो लागि च सुयेर सीच आँट जाट्की र आह्योकै। 8तर परमेश्वरै होसकुङ प्रेम इटजाट्न टान्हाका, की कान पापी लेनाङ न ख्रीष्ट कानुङ लागि सीया। 9होसकै लहो ह्यु लकीङ कानकी परमेश्वरौ म्याहासाङ धर्मी ठहरीया डेनाङ झन् कुडीक वास्टै कानकी परमेश्वरौ मीरीस लकीङ जीवाटाक्ले। 10कान परमेश्वरौ शत्रु लेच बेलाङ न होसकुङ काट मट्टै मीजा ख्रीष्टौ मृत्यु लकीङ परमेश्वरै कानकी लहो लाफा खास्नने डेनाङ झन् परमेश्वरौ लाफा छान्च न्हुइङ ख्रीष्टौ जीवन लकीङ कानकी कुडीक बढी जाट्न जीवाटाक्ले। 11इडीक मट्टै होइन काल्हौ प्रभु येशू ख्रीष्टौ कारणै कान परमेश्वराङ माह्राङ्ले, हीजैडेनाङ होसकै कानकी परमेश्वरखाटा मिलाप जाटाक्ङने।
आदम लकीङ मृत्यु र ख्रीष्ट लकीङ जीवन
12पहिलो भर्मी लकीङ संसाराङ पाप राहा अनि होच्यो पापै जाट्नाङ मृत्यु राका। हीजैडेनाङ पट्ट न भर्मीकै पाप जाटा। 13परमेश्वर व्यवस्था याखी डेनाङ पहिला न संसाराङ पाप लेया, तर व्यवस्था मालेचबाटै पापौ लेखा र माछाना। 14आदमौ समय लकीङ व्यवस्था रीक्च मोशौ समयसम्म पट्ट न भर्मीको मृत्युओ बन्धनाङ लेया। आदमै परमेश्वरौ आज्ञा मामन्डीचबाटै सीया, तर अरु भर्मीकै आदमै लेखा पाप माजाट्नाङ र होखुरीक र सीया। इटजाट्न आदम चहिँ न्हुइङ राखी पर्च भर्मी ख्रीष्टौ नमूना लेया।
15तर इसे नीस काट न माछान्ने, हीजैडेनाङ आदमै जाट्च पाप परमेश्वरै होटन याछ वरदान ल्याक्च होइन। हीजैडेनाङ काट जना भर्मीयो पापै जाट्नाङ वास्टै भर्मीको सीया। तर काट जना येशू ख्रीष्ट लकीङ परमेश्वरै वास्टै भर्मीकोलाक झन् वास्टै अनुग्रह जाटा। 16परमेश्वरै होटन याछ वरदान र काट जना भर्मीये जाट्च पाप फरक ले। आदमै जाट्च काटजा पापै जाट्नाङ पट्ट न भर्मीको दोषी ठहरीसार सजायौ भागिदार छाना। तर भर्मीकै वास्टै पाप जाट्रखीङ र होखुरीककी परमेश्वरौ वरदानै होटन धर्मी ठहरीया। 17काट भर्मीये जाट्च पापै जाट्नाङ पट्ट भर्मीको मृत्युओ बन्धनाङ पर्या डेनाङ होटजाट्न न परमेश्वरौ कह्राङ्छ अनुग्रह र वरदानै भर्मीकोलाक धर्मी ठहरीले र इखुरीक काट न भर्मी येशू ख्रीष्ट लकीङ मृत्युओ बन्धन मीटाक विजय जीवन जीवाले।
18कुटजाट्न आदमौ काट पापै जाट्नाङ पट्ट भर्मीको मृत्युओ भागिदार छाना डेनाङ होटजाट्न न ख्रीष्टौ काट धार्मिक कामै पट्ट न भर्मी परमेश्वरौ म्याहासाङ धर्मी ठहरीसार नयाँ जीवन डुप्ले। 19हीजैडेनाङ काट जना भर्मी आदमै परमेश्वरौ आज्ञा मामन्डीनाङ वास्टै भर्मीको पापी छाना डेनाङ होटजाट्न न काट जना भर्मी ख्रीष्टै आज्ञा मन्डीनाङ वास्टै जना परमेश्वरौ म्याहासाङ धर्मी ठहरीसा।
20भर्मीको कुडीक पापी ले डेयार वार्ख्यो डेम व्यवस्था राहा, कुला पाप ल्होङा, होला परमेश्वरौ अनुग्रह झन् वास्टै ल्होङा। 21होडीक बेला पापै मृत्यु लकीङ पट्ट न भर्मीको मीटाक राज्य जाट्नाङ लेखा न चाहाँ परमेश्वरौ अनुग्रहै राज्य जाट्न न ले। इसे न अनुग्रहै कानकी परमेश्वरौ म्याहासाङ धर्मी ठहरीयार प्रभु येशू ख्रीष्ट लकीङ सेन र मासीच जीवन याल्हे।
© 2025 by Mother Tongue Translators Society and Wycliffe Bible Translators, Inc.