Nʋnʋlii 15

Zezwii a ‑nʋa a 'yukugänɩwaa yɛ ‑mä Zeluzalɛɛmö 'wlu 'yɩbhä

1‑Lɛ a 'tɛnyɩ 'la 'mö, nɩkpa ‑mumuë 'bhöönɩ ‑mä Zwidee‑bhölɩɩ 'mö, 'n wa yiɛ ‑mä Atiɔsɩ yi. Zezwii a ‑nʋa ‑wa ‑wʋä ‑mä, 'n wa yuëë 'cɩa nɩɩ: «Sɛɛ Moyizɩ 'a Gböö gbää, wa 'nanyɩ ‑sɩbhä 'wʋ ‑dɩɩ, a 'naa 'kä Lagɔ 'a 'pʋpʋɛ ghlɩ.» 2Wa gbää sa'aa, Pɔɔlʋ ‑nyɛ Banabasɩ 'sɔ, yɩ 'nuëë dlɩ yɔwʋ nɛmanɩ. Zaa, wa ‑nyɛ nɩkpa 'la 'sɔ, 'n wa yiɛ tenyii kpɛnɩ. Atiɔsɩ a ‑nʋa, 'n wa yiɛ ‑sɩbhä a za nɩkpa ‑sɛ. Pɔɔlʋ mɔ, Banabasɩ mɔ, 'n wa gla'mö a ‑nʋä ‑mumuë'ɛ, wa 'kä ‑mä Zeluzalɛɛmö mö. Zezwii a ‑nʋa ‑wa ‑wʋä ‑mä, 'wa 'yukugänɩwaa muë, 'n Zezwii 'a tietiewaa, wa 'kä kïbhë 'la yɔwʋ yɩlɩ. 3Pɔɔlʋwa 'kää möä yii, 'n Zezwii a ‑nʋa ‑wa ‑wʋä ‑mä Atiɔsɩ yuëë 'yio 'wʋ kwä. Wa ‑wʋä mö dɔ'wʋʋ, Fenisii‑bhölɩɩ ‑nyɛ Samalii‑bhölɩɩ 'sɔ 'mö ‑mä wa 'tʋä 'wʋ. Nɩkpaa ‑waaa Zwiiföwa glɩnɩ, sɛ wa yɩbhlɩnɩɛ Lagɔ a tɩtɩɩ, 'mö wa 'nyʋää, 'n yɩ yuëë 'mäna 'mö ‑päla tenyii. 4Wa ghlɛɛ ‑mä Zeluzalɛɛmö, Zezwii 'a tietiewaa muë, ‑mä ‑zɩkpaa 'mö a 'yukugänɩwaa muë, 'n Zezwii a ‑nʋä ‑muë'la 'wuë, 'n wa yuëë sasɛ päla. ‑Lii 'wuë Lagɔ nʋnuëë 'möö, 'n Pɔɔlʋwa yiɛ yɩ 'tɩtɩ ‑sɛ. 5‑Maa Zwiiföwaa a ‑zɩkpa wa laa Falizɩɛwaa, nɩkpa ‑mumuë ‑wa glɩnɩ a‑a ‑mä a ‑nʋä 'wë 'n wa yiɛ Zezwii a ‑nʋä 'zʋʋ, wa ‑wʋmö a ‑mä Zeluzalɛɛmö a ‑nʋa ‑wa ‑gänɩɛ Zezwii gla'mö. Nɩkpa 'la, Pɔɔlʋwa ‑sɛɛ tɩtɩɩ 'wëë, 'n wa yiɛ 'wʋ ‑sɔ, wa lɛ naa: «Nɩkpaa ‑waaa Zwiiföwa glɩnɩ ‑wa 'zʋä Zezwii a ‑nʋä, wa nɩ ‑duë 'wʋ, wa nɩ 'nyʋä 'dɩ, wa 'kä Moyizɩ 'a Gböö 'wuë 'klʋkpamö 'zʋ klɩpaa.» 6Nɩkpa 'la gbää sa'aa, Zezwii 'a tietiewaa wa ‑nyɛ ‑mä a 'yukugänɩwaa 'sɔ, 'n wa yiɛ 'wlu 'yɩbhä, wa 'kä kïbhë 'la 'ylɩmö. 7Wa ‑sɛsɛniiɛ ‑gömö ‑këë, 'n Piɛlɩ yiɛ 'wʋ ‑sɔ ɔ lɛ naa: «‑A'bhɩanyɩ, a'bhï a ‑yi sɛ nɩɩ dɛɛ Lagɔ ‑saa ‑lɛ ‑mä a jijo'wʋ, n 'kä ‑waaa Zwiiföwa glɩnɩ Lagɔ 'a 'Mänatɩtɩɩ 'nyɛ, wa 'kɩ 'nʋ wa 'kɔ dlɩ 'tɛɛnɩ, ‑lɛ yɛ 'mö gwälɛ. 8Lagɔ a'bhë ‑ɔ ‑yiɛ nɩkpɛ a 'mlɩ a dlɩɩ, sɛ ɔ zʋʋnyɩɛ 'Wugɔmʋʋ 'Wlɩlɩ ‑gömöö, ‑waaa Zwiiföwa glɩnɩɩ, ‑sɩbhä ɔ 'zʋmuënyɩɛ ‑gömö. Sa'a ɔ tulanɩɛ 'ylimö nɩɩ, ɔ yɛ 'wʋ nglu wa 'kä ɔ ‑nʋä 'zʋmö. 9‑A ‑nyʋä 'sɔ a dɔ'wʋ Lagɔ 'nɩɛ 'mö gbäzɩ. Miɛ nɩɩ, sɛ wa 'tɛɛnɩɛ Zezwii dlɩ a za, nza Lagɔ pälaa 'wa dilaa 'wlɩlɩ. 10Zaa, Moyizɩ 'a Gböö ‑yɩ 'kä bhɩɛɛ 'gbluku 'kädɩ, tɛɛnɩ ‑mä ‑aa dɩbawa a dɩbawa a 'tɛnyɩ 'mö ‑këë zɩ'ɛ ‑bɛ 'nɩɛ bhɛmanɩɩ, ‑wa 'tɛɛnɩɛ Zezwii dlɩɩ, sɛ yɩ ‑wʋ ɔ 'mö 'n a 'yɩbhä bhä a 'kʋänyɩ 'wlu sula nɩ? A ‑kä ‑sɩbhä 'zʋʋ, Lagɔ 'naa 'kä ‑wa 'lɩlɩlɩ. 11‑Maa Lagɔ 'a 'pʋpʋɛ a dɔ'wʋ, sɛɛ ‑a'a wɛlɩɩ ‑wʋä, ‑sɩbhä wa ‑nɩɩ ‑wʋmöä. ‑A 'wuë sɛ ‑a 'tɛɛnɩɛ Lagɔ dlɩ nɩɩ, ‑Alowli Zezwii Kliisɩ a bɔɔmö a za ɔ 'pää ‑aa ngäzɩdlɩɩ, ‑sɩbhä ma‑a puëanyɩɛ.» 12Piɛlɩ ‑sɛnɩɛ ‑sɩbhä 'mö 'wëë, nɩkpaa 'wuë 'n wa yiɛ ‑vlɩɩ 'zʋ, wa 'kä Banabasɩ ‑nyɛ Pɔɔlʋ 'sɔ 'yukwli ‑pʋnɩ. Nɩkpa 'la 'sɔ ‑kpɔ ‑mä ‑waaa Zwiiföwa glɩnɩ jijo'wʋ a zɩzɛlii 'wuë Lagɔ ‑bhɛnuëë 'möö, 'n wa yiɛ yɩ 'tɩtɩ ‑sɛ. 13Wa ‑sɛɛ 'tɩtɩ 'wëë, 'n Zaakö yiɛ 'wʋ ‑sɔ, ɔ lɛ naa: «‑A'bhɩanyɩ, a ‑pʋnɩ 'yukwli n 'kä 'mö ‑sɛnɩ. 14N nɛ naa: ‑Waaa Zwiiföwa glɩnɩ, sɛɛ Lagɔ yiluëë tɛkädɔ'wʋ 'klʋ, 'n ɔ yiɛ wa gla'mö nɩkpa ‑lɛ ‑sɛ wa 'kä ɔ ‑nʋä 'zʋ, ‑lɛ a wɛlɩɩ 'mö Simɔɔ Piɛlɩ 'bhöönyɩɛ ‑sɩkaa 'nyɛɛ. 15‑Maa wɛlɩ 'la ‑nyɛ Lagɔ 'a 'möbhilanɩwaa a wɛlɩɩ 'sɔ ‑bhlʋ yɩ glɩnɩɛ. Sɛ'ɛ wa 'cɛlɩ a‑a nɩɩ, 16Lagɔ lɛ naa:

'Tɛnyɩ ‑mɛmɛɛ ‑kä ghlɛɛ, n yi 'bɩwʋ yi,

Daviidɩ 'a ‑buduu ‑wʋ bhli a‑a,

n yu 'sɔ 'sɩbhänɩ.

Wʋ sɛɛ nyimo a‑a,

n yi ‑sɩbhä 'wlu gïganɩ, wʋ yi 'wʋ daa nimï yi.

17 ‑Lɛ a dɔ'wʋ ngäya ‑mi'la 'wuë 'mö a nɩkpaa,

wa yi sɛ tɛlɩ wa ‑kaa yɩbhlɩnɩ.

Ɛ'ɛ ‑bhö nyɩasɛ,

‑maa 'bhlɩbhëa 'wuë 'mö n ‑sɛɛ ‑lɛ, wa 'kä na ‑nʋä zʋ.

18 ‑Amö a ‑lowli Lagɔ,

wɛlɩɩ n bhïla a‑a bhlagɔgɔ 'möö,

sa'a ‑sɩbhä n 'kɩɛ 'yli 'wälanɩ. # 15.16-18 Amɔɔsɩ 9.11-12.

19‑Sɩbhä a za ‑amö Zaakö, n gbää nɩɩ, nɩkpaa ‑waaa Zwiiföwa glɩnɩ ‑wa yɩbhlɩnɩɛ Lagɔ, ɛ ‑kä 'na dɔ'wʋʋ, ‑a nɩ tuë 'fʋ yɔlɔa. 20‑Maa ‑a nɩ 'cɛluë 'wʋ cuu nɩɩ: Wa ‑kä nɩmɛ 'fʋ a ‑lagɔ bʋbɔnɩɩ, wa nɩ tɛ li, ɛ'ɛ ‑bhö nyɩasɛ, ‑maa fɩ ɛ ‑plɛɛ Lagɔ a 'yila 'klʋ a dɔ'wʋ. Kii Moyizɩ gbää wa nɩ tɩ 'mö kwäkwänɩɩ, wa nɩ 'zwi 'klʋkpamö. Nɩmaa ‑yɩɩɛ dlu 'mö sa‑aa, wa nɩ ti li. Wa nɩ tɩ nɩmadlu li. 21Ɛ'ɛ ‑bhö nyɩasɛ, ‑maa Moyizɩ 'a Gböö, tɛɛnɩ ‑mä bhlagɔgɔ'mö ‑këë zɩ'ɛ, ‑mä ‑gwlɩɩ 'wuë ‑gömö, ‑mä a Zwiiföwaa a Lagɔbïdii 'mö, sɛɛ ‑gwlɛnɩzlɩ ghlɛɛ, ‑sɩbhä wa zɛlɩniɛ ‑mä 'mö. Zaa, kïbhï nɩ yɩ ‑yio saa 'wuë.»

Wa yɛ Zezwii a ‑nʋa ‑waaa Zwiiföwa glɩnɩɩ 'bɔgʋ 'wʋ 'pä

22Zaakö gbää sa'a 'wëë, Zezwii 'a tietiewaa muë, ‑mä a ‑zɩkpaa a 'yukugänɩwaa muë, 'n Zezwii a ‑nʋä ‑muë'la 'wuë, 'n wa yiɛ nuë 'wʋ 'suëna, 'n wa yiɛ nɩkpa ‑mä wa gla'mö ‑sɛ, wa ‑nyɛ Pɔɔlʋ ‑nyɛ Banabasɩ 'sɔ, wa 'kʋä ‑mä Atiɔsɩ tie. Wa ‑sɛ Zwidɩ wa la'ɛɛ Basabasɩ, 'n nɩkpɛ ‑mɔmɔɔ wa laa Silasɩ. Nɩkpa 'la, dɛsɛ wa kää tenyii ‑mä Zezwii a ‑nʋa ‑wa ‑wʋä ‑mä Zeluzalɛɛmö gla'mö. 23Nɩkpa 'la, 'n wa yuëë 'bɔgʋʋ yowʋ 'nyɛ. Wʋ 'mö a wɛlɩɩ miɛ dɛ'ɛ:

«Abhʋa 'nɩɛ Zwiiföwa glɩnɩ 'n a yiɛ ‑aa ‑daayuë 'zʋ Zezwii Kliisɩ a za‑a, abhʋaa ‑wʋä ‑mä Atiɔsɩ glɔ 'mö, ‑mä Silii‑bhölɩɩ 'wuë 'mö, 'n ‑mä Silisii‑bhölɩɩ 'wuë 'mö, ‑abhʋa Zezwii 'a tietiewaa ‑a ‑nyɛ mä'ä a ‑zɩkpaa a 'yukugänɩwaa 'sɔ, a 'wuë ‑a bhälanyɩ. 24‑Maa wa lɛ naa, nɩkpa ‑mumuë mʋa 'bhöönɩɛ mä'ä 'n wa yiɛ ‑mä 'a mä'a mö, wɛlɩɩ wa 'cɩanyɩɛ, 'n yɩ yeanyɩɛ dlɩ 'yli käla, ‑sɩbhä a za, a yɛ kɔmanɩ. Sɛ wa 'zʋä da'aa, ‑abhʋaa 'nuë ‑sɩbhä 'wʋ tie. 25‑Sɩbhä a za, ‑a 'wuë a‑a yiɛ 'wlu 'yɩbhä, a‑a yiɛ dlɩ ‑bhlʋ 'mö nuë 'wʋ 'suëna, a‑a yiɛ nɩkpa ‑sɛ, ‑a 'kanyuë 'wʋ tie. Nɩkpa 'la, ‑aa dlɩsɛkädaayuë Banabasɩ ‑nyɛ Pɔɔlʋ 'sɔ, 26‑wa ngluä 'wʋ wa 'kä Zezwii Kliisɩ 'a libhoo a za 'klɩ yɩ, wa 'kä wʋ 'wlumö 'ku a'bhëë, 'mö wa 'kää 'yio 'wʋ ‑lɛ. 27Nɩkpa 'la ‑a ‑sɛɛ, ‑mɔ a nglɩɛ Zwidɩ, ‑mɔ a nglɩɛ Silasɩ. 'Bɔgʋʋ ‑a 'cɛlanyɩɛ dɛ'ɛ 'wʋʋ, mʋa 'kanyuä ‑lɛ, ‑a'a sɛ ‑a gbää 'tɩɩ, mʋa 'kanyɩɛ ‑sɩbhä sasɛ dlɩ ‑gömö ‑sɛsɛnɩ. 28‑Maa 'Wugɔmʋʋ 'Wlɩlɩ ‑nyɛ ‑abhʋa 'sɔ, sɛɛ nɛnɩnyɩɛ dlɩ yɔwʋʋ, ‑sɩbhä ma‑a nɩɩ: ‑A 'naa 'kanyɩ 'gblukwë ‑mämaa sula, 'n ɛ 'nɩ ‑bhö kïbhï nɩ ‑yɩ kää dɛsɛ a 'yize mii, miɛ nɩɩ: 29Wa ‑kä nɩmɛ 'fʋ a ‑lagɔ bʋbɔnɩɩ, a nɩ tɛ li. Nɩmaa ‑yɩɩɛ dlu 'mö sa‑aa, a nɩ ti li. A nɩ tɩ nɩmadlu a'bhë li 'lɩlɩlɩ. Kii Moyizɩ gbää wa nɩ tɩ 'mö kwäkwänɩɩ, a nɩ 'zwi 'klʋkpamö. Kïbhï 'la, a ‑kɩɩ 'klʋkpamö 'zʋ klɩpaa, yɩ nɛnɩ tenyii. A‑ayo ‑këë.»#15.29 Levitiikö 17.10-16; 18.6-18 30Nɩkpaa wa tie a‑a, 'n wa yiɛ kɩnɩ. ‑Mä Atiɔsɩ, 'n wa yiɛ ‑mä 'bɔgʋʋ kwä. Wa ghlɛɛ glɔɔ, Zezwii a ‑nʋa 'wuë ‑wa ‑wʋä ‑mä, 'n wa yuëë 'wlu 'yɩbha 'n wa yuëë 'bɔgʋʋ yowʋ 'nyɛ. 31'Bɔgʋ 'la, wa zeluä 'möö, ‑mä a 'yliyɔwʋtɛmanɩtɩtɩɩ ‑yɩ cɛlɩɛ ‑mä, Zezwii a ‑nʋa 'wuë, 'n yɩ yuëë 'mäna 'mö päla. 32Zwidɩ ‑nyɛ Silasɩ 'sɔ, Lagɔ a 'möbhïlanɩwaa wa glɩnɩɛ. Zaa, wa zɛlɩɛ 'bɔgʋʋ 'mö 'wëë, 'n wa yi'ɛɛ wabhlɩ ‑bɛ 'wʋ wa ‑daayuë 'la 'dɩ 'mö zʋ, 'n wa yuëë swɩ nyɛmʋ 'mö 'pä. 33Wa ‑sɛ ‑mä Atiɔsɩ 'ylɩya, 'n ‑mä a ‑nʋa yuëa'aa 'yi 'tatinɩ 'tɩɩglɩnɔ 'mö, nzɩɩ wa 'kä ‑mä Zeluzalɛɛmö 'bɩwʋ mö. 34‑Maa silasɩ 'yɩbhä ɔbhlɩ ɔ 'käa'a ‑mä glɩ zaa, 'n ɔ yiɛ ‑mä tʋʋ, ‑sɩbhä a za, Zwidaa a 'yize 'n ɔ yiɛ ‑mä Zeluzalɛɛmö 'bɩwʋ mö. 35Pɔɔlʋ ‑nyɛ Banabasɩ 'sɔ, ‑mä wa glɩ'ɛ wabhlɩ Atiɔsɩ sɛ, wa ‑nyɛ ‑mä a ‑nʋä a ‑bɛ 'sɔ, 'n wa 'cɩaa nɩkpa Lagɔ 'a wɛlɩɩ, 'n wa biaa ‑Alowli Zezwii 'a 'Mänatɩtɩɩ.

Pɔɔlʋ ‑nyɛ Banabasɩ sɔ yɛ 'ylimö ‑sɛnɩ

36'Ylɩya 'plɩɛ, 'n Pɔɔlʋ yiɛ Banabasɩ 'dɩ 'nyɛ nɩɩ: «‑Gwlɩ ‑mi'la 'wuë ‑gömö, mä ‑a bianɩ a‑a Zezwii 'a 'Mänatɩtɩɩ, ‑a 'kä ‑mä 'bɩwʋ 'mö ‑aa ‑daayuë ‑muë'la ‑wa ‑wʋä ‑mä, ‑a 'kʋä 'ylɩmöä mö.» 37Wa lɛ 'kää möä yii, Banabasɩ lɛ naa: «Zaa Maakö nɩ 'mämö.» 38‑Maa Pɔɔlʋ lɛ naa: «N'nn, ‑maa ‑na'bhë ‑n ‑yi sɛ, ‑a ‑nyɔɔ 'sɔ ‑a ghlɛɛ ‑mä Pafilii‑bhölɩɩ 'möö, libhoo wa tieanyɩ a‑a 'wʋʋ, 'mö ɔ tɩnɩnyɩɛ 'n ɔ ‑yinyɩɛ 'bɩwʋ 'bhöö zaa, ‑a ‑nyɔɔ nɩ tɩ mö.» 39‑Maa ‑lɛ a kïbhë 'la a za, kpɛnɩ wa kpɛnɩɛ tenyii. 'N wa yiɛ ‑sɩbhä a za 'ylimö ‑sɛnɩ. Banabasɩ, 'n ɔ yiɛ Zaa Maakö 'wʋ 'libhï klɩpaa, 'n wa yiɛ batoo 'wʋ 'libhï, 'n wa yiɛ Siiplɩ mö. 40‑Maa Pɔɔlʋ ɔbhlɩ, Silasɩ 'mö ɔ ‑sɛɛ ‑lɛ ɔ ‑nyɔɔ 'kä mö. 'N Zezwii a ‑nʋa yiɛ ɔ 'wlumö bhibhe, Lagɔ 'kɔ 'nyu 'pä ɔ 'kä sasɛ 'ɔ libhoo nʋ. 'N ɔ yia'aa 'wʋ ‑sɔ, 'n ɔ yiɛ mö. 41Ɔ möä, ‑mä Silii‑bhölɩɩ ‑nyɛ Silisii‑bhölɩɩ 'sɔ 'mö, ‑mä ɔ 'tʋä 'wʋ, ‑sɩbhä ɔ pää Zezwii a ‑nʋa 'wuë ‑wa ‑wʋä ‑mä swɩ nyɛmʋ 'mö.

S'ha seleccionat:

Nʋnʋlii 15: bet

Subratllat

Copia

Compara

Comparteix

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Nʋnʋlii 15

Versets bíblics populars de
Nʋnʋlii 15

Escolta Nʋnʋlii 15

La Bíblia:

Bété, Guiberoua

Versió: BdG2 - bet

Nʋnʋlii 15

Nʋnʋlii 15

Versets bíblics populars de Nʋnʋlii 15

Escolta Nʋnʋlii 15

La Bíblia:

Bété, Guiberoua

Versió: BdG2 - bet

Nʋnʋlii 15

Versets bíblics populars de
Nʋnʋlii 15