लूका 24
24
येशू सीच लकीङ जीवाम सोच
(मत्ती २८:१-१०; मर्कूस १६:१-११; यूहन्ना २०:१-१०)
1आइतबारनीक गोराक न होसे मास्टोको लहे तयार खास्च बासना राछ मलम र अत्तर लार होखुरीक येशूओ चिहानाङ राहा। 2होखुरीकै चिहानौ मेङ्गेर हुप्च ल्हुङ्की सारीम डाच डुपा। 3होखुरीक चिहान भित्री पर्यार ङोस्नाङ होला प्रभु येशूओ लाश माडाङा। 4होखुरीक इसे कुराङ अलमल्ल छान्न ङुमन्या। मोसोमायाङ होला चहकिलो बढीन बील्छ नीस जना भर्मी होखुरीकुङ छेवाङ टोङ्छ डाङा। 5मास्टो भर्मीको बीह्रीयार झाङ ङोसार घुकुरुक छाना। तर होसे नीस जना भर्मीये इट डेया, “नाखुरीक जिउँदो भर्मीकी सीचकुङ मीघ्याङ हीजै पाले? 6होसको इला माले, तर जीवाम सोम भ्यामने। गालीलाङ लेनाङ होसकै नाखुरीककी ही डेमन्या होसे आर्मीट्नी। 7भर्मीयो मीजाकी पापी भर्मीकुङ मीहुटाङ पर्की र क्रूसाङ टङ्गडीस्की र सोमयाकाङ जीवाम सोकी आवश्यक ले।” 8होडीक बेला मट्टै होखुरीकै येशूये डेच वचन आर्मीटा।
9चिहान लकीङ ल्हेसार राछ न्हुइङ होखुरीकै लहे डाङ्च पट्ट न कुराको एघार जना चेलाको र अरु पट्ट चेलाकोलाक सेटाका। 10होसे मास्टोको चहिँ मरियम मग्दलिनी, योअन्ना र याकूबौ मोइ मरियम र अरु मास्टोको र लेया। इखुरीकै न इसे कुरा एघार जना प्रेरितकोलाक सेटाका। 11तर चेलाकै इसे कुरा नाखुरीकै बित्थाङ न डेच हो डेम विश्वास माजाटा। 12तर पत्रुस चहिँ जुरुक सोवार चिहानलाक खेर्न नुङा र घुकुरुक छानार चिहान भित्री ङोस्नाङ कात्रो मट्टै डाङा। याङ्च घटना डाङार होसे अचम्म मन्डीचै ल्हेसा।
इम्माउसौ लामाङ येशू
(मर्कूस १६:१२-१३)
13होसनीक न येशूओ नीस जना चेलाको यरूशलेम लकीङ एघार किलोमिटर टडीक लोस लेच इम्माउस डेच लाङ्घालाक नुङ्ङ न लेया। 14होखुरीक चाम-चाम छान्च पट्ट न घटनौ बारेयाङ कुरा जाट्न न लेया। 15इटजाट्न होखुरीक लाहा लाहाङ कुरा जाट्चै र छलफल जाट्चै ह्वामन लेनाङ येशू मेखोल्हा न खेरेप राहार होखुरीकखाटा न ह्वाकी ठाला। 16तर होखुरीकुङ मीमीककी चहिँ येशूकी चीन्डीकी माह्योक्च खास्न याम्हन्या। 17होटै येशूये होखुरीककी गीना, “नाखुरीक हीयो बारेयाङ कुरा जाट्न ह्वामने?” होखुरीक निराश छान्चै टोङ्हा। 18होसे नीस जना मध्याङ क्लेओपास डेच काट जनै चहिँ होसकोकी डेया, “होइन, नाको यरूशलेमाङ ङुले होइन र? होला चाम-चाम छान्च घटनौ बारेयाङ नाकोकी थाहा माले?” 19होसकै होखुरीककी गीना, “कुङ्च घटना?” होखुरीकै डेया, “नासरतुङ येशूओ बारेयाङ छान्च कुरा। होसको काट जना अगमवक्ता लेया। परमेश्वर र पट्ट भर्मीकुङ म्याहासाङ वचन र कामाङ शक्तिशाली लेया। 20तर मुख्य पूजाहारीको र कानुङ शासककै होसकोकी मृत्युदण्डौ लागि जिम्मा याहा। होटै होसकोकी भर्मीकै क्रूसाङ टङ्गडीया। 21कानै होसकै न इस्राएलीकोलाक छुटकारा याल्हे डेम आशा जाट्नन्या। तर होसकोकी क्रूसाङ टङ्गडीच र छीनी सोम याक छान्नभ्या। 22कानुङ कुडीक जना डैबहिनीकै डेच कुरै कानकी अचम्म खास्नने। होखुरीक छीनी गोराक न चिहानाङ नुङा। 23तर होखुरीकै होला येशूओ लाश माडुपा। होटै होखुरीक ल्हेस्न राहार कानकी सेटाका, ‘कानै स्वर्गदूतकोलाक डाङा’ होखुरीकै न ‘येशू जिउँदो न ले’ डेच कुरा सेटाका। 24इसे कुरा सेयार कानुङ कुडीक जना लाफाको र चिहानाङ ङोस्की नुङा। होटै होसे मास्टोकै डेच लेखा न डुपा, तर होसकोकी चहिँ माडाङा।”
25येशूये होखुरीककी डेया, “ए मूर्ख भर्मीको, नाखुरीकुङ मीमन बोधो छान्नने। अगमवक्ताकै डेच कुराको र विश्वास माजाट्ले! 26ही आदर डुप्की डेनाङ अघि मुक्ति याछ ख्रीष्टै इसे दु:ख भोग्डीकी मापर्ले र?” 27होटै येशूये मोशा लकीङ लार पट्ट अगमवक्ताकै धर्मशास्त्राङ लहो बारेयाङ रीक्च कुराको होखुरीककी बुझडीम याहा।
28होखुरीक नुङ्चै जाट्च इम्माउस लाङ्घौ खेरेप टाहार येशू होटै र लोस नुङ्की पानाङ लेखा जाटा। 29तर होसे नीस जनै न होसकोकी इट डेम कर लैडीया, “छीनी कानखाटा न बास ङुनी, हीजैडेनाङ नामबीक्ङ भ्यामने।” होटै होसको होखुरीकखाटा न बास ङुवा। 30येशू होखुरीकखाटा ज्याकी ङुनाङ रोटो लार धन्यवाद याम्ह रोटो ग्याकार होखुरीककी पुङ्ङ याहा। 31होखुरीकुङ मीमीक खोलीसा र येशूकी चीन्डीया। तर होसको होडीक न बेला होखुरीक लकीङ अल्पडीसा। 32होखुरीक मेखुरीक-मेखुरीक डेकी ठाला, “होसको कानखाटा लामाङ कुरा जाट्नाङ र कानकी धर्मशास्त्रौ अर्थ खोलीम यान्हाङ ही कानुङ मीमन आनन्द माछान्नन्या र?”
33होखुरीक होडीक बेला न सोवार यरूशलेमाङ ल्हेस्न राहा। होला एघार जना चेलाको र होखुरीकखाटा भेला छान्च अरु भर्मीकै 34इट डेम ङुच डुपा, “प्रभु साँच्ची न जीवाम सोमने र सिमोनै डाङ्च हो लेसा।” 35होटै होसे नीस चेलाकै लामाङ छान्च पट्ट न कुराको र येशूये रोटो ग्याकार यान्हाङ कुटजाट्न होसकोकी चीन्डीया डेच बारेयाङ होखुरीककी सेटाका।
चेलाकोलाक येशूओ दर्शन
(मत्ती २८:१६-२०; मर्कूस १६:१४-१८; यूहन्ना २०:१९-२३; प्रेरित १:४-८)
36होखुरीकै इसे कुरा जाट्न न लेनाङ येशू होखुरीकुङ मीघ्याङ मोसोमायाङ टोङ्हार डेया, “नाखुरीककी शान्ति छान्ख्यो।” 37होखुरीक खेङ्रेक गान्हा र बीह्रीया, “कानै च प्रेत टी डाङा” डेम आर्मीटा। 38तर येशूये होखुरीककी डेया, “नाखुरीक हीजै इटजाट्न बीह्रीछ र मीमनाङ याङ्च शंका जाट्ले? 39ङौ मीहुट र मीकु ङोस्नी, ङा न हो, ङाकी छुवार ङोस्नी। हीजैडेनाङ प्रेतौ च मीस्या र हाडो माछान्ने, तर नाखुरीकै डाङ्ङने, ङौ च ले।” 40इट डेयार होसकै होखुरीककी लहो मीहुट र मीकु टान्हाका। 41होखुरीक माह्राङार पट्डीकी माह्योक्ङ छक्क पर्च डाङार होसकै होखुरीककी डेया, “नाखुरीकखाटा हीर ज्याच कुरा ले?” 42होखुरीकै जोम डाच काट टुक्रा डीस्या होसकोकी याहा। 43होटै होसकै डीस्या लार होखुरीकुङ म्याहासाङ न ज्या। 44होसकै होखुरीककी डेया, “ङै नाखुरीकखाटा लेनाङ डेच कुराको इसे न हो। ‘ङौ बारेयाङ मोशौ व्यवस्था, अगमवक्ताकुङ किताब र भजनसंग्रहाङ रीक्च पट्ट कुराको ओल्खी न पर्ले’ डेम नाखुरीकखाटा ङै डेमन्या।”
45होटै होसकै होखुरीककी धर्मशास्त्राङ रीक्च कुराको वार्खी ह्योक्च शक्ति याहा। 46होसकै होखुरीककी डेया, “इटजाट्न रीक्ङने, मुक्ति याछ ख्रीष्टै दु:ख भोग्डीयार सोम याकाङ सीच लकीङ जीवाम सोकी पर्ले। 47होटै यरूशलेम लकीङ सुरु जाटार पट्ट न जातियुङ भर्मीकोलाक होसकुङ म्यार्मीनाङ पश्चात्ताप जाटार पापौ क्षमा बारेयाङ सेटाक्की पर्ले। 48इसे कुराकुङ साक्षी चहिँ नाखुरीक न हो। 49सेनी, ङौ बोये जाट्च प्रतिज्ञा ङा नाखुरीक लेठाङ बीर्न्हकाले। तर स्वर्ग लकीङ राछ शक्तिये मान्हेप्ठरसम्म नाखुरीक इसे सहराङ न ङुनी।”
येशूकी स्वर्गाङ गाराङ्ङ आल्छ
(मर्कूस १६:१९-२०; प्रेरित १:९-११)
50होटै न्हुइङ येशूये चेलाकोलाक बेथानियासम्म आल्हार लहो मीहुट सोटार होखुरीककी आशिष याहा। 51आशिष यान्हाङ-यान्हाङ न होसको होखुरीक लकीङ भा होटै स्वर्गाङ गाराङ्ङ आल्हा। 52होखुरीकै होसकोकी झोरा र माह्राङ्छै यरूशलेमाङ ल्हेस्न राहा। 53होटै होखुरीक सधैँ परमेश्वरौ प्रशंसा जाट्चै परमेश्वरौ मन्दिराङ ङुकी ठाला।
S'ha seleccionat:
लूका 24: EMGP
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by Mother Tongue Translators Society and Wycliffe Bible Translators, Inc.