मर्कूस 9
9
1येशूये होखुरीककी डेया, “साँच्ची न ङा नाखुरीककी डेले, इला टोङ्छको मध्याङ कोइ-कोइ ले होखुरीक परमेश्वरौ राज्य बाड्को शक्तियाङ राछ माडाङ्ठर कुसेर हालताङ मासीले।”
येशूओ रुप फेरीस्च
(मत्ती १७:१-१३; लूका ९:२८-३६)
2होच्यो छ दिन न्हुइङ येशूये पत्रुस, याकूब र यूहन्नाकी लार काट घाङ्च डाडाङ नुङा। होला होखुरीक मट्टै लेया। होखुरीकुङ म्याहासाङ न येशूओ रुप फेरीसा। 3होसकुङ बढीन इडीक चम्किलो बोच छाना की सफाखाटा हुर्नाङ र संसाराङ कुचेर होङ्च बोच खास्की माह्योक्ले।
4होडीक न बेला मोशा र एलिया होला डाङा र होखुरीक येशूखाटा ङाक्की ठाला। 5इसे डाङार पत्रुसै येशूकी डेया, “गुरु ज्यु, काल्हा इला लेच सेम्ह छाना। काल्हा इला सोम बास ङुच ठाउँ खासीङ, नाकुङ लागि, मोशौ लागि र एलियौ लागि।” 6पत्रुस र अरु चेलाको बीह्रीयार आटडीस्च बाटै पत्रुसकी ही डेइङ ही डेइङ छाना। 7होडीक न बेला डेबु राहार होखुरीक मीटाक छाया पर्या। होटै डेबु भित्री लकीङ काट आवाज राहा, “इसे ङौ मीजा हो, इसकी ङा जाक्ले। इचे डेच नाखुरीकै सेनी।” 8इट डेच सेरखीङ चेलाकै इलाक-आलाक ङोसा तर लाहाखाटा येशू बाहेक अरु सुकीर माडाङा।
9होखुरीक पहाड लकीङ लीट्टीम ह्वाम रान्हाङ येशूये होखुरीककी डेया, “भर्मीयो मीजा सीच लकीङ जीवाम मासोठर नाखुरीकै इसे डाङ्च कुरा सुकीर मासेटाक्की।”
10होखुरीकै इसे कुरा मीमनाङ न डा तर “सीच लकीङ फेरि जीवाकी डेच चहिँ ही लेसा” डेम मेखुरीक-मेखुरीक कुरा जाट्की ठाला। 11होटै चेलाकै येशूकी गीना, “हीजै व्यवस्थुङ धर्मगुरुकै एलिया न पहिला राखी पर्ले डेले?”
12येशूये डेया, “साँच्ची न, पहिला एलिया राल्हे र पट्ट न कुराको तयार खास्ले। तर भर्मीयो मीजै वास्टै दु:ख भोग्डीले र अरुकै माजाक्ले डेम धर्मशास्त्राङ हीजै रीक्च औला? 13तर ङा नाखुरीककी डेले, एलिया च राम्हभ्यामने र होच्यो बारेयाङ धर्मशास्त्राङ रीक्च अनुसार भर्मीकै ही जाट-जाट सेया होसकी होटन जाटा।”
भूत लग्डीस्च लेन्जा जजा गेप्च
(मत्ती १७:१४-२१; लूका ९:३७-४३)
14येशू र सोम जना चेलाको अरु चेलाको लेठाङ ल्हेस्न राहा। होला वास्टै भर्मीको भेला छान्न ङुमन्या र चेलाकोखाटा धर्मगुरुकै बहस जाट्न न लेया। 15पट्ट न भर्मीकै येशूकी डाङ्च बित्तिकै छक्क पर्यार होसको लेठाङ खेर्न राहा र होसकोकी झोरा। 16येशूये होखुरीककी डेया, “नाखुरीक इखुरीकखाटा हीयो बारेयाङ बहस जाट्नन ले?” 17भर्मीकुङ भीड लकीङ काट जनै डेया, “गुरु ज्यु, ङौ मीजाकी नाको लेठाङ राक्ङने। भूत आत्मा लग्डीस्च बाटै होसे ङाक्की माह्योक्ले। 18जब भूत आत्मै होसकी घोले, होसकी झाङ पछारीले। होचे मेङ्गेरीङ घोचोस छ्युक्ले र मीस्याक जीकार होसे अरठ्ठ छान्ने। ङै नाकुङ चेलाकोलाक भूत आत्मा छ्युक्ङ यान्ही डेम बिन्ती जाटा तर होखुरीकै माह्योका।” 19होटै येशूये होखुरीककी डेया, “ए अविश्वासी पुस्ता, ङा सेनसम्म नाखुरीकखाटा ङुले र? नाखुरीककी कुडीक सहडीकी? होसकी ङा लेठाङ राक्नी।” 20होखुरीकै होसे लेन्जा जजाकी होसको लेठाङ राका। येशूकी डाङ्च बित्तिकै भूत आत्मै लेन्जा जजाकी लछार पछार जाटा र होसे झाङ पछारीसार मेङ्गेरीङ घोचोस छ्युक्चै लडीबडी जाट्की ठाला। 21अनि होसकै होच्यो बोइकी गीना, “सेन लकीङ इसकी याङ्च छान्च?” बोये डेया, “जजा लकीङ न याङ्च छान्च हो। 22इसकी नाश जाट्की डेम इसे भूत आत्मै घरी-घरी इसकी म्हे र डीयाङ लोम्हकाले। इडीक नाकै हीर जाट्की ह्योक्ले डेनाङ दया जाटार कानकी मद्दत जाट्न यान्ही।” 23येशूये होसकी डेया, “‘नाकै ह्योक्ले डेनाङ!’ डेम ही डेच? विश्वास जाट्चकुङ लागि च पट्ट न कुरा सम्भव ले।” 24इसे कुरा सेच बित्तिकै लेन्जा जजौ बोये च्याकार डेया, “ङा विश्वास जाट्ले। ङौ अविश्वासाङ ङाकी सहायता जाट्नी।”
25पट्ट न भर्मीको येशू लेठाङ खेर्न राछ डाङार होसकै होसे भूत आत्माकी हक्कारीचै डेया, “ए लाटा खास्च र मेनेकेप मासेच खास्च आत्मा, इसे जजा लकीङ ख्योहार रान्हा र फेरि ल्हेसार भित्री मापर्यो!” 26होटै चीघारीसार होसे लेन्जा जजाकी लछार पछार जाटार होसे भूत आत्मा ख्योहा र होसे जजा सीच बराबर छाना। इलासम्मकी कुडीक भर्मीकै च “होसे सीया” डेया। 27तर येशूये होच्यो मीहुट घोवार होसकी जुरुक सोटा र होसे सोवा।
28येशू काट इमाङ नुङा र चेलाकै सुर मालेच बेलाङ येशूकी गीना, “कानै चहिँ होसे भूतकी हीजै डोन्की माह्योका?” 29होसकै होखुरीककी डेया, “इसे खालुङ भूत चहिँ प्रार्थना जाटार मट्टै डोन्की ह्योक्ले।”
येशूये लाहा सीकी पर्च बारेयाङ फेरि सेटाक्च
(मत्ती १७:२२-२३; लूका ९:४३-४५)
30होसे ठाउँ लकीङ ख्योहार येशू र मेकुङ चेलाको गालीलौ लाम छान्चै नुङा। होसको होला ले डेम सुयेर थाहा माडीन्ख्यो डेच होसकुङ मीमन लेया, 31हीजैडेनाङ होसकै लहो चेलाकोलाक शिक्षा याम्हन लेया। होसकै होखुरीककी डेया, “भर्मीयो मीजा भर्मीकुङ मीहुटाङ पर्ले र होखुरीकै होसकी साट्ले होटै होसे सीच सोम याकाङ फेरि जीवाम सोले।” 32तर होसकै डेच इसे कुरा होखुरीकै माबुझडीसा र होसकोखाटा गीन्की बीह्रीया।
सु चहिँ बाड्को?
(मत्ती १८:१-५; १०:४२; लूका ९:४६-५०)
33होखुरीक कफर्नहुम सहराङ टाह्रा र इम भित्री पर्रखीङ येशूये चेलाकोलाक गीना, “लामाङ रान्हाङ नाखुरीकै हीयो बारेयाङ बहस जाट्नन्या?” 34तर होखुरीक माच्याक्ङ ङुवा हीजैडेनाङ होखुरीकै “काल्हा मध्याङ सु बाड्को हो” डेम बहस जाट्चै राम्हन्या। 35होटै येशू ङुवा र बाह्र जना न चेलाकोलाक आर्घार डेया, “पट्ट डेनाङ बाड्को छान्की पाचये पट्ट डेनाङ मार्जा छानार पट्टओ सेवा जाट्की पर्ले।” 36होटै न्हुइङ काट मार्जा बालककी लार येशूये होसकी होखुरीकुङ मीघ्याङ राकार मीकुह्वाङ ला, अनि होसकै चेलाकोलाक डेया, 37“सुये ङौ म्यार्मीनाङ याङ्च मार्जा जजाकी ग्रहण जाट्ले होखुरीकै ङाकीर ग्रहण जाट्ले। ङाकी ग्रहण जाट्चकै ङाकी मट्टै होइन तर ङाकी बीर्न्हकाच बोइकी र ग्रहण जाट्ले।”
38यूहन्नै येशूकी डेया, “गुरु ज्यु, काट जना भर्मी नाकुङ म्यार्मीनाङ भूतको छ्युक्ङ न लेच कानै डाङा। तर कानै होसकी होट जाट्की माह्या हीजैडेनाङ होसे काल्हाकी डुट्च भर्मी होइन।” 39तर येशूये डेया, “होसकी मारोकडीनी, हीजैडेनाङ ङौ म्यार्मीनाङ अचम्मौ काम जाट्चये तुरुन्तै ङौ विरुद्धाङ मास्च माङाक्ले। 40हीजैडेनाङ सुये काल्हौ विरोध माजाट्ले, होसे काल्हा पट्टी न छान्ने। 41साँच्ची न ङा नाखुरीककी डेले, सुयेर नाखुरीककी मुक्ति याछ ख्रीष्ट हो डेयार ङौ म्यार्मीनाङ काट गिलास डी मट्टै याहा डेनाङ र होचे इनाम डुप्ले।”
पाप लकीङ कुटजाट्न जीवाकी
(मत्ती १८:६-९; लूका १७:१-२)
42येशूये फेरि डेया, “ङा मीटाक विश्वास जाट्च इसे मार्जा नानीको मध्याङ इडीक सुयेर काट जनाकी मट्टै पाप जाट्की लैडीले डेनाङ होसकी च बरु मीघाटीयाङ झाँटा च्योलोकार होसकी तालाङ लोम्हकाकी सेम्ह छान्ने। 43इडीक नाकुङ मीहुटै नाकोकी पाप जाट्की लैडीले डेनाङ होसकी चेमकानी। नीस मीहुटखाटा न नरकौ सेन र मासीच म्हेयाङ नुङ्की डेनाङ च काट मट्टै मीहुट लार सेन र मासीच जीवन डुप्की न नाकुङ लागि सेछ हो। 44[नरकाङ च न डुको सीले न म्हे न सीले।]#९:४४ कोइ कोइ संस्करनौ बाइबलाङ इसे पद माले 45नाकुङ मीखुट्टै नाकोकी पापाङ पार्ले डेनाङ होसकी चेमकानी। नीस मीकुखाटा नरकाङ नुङ्की डेनाङ बरु काट मट्टै मीकुखाटा सेन र मासीच जीवन डुप्की नाकुङ लागि सेछ हो। 46[नरकाङ च न डुको सीले न म्हे न सीले।]#९:४६ कोइ कोइ संस्करनौ बाइबलाङ इसे पद माले 47इडीक नाकुङ मीमीकै नाकोकी पापाङ पार्ले डेनाङ होसकी डोनार लोम्हकानी। नीस मीमीकखाटा नरकाङ नुङ्की डेनाङ च काट मट्टै मीमीकखाटा परमेश्वरौ राज्याङ नुङ्की सेछ हो। 48नरकाङ च न डुको सीले न म्हे न सीले।”
49 “हीजैडेनाङ काट-काट जनाकी म्हेये # ९:४९ म्हेये: इला म्हेओ चिन्ह चहिँ भर्मीकै दु:ख कष्टौ अनुभव लाले डेम टान्हाक्की पाच हो। न छा सेस्च खास्ले। 50छा#९:५० छा: इडीक स्याङ छा ले डेनाङ माघेरेल्ले। चेलाको चहिँ पृथ्वीयुङ छा छान्की पर्ले। सेछ ठोक हो तर इडीक छओ स्वाद ह्वा डेनाङ हीये फेरि होसकी सेस्च खास्की? नाखुरीक पट्ट न छा लेखा न छान्नी र नाखुरीक शान्तिखाटा ङुनी।”#मत्ती ५:३४; लूका १४:३४-३५
S'ha seleccionat:
मर्कूस 9: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.