मर्कूस 7
7
शुद्ध र अशुद्ध
(मत्ती १५:१-९)
1यरूशलेम लकीङ राछ फरिसीको र धर्मगुरुको येशूओ वरिपरि भेला छाना। 2अनि येशूओ चेलाकै मीहुट माहुर्न न ज्याच होखुरीकै डाङा। इस्राएलीकुङ चलन अनुसार मीहुट माहुर्न ज्याचकोलाक अशुद्ध मन्डीमन्या। 3फरिसी र अरु पट्ट न यहूदीकै होखुरीकुङ बोइ बाज्युकै जाट्न राछ चलन अनुसार मीहुट माहुर्न माज्याम्या। 4बजार लकीङ इमाङ राहार माचोखडीस्न हीर माज्याम्या। होखुरीकै याङ्च वास्टै अरु चलनको र मन्डीम्या। बेला, भाँडा र काँसौ भाँडाको चोखडीच चलन लेया र माचोखडीम माक्योट्न्या।
5फरिसी र धर्मगुरुकै येशूकी गीना, “नाकुङ चेलाकै बोइ बाज्युकै जाट्न राछ चलन अनुसार हीजै माजाट्ले र मीहुट माहुर्न न ज्याले?” 6तब येशूये होखुरीककी डेया, “यशैया अगमवक्तै नाखुरीक कपटी मीमन लेचकुङ बारेयाङ ठिकखाटा इजाट्न अगमवाणी जाटा। परमेश्वरै इटजाट्न डेले
‘इसे जातिये ङाकी मेङ्गेरै मट्टै आदर जाट्ले तर होखुरीकुङ मीमन ङा लकीङ लोस ले।
7 होखुरीकै बिनासित्तैँयाङ न ङौ सेवा जाट्ले हीजैडेनाङ होखुरीकुङ शिक्षा चहिँ भर्मीकै पाहाक्च विधि मट्टै हो।’ #
यशैया २९:१३
8 “नाखुरीक परमेश्वरौ आज्ञाकी मामन्डीयार भर्मीकै खास्च विधिको मन्डीले।”
9फेरि येशूये होखुरीककी डेया, “नाखुरीक लहो चलन मन्डीकी कुडीक सिपालु छान्न परमेश्वरौ आज्ञाकी टारीले। 10हीजैडेनाङ मोशै डेमने, ‘लहो बोइ-मोइकी आदर जाट्नी’#प्रस्थान २०:१२; व्यवस्था ५:१६ र ‘सुये बोइ मोयो विरुद्धाङ मास्च कुरा ङाक्ले होसकी साट्की न पर्ले।’#प्रस्थान २१:१७; लेवी २०:९
11 “तर नाको डेले इडीक होसे भर्मी लहो बोइ-मोइकी डेले, ‘ङा लकीङ नाखुरीककी चहडीस्च सहायता ङै परमेश्वरकी भेटी याल्हे डेनाङ’ 12नाखुरीक होसकी लहो बोइ मोयो लागि फेरि हीर जाट्की माह्याले। 13इटजाट्न नाखुरीक लहो क्योस्न राछ चलनकी मन्डीचै परमेश्वरौ वचनकी चहिँ रद्द जाट्ले। याङ्च न अरु वास्टै कामको नाखुरीकै जाट्ले।”
भर्मीकी अशुद्ध खास्च कुराको
(मत्ती १५:१०-२०)
14येशूये भर्मीकोलाक फेरि लाहा लेठाङ आर्घार डेया, “नाखुरीक पट्टये न ङौ कुरा सेनी र वार्न्ही। 15याङ्च हीर कुरा माले, की बाहिर लकीङ भर्मी भित्री पर्यार होसकी अशुद्ध खास्की ह्योक्ले तर भर्मीयो मीमन लकीङ बाहिर ख्योछ कुराकै चहिँ भर्मीकी अशुद्ध खास्ले। 16[सुओ सेच मेनेकेप ले, होचे सेख्यो।]#७:१६ कोइ कोइ संस्करनौ बाइबलाङ इसे पद माले”
17जब येशूये भर्मीकोलाक डासार इम भित्री पर्या, तब होसकुङ चेलाकै इसे उदाहरणौ बारेयाङ गीना। 18येशूये होखुरीककी डेया, “ही नाखुरीक र अझै अबुझ न ले? भर्मीयो मेङ्गेरीङ ही भित्री पर्ले होचे होसकी अशुद्ध खास्की माह्योक्ले डेयार नाखुरीकै माह्वार्नने? 19हीजैडेनाङ होसे होच्यो मीमनाङ होइन तर मीटुक भित्री पर्ले र बाहिर ख्योखी क्योट्ले इटजाट्न येशूये पट्ट न ज्याच ठोकको शुद्ध ले डेयार बुझडीम याहा।”
20येशूये डेया, “भर्मीयो मीमन लकीङ ही बाहिर ख्योल्हे होचे न भर्मीकी अशुद्ध खास्ले। 21हीजैडेनाङ भर्मीयो मीमनीङ मास्च विचार, व्यभिचार, खुसकी, साट्की, वेश्याको लेठाङ नुङ्च, 22लोभ जाट्च, दुष्टता, छल जाट्च, छाडापन, मीरीस जाट्च, निन्दा जाट्च, घमण्ड र मूर्खता। 23इसे पट्ट न दुष्ट कुराको भर्मीकुङ भित्री मीमन लकीङ न ख्योल्हे र इसे कुराकै न भर्मीकी अशुद्ध खास्ले।”
अन्यजाति मास्टोओ विश्वास
(मत्ती १५:२१-२८)
24होटै न्हुइङ येशू टुरोस इलाका पट्टी नुङा र काट इम भित्री पर्या। इसे कुरा सुयेर थाहा माडीन्ख्यो डेच होसकुङ मीमन लेया तर होसको आर्च्युम्ह ङुकी माह्योका। 25होडीक न बेला काट मास्टोये होसकुङ बारेयाङ सेया र राहा अनि तुरुन्तै होसकुङ मीकुवाङ खुखुप छाना। होच्यो मास्टो मीजाकी दुष्टआत्मा लग्डीस्न्या। 26होसे मास्टो सिरियुङ फोनिकेयाङ जन्मडीस्च काट ग्रीक मास्टो लेया। होसे मास्टोये लहो मास्टो मीजा लकीङ भूत छ्युक्ङ यान्ही डेयार येशूकी बिन्ती जाटा। 27तर होसकै होसे मास्टोकी डेया, “पहिला मीजाकोलाक #7:27 मीजाकोलाक: इला मीजाकोलाक डेच चहिँ यहूदीकोलाक डेकी पाच हो। चीउको: होसे बेला यहूदीकै यहूदी बाहेक अरुकी चीउको डेयार डेमन्या। तर इला येशूये चहिँ होसे मास्टोकी पहिला होसे यहूदीकोलाक सघडीकी पर्ले डेम डेमन्या।ज्याकी यान्ही, हीजैडेनाङ मीजाकुङ ज्याच ठोक चीउकोलाक लोम्ह याखी ठिक माछान्ने।” 28तर होसे मास्टोये येशूकी डेया, “हो प्रभु, तर चीउकै र मीजाकै टेबल म्होकी झालाक्च ज्याच ठोकौ टुक्राको च ज्याले।” 29येशूये होसे मास्टोकी डेया, “नाकै इसे कुरा डेचबाटै ढुक्क छानार नाको इमाङ नुङ्नी। नाकुङ मास्टो मीजा लकीङ भूत ख्योहार नुङ्ङ भ्यामे।” 30अनि होसे इमाङ नुङा, र मास्टो मीजाकी खाटाङ मीस्न ङुच डुपा। साँच्ची न होसे लकीङ भूत ख्योम्ह भ्यामन्या।
येशूये मेनेकेप मासेच र ङाक्की माह्योक्च काट भर्मीकी गेपाक्च
31टुरोसौ क्षेत्र लकीङ ख्योहार होसको सीदोन छान्चै दश वटा सहर लेच डेकापोलिसौ क्षेत्र लकीङ गालीलुङ तालाङ नुङा। 32होला भर्मीकै मेनेकेप मासेच र सेम्ह ङाक्की माह्योक्च काट भर्मीकी येशू लेठाङ राका। अनि होसे मीटाक मीहुट डाम यान्ही डेयार होसकोकी बिन्ती जाटा। 33होसे भर्मीकी येशूये भीड लकीङ चेक पारी सुर मालेच ठावाङ आल्हा। अनि लहो औँलाको होच्यो मेनेकेपाङ सुलुका र औँलाङ न मेठोक ठोकार होच्यो मेलेटकी छुवा। 34येशूये स्वर्गलाक ङोसार लोट्च सास लाचै होसकी डेया, “इफ्फाता#७:३४ इफ्फाता: इसे शब्द चहिँ अरामीकाङ हो, येशूओ पालाङ इस्राएलाङ ङाक्च काट खाल्या भाषा हो।” होच्यो अर्थ हो “खोलीसो।” 35होडीक न बेला होच्यो मेनेकेप सेच छानार ङाक्की ह्योक्च छाना र होसे सेम्हजा ङाक्की ठाला। 36“इसे कुरा सुकीर माडेकी” डेयार होसकै होखुरीककी आज्ञा याहा तर सु-सु भर्मीकोलाक होसकै आज्ञा याहा, होडीक न होखुरीकै र भर्मीकोलाक सेटाक्चै नुङा। 37इसे कुरा सेच भर्मीको अचम्म मन्डीचै छक्क पर्यार डेकी ठाला, “होसकै पट्ट न कुरा सेम्ह जाट्नने, मेनेकेप मासेचकी र सेच र ङाक्की माह्योक्चकी र ङाक्च खास्नने।”
S'ha seleccionat:
मर्कूस 7: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.