मर्कूस 12
12
खराब मोहीकुङ उदाहरण
(मत्ती २१:३३-४६; लूका २०:९-१९)
1येशूये यहूदी अगुवाकोलाक काट उदाहरण याछै डेया, “काट जना भर्मीये अङ्गुर बारी लैडीया। होच्यो वरिपरि बार काम याहा र काट खाडल कोहार अङ्गुरौ रस चीप्की कोल खास्न याहा। अनि अङ्गुर बारी रुङ्की काट मचान र खास्न याहा। होटै होसे अङ्गुर बारी मोहीकोलाक जिम्मा याहार लाहा चहिँ परदेशाङ ह्वा। 2अङ्गुर म्हीनरखीङ होचे काट जना नोकरकी लहो भाग लाकी मोही लेठाङ बीर्न्हका। 3तर होखुरीकै होसे नोकरकी घोवार डुङा अनि हीर माह्याम मोर्ल्हयाङन बीर्न्हका। 4फेरि मालिकै होखुरीक लेठाङ अर्को नोकरकी बीर्न्हका तर होखुरीकै होच्यो मीटालुवाङ हीर्कडीया र बेइज्जत जाटा। 5मालिकै फेरि अर्को नोकरकी बीर्न्हका तर होसकी होखुरीकै साटा। अरु वास्टै जनाकीर बीर्न्हका तर होखुरीकै कुडीककी डुङा र कुडीककी साटा। 6अन्तिमाङ होसे मालिकौ माया जाट्च काट मट्टै लेन्जा मीजा बाँकी लेया। ‘होखुरीकै ङौ मीजाकी च पक्कै आदर जाट्ले’ डेयार पट्ट डेनाङ न्हुइङ लहो मीजाकी होखुरीक लेठाङ बीर्न्हका।
7 “तर होसे मोहीकै मेखुरीक-मेखुरीक सल्लाह जाटार डेया, ‘इसे च हकदार हो। रान्ही, काल्हा इसकी साटीङ र इच्यौ हकदारी कान न छान्ने।’ 8होटै होखुरीकै मालिकौ मीजाकी घोवार साटा अनि अङ्गुर बारीयो बाहिर लोम्ह याहा।”
9येशूये होखुरीककी गीना, “अब होसे अङ्गुर बारीयो मालिकै ही जाट्ले औला? होसे राल्हे र होसे मोहीकोलाक साट्ले र अङ्गुर बारी अरु मोहीकोलाक याल्हे। 10ही नाखुरीकै धर्मशास्त्राङ इसे वचन मापरेस्नने?
‘कुसे ल्हुङ्की इम खास्च कर्मीकै काम मालग्डीस्ले डेम लोहा होसे न ल्हुङ इमौ गारो सोट्च कोनुङ सुर ल्हुङ छाना।
11 इसे च परमप्रभुये न जाट्च हो,
अनि इसे कानै ङोस्नाङ अचम्मौ ले।’ #
भजनसंग्रह ११८:२२-२३
”
12होटै यहूदी अगुवाकै येशूकी घोकी पा, हीजैडेनाङ इसे उदाहरण होसकै होखुरीकुङ न विरुद्धाङ डेच हो डेयार होखुरीकै वाह्रा। तर होखुरीक भर्मीकुङ भीडखाटा बीह्रीछ कारणै होसकोकी डासार नुङ्की क्योटा।
कर तेरीकी पर्च बारेयाङ गीन्च
(मत्ती २२:१५-२२; लूका २०:२०-२६)
13अनि येशूये ङाक्च कुराङ फसडीकी डेयार होखुरीकै फरिसीको र हेरोद राजाकी डुट्चको मध्युङ कुडीक जनाकोलाक होसको लेठाङ बीर्न्हका। 14होखुरीक राहार येशूकी डेया, “गुरु ज्यु, नाकै साँचो कुरा ङाक्ले डेम कानकी थाहा ले। भर्मीकै ही डेले डेयार नाकै वास्ता माजाट्ले हीजैडेनाङ नाकै सुओर मेङ्गेर ङोसार काम माजाट्ले। तर परमेश्वरौ लाम साँचोखाटा पाहाक्ले। कानकी डेनी, कैसरकी कर तेरीकी सेम्ह ले की माले? 15कानै कर तेरीइङ की मातेरीइङ?”
तर येशूये होखुरीकुङ कपटी विचार थाहा छानार होखुरीककी डेया, “नाखुरीक हीजै ङाकी परीक्षा जाट्ले? काट रोमी सिक्का राकार ङाकी टान्हाक्नी।”
16होखुरीकै काट रोमी सिक्का राकार याहा। अनि येशूये होखुरीककी डेया, “इसे फोटो र म्यार्मीन सुओ हो?” होखुरीकै होसकोकी डेया, “कैसरौ हो।”
17तब येशूये होखुरीककी डेया, “कैसरौ जति कैसरकी यान्ही र परमेश्वरौ जति परमेश्वरकी यान्ही।” होसकुङ याङ्च कुरा सेयार होखुरीक छक्क पर्या।
सीच लकीङ जीवाच बारेयाङ गीन्च
(मत्ती २२:२३-३३; लूका २०:२७-४०)
18होटै न्हुइङ सीच लकीङ जीवार मासोले डेच कुडीक जना सदुकीको येशू लेठाङ राहार होसकोकी गीना, 19“गुरु ज्यु, मोशै कानकी रीक्ङ याम्हने की सुओर डाजे मीजाको माछान्न न सीया डेनाङ भाये होसे सीच डाजेयौ मास्टोखाटा न ब्याहा जाट्की पर्ले र लहो डाज्यौ लागि मीजाको खास्की पर्ले।#व्यवस्था २५:५-६
20“काट परिवाराङ सात जना डाजेभाइको लेया। जेठै ब्याहा जाटा, तर होसे मीजाको माछान्न न सीया। 21होटै माइला भाये होसे सीच डाज्यौ मास्टोकी ब्याहा जाटा र होसे र मीजाको माछान्न न सीया। अनि साइला भाये र होटन जाटा। 22सातै जना भाइकै होसे सीच डाज्यौ मास्टोखाटा न ब्याहा जाटा, तर मीजाको माछान्न न सीयार पट्ट डेनाङ न्हुइङ होसे मास्टो र सीया। 23अब सीचको जीवाम सोनाङ होखुरीक मध्याङ होसे सुओ मास्टो छान्ने? हीजैडेनाङ होसे सात जनै न होसे मास्टोकी ब्याहा जाट्नन्या।”
24येशूये होखुरीककी डेया, “नाखुरीक बाड्को भुलाङ पर्नने हीजैडेनाङ नाखुरीकै न त धर्मशास्त्र वार्न्हने न त परमेश्वरौ शक्तिकी वार्न्हने। 25हीजैडेनाङ जब सीच लकीङ फेरि जीवाले होखुरीकै न त ब्याहा जाट्ले, न त होखुरीककी ब्याहा न जाट्न याल्हे तर होखुरीक स्वर्गाङ लेच स्वर्गदूतको ल्याक्च न छान्ने।
26 “सीच भर्मीको जीवाम सोच कुरौ बारेयाङ ही नाखुरीकै मोशौ किताबाङ मापरेस्नने? कुटजाट्न म्हे ढाम ङुच पोथ्रा लकीङ परमेश्वरै मोशाकी डेया, ‘ङा अब्राहामौ परमेश्वर, इसहाकौ परमेश्वर र याकूबौ परमेश्वर हो।’ #
प्रस्थान ३:६
#१२:२६ येशूओ विचाराङ इडीक इखुरीक खायाकुङ सोम भर्मी लकीङ परमेश्वरौ आराधना छान्नन्या डेनाङ, चाहाँ होसे सोम जना जिउँदै न लेकी पर्च, हीजैडेनाङ होसको जीवित परमेश्वर हो। 27होसको सीचकुङ परमेश्वर होइन तर जीवाचकुङ हो। नाखुरीक बाड्को भुलाङ पर्नने।”
पट्ट डेनाङ बाड्को आज्ञा
(मत्ती २२:३४-४०; लूका १०:२५-२८)
28धर्मगुरुको मध्याङ काट जना राहा, होचे येशू र सदुकीको लाहा लाहाङ विवाद जाट्न ङुच सेया। अनि होचे येशूये भर्मीकोलाक ठिक जवाफ याछ डाङार होसकोकी गीना, “पट्ट आज्ञाकोवाङ मुख्य चहिँ कुसे हो?”
29येशूये जवाफ याहा, “पट्ट डेनाङ मुख्य चहिँ इसे न हो, ‘ए इस्राएलीको सेनी, परमप्रभु कानुङ परमेश्वर काट मट्टै परमप्रभु हो। 30नीये परमप्रभु लहो परमेश्वरकी नुओ पूरा हृदय, पूरा प्राण, पूरा मीमनै र नुओ पूरा शक्तिये माया जाट्की।’#व्यवस्था ६:४-५ 31र दोस्रो चहिँ इसे हो, ‘नीये लहो छिमेकीकी लाहाकी लेखा न माया जाट्की।’#लेवी १९:१८ इसे डेनाङ बाड्को अर्को आज्ञा माले।”
32होसे धर्मगुरुये येशूकी डेया, “गुरु ज्यु, नाकै ठिक डेया, परमेश्वर काटन ले र होसको बाहेक अर्को सुर माले। 33र होसकोकी पूरा हृदये, पूरा मीमनै, पूरा शक्तिये माया जाट्की र छिमेकीकी लाहाकी लेखा न माया जाट्की, पट्ट खाल्या होमबलि र बलिदानको डेनाङ बाड्को हो।”#होशे ६:६ 34होचे बुद्धि ओल्होकार जवाफ याछ डाङार येशूये होसकी डेया, “नाङ परमेश्वरौ राज्य लकीङ लोस माले।” अनि होसनीक लकीङ होसकोकी गीन्च सुओर हिम्मत माछाना।
मुक्ति याछ ख्रीष्टौ बारेयाङ गीन्च
(मत्ती २२:४१-४६; २३:१-३६; लूका २०:४१-४७)
35परमेश्वरौ मन्दिराङ पाहाक्ङन लेनाङ येशूये डेया, “कुटजाट्न मुक्ति याछ ख्रीष्ट दाऊदौ मीजा हो डेम धर्मगुरुको डेले? 36हीजैडेनाङ दाऊद लहे न पवित्र आत्मा लकीङ डेमने,
‘परमप्रभुये ङौ प्रभुकी डेया,
नाको ङौ डोरमीहुट पट्टी # १२:३६ डोरमीहुट पट्टी: शक्ति र इज्जतौ ठाउँ। ङुनी,
जबसम्म ङा नाकुङ शत्रुकोलाक नाकुङ पैताला म्होकी माडाले।’ #
भजनसंग्रह ११०:१
37 “र दाऊद लाहा न ख्रीष्टकी ‘प्रभु’ डेले, अनि कुटजाट्न मुक्ति याछ ख्रीष्ट होच्यो मीजा छाना ट?”
होला लेच भर्मीकुङ भीडै येशूओ वचन माह्राङ्छै सेया।
38होटै शिक्षा यान्हाङ येशूये डेया, “धर्मगुरुकोखाटा होशियार छान्नी। होखुरीक लोट्च बढीन बील्खी र बजाराङ ह्वानाङ लाहाकी मान जाट्ख्यो डेच मीमन जाट्ले, 39अनि सभा ङुच इमाङ सेछ ठाउँ र भोजाङ आदर याख्यो डेच मीमन जाट्ले। 40होखुरीकै विधवाकुङ इम स्याट्ले र अरुकै धर्मी डेख्यो डेम टान्हाक्कीयो लागि लो-लोट्च प्रार्थना जाट्ले। होङ्चकै झन् वास्टै दण्ड डुप्ले।”
विधवै याछ भेटी
(लूका २१:१-४)
41येशू परमेश्वरौ मन्दिराङ भेटी काच बाकस अगाडि ङुवार भर्मीकै भेटी काच ङोसा। धनी भर्मीकै वास्टै-वास्टै पैसा का। 42र काट गरीब विधवा राहार तामौ मार्जा सिक्का का। 43येशूये लहो चेलाकोलाक लाहा लेठाङ आर्घार होखुरीककी डेया, “साँच्ची न ङा नाखुरीककी डेले, इसे गरीब विधवै अरु पट्ट डेनाङ वास्टै भेटी कामने। 44हीजैडेनाङ पट्टकै लाहा लहो प्रशस्त लेच धनीङ का तर इसे विधवै चहिँ लहो गरीबी लकीङ मेन पट्ट जीविका क्योट्की पर्च न याहा।”
S'ha seleccionat:
मर्कूस 12: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.