मर्कूस 4
4
छोयो भेरेट्चओ उदाहरण
(मत्ती १३:१-२३; लूका ८:४-१५)
1येशूये फेरि तालौ छेवाङ शिक्षा याखी ठाला। होसकुङ वरिपरि वास्टै भर्मीकुङ भीड छान्चबाटै होसको डुङ्गाङ काल्हार ङुवा। भर्मीको चहिँ तालौ छेवाङ न टोङ्हा। 2होटै येशूये होखुरीककी उदाहरण याछै वास्टै कुराको पाहाका र इट डेया, 3“सेनी, काट जना भर्मी छोयो भेरेट्की नुङा। 4छोयो भेरेट्नाङ कोइ छोयोको लामाङ पर्या र ग्वाजाको राहार ज्याम याहा। 5कोइ छोयोको चहिँ ल्हुङ् घारीयाङ पर्या। होला झा धेरै मालेचबाटै होसे छिटो गीटा। 6तर लुप्म जरा मानुङ्चबाटै नाखान खान्ह्रखीङ झीम्र्याक छानार छोका। 7कुडीक छोयोको चहिँ जु घारीयाङ पर्या र जुको ल्होङ्ङ राहा र गीट्च बिरुवाकोलाक हुपार मीस्या स्याकी न माह्या। 8तर कुडीक छोयोको चहिँ सेछ झाङ पर्यार गीटा र ल्होङ्चै नुङा होटै तीस गुणा, साठी गुणा र सय गुणा मीस्या स्याटाका।” 9होटै फेरि होसकै डेया, “सुओ सेच मेनेकेप ले, होचे सेख्यो।”
10जब येशू लाहा काट न छाना, तब बाह्र जना चेलाको र अरु वरिपरि लेचकै होसकोकी उदाहरणौ बारेयाङ गीना। 11येशूये होखुरीककी डेया, “परमेश्वरौ राज्यौ रहस्य नाखुरीककी याम्हने, तर विश्वास माजाट्च भर्मीकोलाक च पट्ट न कुरा ङा उदाहरणाङ न डेले।
12 होखुरीकै ङोस्की च ङोस्ले तर माडाङ्ले,
सेकी च सेले तर माबुझडीस्ले।
नभा च होखुरीकै लहो पाप पश्चात्ताप जाट्च लेया
र होखुरीकुङ पाप क्षमा छान्च लेया। #
यशैया ६:९,१० ”
13येशूये होखुरीककी गीना, “ही नाखुरीकै इसे उदाहरणौ अर्थ माबुझडीसा? होटडेनाङ अरु पट्ट न उदाहरणौ अर्थ कुटजाट्न बुझडीस्ले? 14छोयो भेरेट्चये परमेश्वरौ वचन भेरेट्ले। 15कुडीक भर्मीको लामाङ भेरेटच छोयो ल्याक्च न ले। जब होखुरीकै परमेश्वरौ वचन सेले, तब तुरुन्तै शैतान राल्हे र होखुरीकै सेच वचन आल्खी क्योट्ले। 16होटजाट्न न कुडीक भर्मीको ल्हुङ् घारीयाङ पर्च छोयोको लेखा न ले। होखुरीकै वचन सेच बित्तिकै माह्राङ्छै होसे मीमनाङ लाले। 17तर होखुरीकै जरा माकाच बाटै थोरै दिनसम्म मट्टै ङुले। जब परमेश्वरौ वचनौ कारणै सङ्कष्ट वा सतावट राल्हे, होखुरीक तुरुन्तै विश्वास जाट्की डास्ले।”
18 “कुडीक भर्मीको चहिँ जु घारीयाङ पर्च छोयो ल्याक्च न ले। होखुरीकै परमेश्वरौ वचन सेले, 19इसे संसाराङ कुटजाट्न जीवाकी डेम चिन्ता, धन-सम्पत्तियो लोभ होटै अरु ठोकुङ लालच जाटार परमेश्वरौ वचनकी म्ह्याक्ले र काट हीर मीस्या मास्याटाक्ले। 20तर कुडीक भर्मीको चहिँ मज्जुङ झाङ पर्च छोयो लेखा न हो। होखुरीकै परमेश्वरौ वचन सेले र मीमनाङ लाले अनि तीस गुणा, साठी गुणा र सय गुणा मीस्या स्याटाक्ले।”
सामदान मीटाक डाच बत्तीयो उदाहरण
(लूका ८:१६-१८)
21येशूये होखुरीककी डेया, “सुयेर बत्ती ढाकार डालो म्होकी वा खाट म्होकी डाले र? बत्ती ढाकार च सामदानाङ डाकी पर्च होइन र? 22होटजाट्न न आर्च्युकार डाच कुरा ही-ही ले, होसे पट्ट न टान्हाक्ले र वार्खी माह्योक्च ही-ही कुरा ले होसे पट्ट न वार्खी ह्योक्ले। 23सुओ सेच मेनेकेप ले, होचे सेख्यो।”
24येशूये होखुरीककी फेरि डेया, “नाखुरीकै ही सेमन ले होसे कुराङ ध्यान यान्ही। हीजैडेनाङ नाखुरीकै अरुकी कुसे मानै जापार याल्हे होसे न मानै नाखुरीककी र याल्हे अनि नाखुरीककी झन् वास्टै याल्हे। 25हीजैडेनाङ सुखाटा ले होसकी वास्टै याल्हे तर सुखाटा चेक्जा ले होसे र स्याट्ले।”
मौलडीस्च छोयौ उदाहरण
26येशूये फेरि डेया, “परमेश्वरौ राज्य काट भर्मी ह्याङ छोयो भेरेट्च ल्याक्च न हो। 27होसे भर्मी मीस्नाङ र सोनाङ र नाबीक नाम्सीन होसे छोयो चहिँ गीट्ले र ल्होङ्ले, तर होसे कुटजाट्न ल्होङ्ले, होसे कुरा होचे मावार्ल्हे। 28झये मेल्है न छोयो गीटाक्ले, पहिला टुसा, बाला होटै पूरा मीस्या स्याटाक्ले। 29होटै मीस्या म्हीनरखीङ ह्यामीकै कच्या लार तुरुन्त चेले, हीजैडेनाङ अन्न, बाली सोट्च बेला छान्न भ्याच छान्ले।”
राइगानौ छोयौ उदाहरण
(मत्ती १३:३१-३२,३४; लूका १३:१८-१९)
30येशूये फेरि डेया, “कानै परमेश्वरौ राज्यौ तुलना हीखाटा जाटीङ? अथवा कानै कुसे उदाहरण याहार इसे बारेयाङ पाहाक्की? 31इसे च राइगान छोयौ दाना ल्याक्च न हो, पृथ्वीयुङ पट्ट डेनाङ मार्जा ले। 32जब होसकी रोप्डीले, तब होसे ल्होङ्ले र पट्ट न सागपातौ बिरुवा डेनाङ बाड्को छान्ने। होचे बा-बाड्सो हाँगा बिगाको काले र ग्वाजाकै होच्यो छहारीयाङ मीम खास्की ह्योक्ले।”
33भर्मीकै परमेश्वरौ वचन बुझडीस्की ह्योक्ख्यो डेम येशूये याङ्च न वास्टै उदाहरणको डेया। 34उदाहरण बिना येशूये होखुरीकखाटा माङाका, तर लहो चेलाकोलाक चहिँ अरु सुर भर्मी मालेच बेलाङ पट्ट न उदाहरणौ अर्थ खोलीम याम्हन्या।
येशूये आँधीकी शान्त पार्च
(मत्ती ८:२३-२७; लूका ८:२२-२५)
35होसनीक नाबीलाङ येशूये लहो चेलाकोलाक डेया, “रान्ही काल्हा तालपारी नुइङ।” 36भर्मीकुङ भीडकी डासार चेलाको येशू लेच डुङ्गाङ काल्हा र होसकोखाटा न पारी पट्टी नुङा। अरु डुङ्गाको र होखुरीक खाट-खाट न लेया। 37तर मोसोमायाङ होला बाड्को आँधी क्योसा र डीयौ छालकै डुङ्गा न्हेप्की पा। 38येशू चहिँ डुङ्गौ न्हुङ्लाक पट्टी सिरानी कार मीस्न ङुमन्या। चेलाकै होसकोकी इट डेचै सोटा, “गुरु ज्यु, काल्हाको ठाहार सीकी पाम भ्यामने डेम नाकोकी थाहा माले?” 39होटै होसको सोवार आँधी र तालौ छालकी हक्कारीचै डेया, “शान्त छानो! बहो!” होटै आँधी बाहा र शान्त छाना। 40येशूये होखुरीककी डेया, “नाखुरीक हीजै इटजाट्न बीह्रीछ? नाखुरीककी अझै विश्वास माले?” 41चेलाको साप्फी बीह्रीयार छक्क पर्या अनि मेखुरीक-मेखुरीक गफ जाट्की ठाला, “इसको सु आले? आँधी र तालै र इसकुङ कुरा मन्डीले!”
S'ha seleccionat:
मर्कूस 4: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.