Nʋnʋlii 12

Wa yɛ Zaakö 'wlu ‑dɩ wa yɛ'ɛ Piɛlɩ ‑jie 'mö 'pä

1‑Lɛ a 'tɛnyɩ 'la 'mö, Zezwii a ‑nʋa a ‑zɩkpa 'mö a ‑mumuë, Eloodɩ lɛ ɔ yuë 'zwɩ zia. 2'N ɔ yiɛ nɩkpa tie, 'n wa yiɛ Zaa a ‑daayu Zaakö 'wlu ‑dɩ. 3Wa ‑doo 'wlu 'wëë, Eloodɩ 'yiɛ 'ylɩmö nɩɩ yɩ nɛnɩɩ Zwiiföwaa dlɩ yɔwʋʋ, 'n wa yiɛ Piɛlɩ köbhä. ‑Lɛ a zlɩ 'la, Galɛ'möwlʋfɛtɩɩ a zlɩɩ a'bhë mɛɛ. 4Wa köbhää Piɛlɩ 'wëë, Eloodɩ lɛ naa, wa nɩ 'pɔ ‑jie 'mö. 'Slʋja ‑mʋäna ‑mʋäna a ‑zɩkpö ‑mʋänanɩ ‑kooo. 'Fɛtɩ 'la ‑kä 'plɩ 'wëë, ɔ 'kä nɩkpabhë a 'yila 'klʋ Piɛlɩ ‑zijle tunɩ. 5Zaa, Piɛlɩ ‑wʋ ‑mä ‑jie 'mö 'yize, ‑maa Zezwii a ‑nʋa wabhlɩ, wa 'wuë, wa bhibhe tenyii Lagɔ ɔ 'wlumö.

Lagɔzuzukwë yɛ Piɛlɩ ‑jie 'mö ‑sɛ

6Zlɩ 'kä zɩ, Eloodɩ 'kä Piɛlɩ ‑zijle tu a sabʋsɛ, Piɛlɩ pö 'slʋja 'sɔ jijo'wʋ, ɔ ngämö. Ɔ ‑gwanɩ 'gogwi 'sɔ. ‑Mä 'pɩwʋ, ‑jiebuduu a ngloluë 'wʋ, 'slʋja ‑mumuë ‑kʋ'ɛ ‑mä. 7Ɔ lɛ zʋa sɛ'ɛ cuu, ‑mä ‑jiebudu 'mö, Lagɔzuzukwë 'nɩgbö ‑mä, 'n ‑mä yiɛ lɩ gbëdanguu. 'N Lagɔzuzukwëa yiɛ Piɛlɩ 'a gbäkö kɛ zɩ 'n a yoo gäla, a lɛ naa: «Piɛlɩ 'päpänɩ 'wʋ ‑n 'kä 'wʋ ‑sɔ.» Cuu gogwii ‑yɩ ‑gwanɩ a‑a Piɛlɩ, 'n yɩ yiɛ sɛ 'sulo 'n ɔ yiɛ 'wʋ ‑sɔ. 8A lɛ naa: «Gwa ‑na'a 'bɛtʋʋ! 'Zʋ ‑mä ‑na'a 'siikplii!» 'N Piɛlɩ yiɛ ‑sɩbhä 'zʋ. 'N a yi'ɛɛ nɩɩ: «Päla ‑na'a ‑bäna 'kädaa 'mö, ‑gänɩɩ!» 9Piɛlɩ ‑gänɩ Lagɔzuzukwëa nimï, 'n wa yiɛ ‑mä 'wlʋ. ‑Maa Piɛlɩ ɔbhlɩ, ‑li 'la 'wuë Lagɔzuzukwëa ‑wʋä nʋ dɔ'wʋʋ, ɔ'ɔɔ sɛ ‑yi nɩɩ ‑tiamö a ‑liɛ, ɔ ‑tɔnɩ 'yɛla ɔ ‑wʋ ghlɛ dɔ'wʋ. 10Ɔ ‑nyɛ Lagɔzuzukwëa 'sɔ 'n wa yiɛ tɛkäslʋjaa a ‑zɩkpa yɛ'mö bhlɩ, 'n wa yiɛ 'sɔnaa yɛ'mö bhlɩ. Leyigbële 'kädaa ‑a 'gööä ‑glɔ 'yii, 'n wa yeaa nuë 'wʋ ghlɛ, 'n a yiɛ anyɩgäsɛ këlio, 'n wa yiɛ ‑mä 'wlʋ, 'yioo ‑wʋ möä ‑mä glɔ 'möö, 'n wa yuä bhli. Cuu 'n Lagɔzuzukwëa yiɛ Piɛlɩ yɔwʋ 'bhöö. 11‑Li 'la 'wuë yɩ 'plɩɛ sa'aa 'wʋʋ, 'n Piɛlɩ yia'aa ɔbhlɩ sɛ yɩbhɩmanɩ 'n ɔ yiɛ nɩɩ: «N ‑yia'a ‑sɩkaa sɛ, ‑Alowli Lagɔ, mɔɔ tiee ‑tiamö ɔ zuzukwë ‑bhlʋ, a ‑kaa Eloodɩ ngli ‑sɛ, 'saa Zwiiföwaa gbä a‑a ‑yɩ nɩ ghölɩɩɩ, a ‑ka'mi 'yɛ ngli ‑sɛ.»

12Piɛlɩ ligbaa sa'aa, nɩkpɛ ‑bhlʋ ‑ɔ paa Zaa, wa la'ɛɛ Maakö, ɔ ‑da Malii a 'ligbë 'mö, 'n ɔ yiɛ ‑mä mö. ‑Lɛ a 'tɛnyɩ 'la 'mö nɩkpa a ‑bɛ yɩbhä ‑mä 'wlu, wa bhibhe Piɛlɩ a 'wlumö Lagɔ. 13Piɛlɩ ghlɛɛ ‑lɛ ngloluë 'wʋʋ, 'n ɔ yiɛ ‑gbëlea bhɔtɔ. ‑Lɛ 'ligbë 'la 'mö a libhonʋnglɔ ‑bhlʋ wa laa Ghloodɩ, 'n ɔ yiɛ ‑lɛ 'dio ɔ 'kä ‑lɛ kälɩ. 14Piɛlɩ ‑dɩɛ gbʋʋ, 'n ɔ yiɛ 'ɔ wɛlɩɩ yɩbhlɩnɩ. Ɔ 'wuë 'mäna. 'Mäna a za, ɔ'ɔɔ ‑lɛ kälɩ a'bhë, ‑maa ɔ ‑wʋ guë dɔ'wʋ 'n ɔ yiɛ ‑muë'la 'dɩ kwä nɩɩ, Piɛlɩ mɔɔ ‑wʋä ‑lɛ ngloluë 'wʋ. 15Wa lɛ naa: «‑Nn bhä ‑yɛ ‑a?» Ɔ lɛ naa: «‑Tiamö, Piɛlɩ mɔɔ.» Wa lɛ naa: «‑Aa zaa, 'ɔ zuzukwëa ma‑a.» 16‑Maa Piɛlɩ ɔbhlɩ ɔ bhɔtɔ ‑gbëlea 'yize. 'N wa yia'aa ‑lɛ kälɩ, wa'bhï 'n wa yoo 'ylɩmö, 'n zuzu yuëë tenyii ‑gömö 'bhöö. 17Piɛlɩ plɛɛ ‑mä 'ligbë 'möö, 'n ɔ yuëë ‑tɛtɛ 'wʋ 'pä ɔ lɛ naa: «A 'zʋ vlɩɩ ‑n 'kanyɩ sɛɛ ‑Alowli ‑saa ‑jie 'mö a 'tɩtɩ 'nyɛ.» Ɔ 'nyʋä 'tɩtɩ 'wëë, ɔ lɛ naa: «Zaakö#12.17 Zezwii a ‑daayu ‑bhlʋ wa laa Zaakö ‑ɔ ‑gänɩɛ ‑mä Zeluzalɛɛmö a ‑zɩkpaa 'yukuu, 'mö Piɛlɩ gaaa da'a. ‑nyɛ ‑aa ‑daayuë ‑muë'la 'sɔ, a nɩ 'nyɛmuë ‑sɩbhä 'dɩ.» 'N ɔ yiɛ ‑mä Zeluzalɛɛmö 'bhöö 'n ɔ yiɛ käböbɛyɩ mö.

18‑Maa zlɩ zɩɛ, 'slʋjaa ‑wa ‑kʋ a‑a Piɛlɩ, wa lɛ zʋ a sɛ'ɛ, ɔ'ɔɔ ‑mä ‑jiebudu 'mö ‑wʋ, wa 'wuë bidibidi, wa'aa dɛ ɔ yɛ plɛnɩ ‑yi. 19Eloodɩ 'nwiɛ, ɔ lɛ naa, wa nɩ tɛlɔɔ sɛ. ‑Maa wa tɛlɔɔɔ sɛ ‑këë wa 'nɔɔ ghlɩ. Zaa, 'slʋjaa a'bhï ‑wa ‑kʋ a‑a ‑jiebuduu 'n Eloodɩ yuëë ‑zijle tu. Ɔ lɛ naa wa nɩ 'lɩbhʋä wa 'kä 'ku. Yɩ 'plɩɛ sa'a 'wëë, Eloodɩ a'bhë 'n ɔ yiɛ ‑mä Zwidee‑bhölɩɩ 'mö 'bhöö, 'n ɔ yiɛ ‑mä Sezalee glɔ 'mö mö ɔ 'kä ‑mä 'ylɩya ‑sɛ.

Eloodɩ 'a 'kwiea

20'Tɛnyɩ ‑bhlʋ 'mö, ‑gwlɩ ‑mimii 'sɔ, Tiilɩ 'n Sidɔɔ, yɩ 'mö a nɩkpaa mʋa pälaa Eloodɩ 'klɛ 'mö tenyii. Nɩkpa 'la 'n wa yiɛ ‑sɩbhä a za nuë ‑bhʋlʋ 'wʋ 'libhï 'n wa yiɛ nɩkpa tie, wa 'kä Eloodɩ yɔwʋ bhibhee mö, ɛ'ɛ ‑bhö nyɩasɛ, ‑maa 'wa lilea, ‑mä Eloodɩ 'a bhlɩɩ 'mö ‑mä a 'bhöönɩɛ. Wa möä, nɩkpɛ ‑bhlʋ wa laa Blatusɩ, Eloodɩ 'zʋä 'ɔ ‑gɔmlaligbëa 'yuku, ɔ 'ka ‑gömö 'kämanɩɩ, 'n wa yoo pɩɛ. Ɔ ‑nyʋä 'sɔ 'n wa yiɛ wamanɩ 'n ɔ yiɛ wa 'wlumö Eloodɩ yɔwʋ bhibhee mö. 21'N Eloodɩ yiɛ 'wʋ nglu, 'n ɔ yiɛ 'ylɩ ‑dɩ ɔ 'kä wa wɛlɩɩ 'wlu gïganɩ. ‑Lɛ a zlɩ 'la ghlɛɛ, 'n ɔ yiɛ 'ɔ wʋlʋnɩbanɩɩ 'mö päla 'n ɔ yiɛ ‑mä 'ɔ 'nglɩmöklikpëa 'mö sɛ glɩ, nɩkpabhë a 'yila 'klʋ 'n ɔ yiɛ 'mö ‑sɛnɩ. 22‑Maa nɩkpa 'wuë, 'mäna a za 'n wa yiɛ kɛ gbɔtɔ, wa lɛ naa: «Nɩkpɛ 'nɩɛ da'a bhïla, ‑maa Lagɔ bhilaa.» 23‑Gba 'la ‑bhʋlʋ ‑kpɔ 'mö, sɛɛ Eloodɩ 'tatinɩɛ nɩkpaa 'yi 'n wa yiɛ ɔ 'nglɩ 'ghlimanɩ 'n wa 'nɩɛ Lagɔ a 'nglɩ 'ghlimanɩ a za, 'n Lagɔzuzukwë ‑bhlʋ yoo gu 'wʋ ‑lɛnɩ. Slebïlaa mɩɩ loo 'n ɔ yiɛ 'ku.

24‑Maa Lagɔ 'a wɛlɩɩ yɩbhlɩɩ, yɩ gblɔnɩ saa 'wuë 'yize. 25Banabasɩ ‑nyɛ Sɔɔlʋ 'sɔ, 'saa wa mö a‑a ‑mä Zeluzalɛɛmö nʋä, wa nuä 'wëë, 'n wa yiɛ ‑mä Atiɔsɩ 'bɩwʋ yi, wa ‑su Zaa wa la'ɛɛ Maakö.

S'ha seleccionat:

Nʋnʋlii 12: bet

Subratllat

Copia

Compara

Comparteix

Vols que els teus subratllats es desin a tots els teus dispositius? Registra't o inicia sessió

Més informació sobre BdG2

Nʋnʋlii 12

Versets bíblics populars de
Nʋnʋlii 12

Escolta Nʋnʋlii 12

La Bíblia:

Bété, Guiberoua

Versió: BdG2 - bet

Nʋnʋlii 12

Nʋnʋlii 12

Versets bíblics populars de Nʋnʋlii 12

Escolta Nʋnʋlii 12

La Bíblia:

Bété, Guiberoua

Versió: BdG2 - bet

Nʋnʋlii 12

Versets bíblics populars de
Nʋnʋlii 12