Amaköri gha Bhatomu 24
24
Bhawuro ˆaghasëmu ambërë e mukangati Bheriki
1Hano chehetiri chaasiko ishaano, Omuchaama Omokoro Ananiya akahika hayo mo‑moghya o Kayisaariya, anyi haghirohamu na abhagharuka abhande bha Bhayahuuti, no omooto umu uno eche emeghiro, eriina reeche Terituro. Bhoose bhayo bhakamobhoorera omukangati Bheriki amangʼana ghano ꞉bhaare bharamusëma Bhawuro. 2Hano Bhawuro arëëturu, Terituro aghasëëma kuhaana amangʼana gha komusëma arabhugha, “Oo omosooku Bheriki, iye niiye oghughëri tubhe no omurëmbë mo‑chaasiko chino choose. Mo‑bhukangati bhoocho amangʼana amaregho maaru ngachöchu mo‑se ino. 3Amangʼana ghano ntoghiisheriiri gho ghuchömëru chwee na koruusi amiitabheri maaru ghokoocho ahaghiro hoose. 4Ibheere netaacha ghoghuköra utamu. Gho ghayo, neghoghusasaama otutëghëërërë kwo riibhagha isuuhu kwo bhuhöriicho bhoocho gho ghano toonyi nagho.
5“Ntorooche kubha, omooto uno m‑mobhe chwee, gho kubha nakobhaseeghereri Abhayahuuti mo‑chaase choose, na ghuköra anyööri ghate yaabho. Haghirohamu na ghayo, iwe m‑mokoro o tiini e bhuröngö e Bhanasareeti. 6Hano ëndiri koreghonchi Erisëngërö, hayo hayo tokamughööta. [Tökëënda komotenera ekiina gho kurëngʼaana ne emeghiro ghiito, 7amare omontomonkoro o bhaashirikare Risiya akamoruusi mo‑mabhökö ghiito gho changuru, 8aghatuhatëka itu bhano toore toramusëma tuuche ghokoocho.] Iye mwene hano okubha oramwisuncha, noghotora kumënya obhuhëënë bho mangʼana ghano ghoose tomusëmiire ghokoocho.” 9Amangʼana ghayo gha Terituro, Abhayahuuti bhayo bhaghiishererani nagho kubha, n‑gha hëënë.
Bhawuro ˆaghiitachura ambërë e mukangati Bheriki
10Niho omukangati uyo akamööröta Bhawuro kubha, woose asiikërë. Mbe, aghasëëma ghosiikëra arabhugha, “Eni nyeeche kubha emeeka myaru nubheere oratena ekiina mo‑se ino. Nikyo gheghaghëri niitachure ambërë yaacho gho ghuchömëru. 11Iye omwene noghotora ghoseghaayi na kumënya bhoheene kubha chetaamara cheheta chaasiko ikomi ni ibhere, korwera hano neghiire Yerusareemu ghusëngëra Eryobha. 12Bhano ꞉bhaare bharansëma bhatambwine ndahakaana na abhaato, koru ghughëri abhaato bhakörë anyööri Mwisëngërö, hande mo‑masinaghooghi ghaabho, koru haghiro hohoose mo‑moghya uyo. 13Amangʼana ghano bhaghunsëmëra ibheere, koru bhataaghotora kwërëki obhuhëënë bhooche kwi ibheere.
14“Kino neghwishereri ambërë yaacho, n‑kubha neghusëngëra Eryobha re bhasookoro bhiito na komutambana Yesu, nangabha abhaato bhano bhakobhugha kubha n‑atiini e bhuröngö. Haghirohamu na ghayo, neghokumi amangʼana ghoose ghano ghaanyi mo‑meghiro ghe Musa, na ghano ghaandëkuru mo‑bhitabhu bhe bharööti. 15Eni netooriri amiitëngʼërö kwo Waryobha, na bhoose mbaanyi ne riitëngʼërö riyo, kubha Eryobha ndekoryoki abhaku bhoose abhahëënë na abhaköri bha mabhe. 16Gho ghayo, neghwiköngʼi chwee kubha no omotema omuchömu, etabha‑ho ngʼana ino eghunkörëra chaasoni ambërë e Ryobha.
17“Mbe, ghiiche koheta emeeka myaru neghagharuka Yerusareemu, gho ghiri nebharëëtërë abhahabhe bha ritöngö reene ebheghiro bhe kobhatoori, na koruusi amaruusi kwo Waryobha. 18Hano abhaato bhano bhambwine neraköra ghayo Mwisëngërö, neere nimariri kwiyeri, na nteere nerasöha‑mu na abhaato bhaaru, na ntiköriri anyööri yoyoose‑mu. Amare Mwisëngërö riyo, mbaare‑mu Abhayahuuti abhande bhano ꞉bhaare bharuure mo‑se e Asiya. 19Bhayo, nibho ꞉bhaare bharëëndëru ghunsëma ghokoocho, aribha bhangabheere na angʼana ighoro yaane.
20“Hande abhaato bhano bhaanyi hano bhabhughe, ꞉mbaarooche obhobhe ke ghokoone hano niimeeriire mo‑riibharacha reebhoeriikoro. 21Hamwabhe ꞉mbaarooche kobhe hano neereriri kwo riiraka ikoro ambërë yaabho kubha, ‘Ghano ghaghughëri eni neteneru ekiina ambërë yaanyu reero, n‑gho kubha neghwitëngʼëra kubha, abhaku mbakoryoka.’”
22Bheriki naare ayeeche bhoheene Anchëra e bhano ꞉bhaare bharamtambana Yesu. Gho ghayo, aghasanchi ekiina kiyo akabhugha, “Neghotena ekiina ighoro e masëmö ghano hano omontomonkoro o bhaashirikare Risiya akuucha hano.” 23Akamara Bheriki akamobhoorera omoshirikare umu omokoro uno are hayo akabhugha, “Omochonge Bhawuro, amare ubhe oramuha omweya o ghuköra amangʼana ghaache. Obhiisherereri bhasaani bhaache bhabhe bharamotoori mo‑mënda ghaache.”
Bhawuro ambërë e mukangati Bheriki na Turusira
24Chaasiko insuuhu chiiche koheta, Bheriki akaacha haghirohamu na mukaache Turusira, uno are Omuyahuuti. Niho aghatomani bhamobherekere Bhawuro. Hano Bhawuro ahikiri, aghasëëma kobhabhoorera ighoro e komokumi Kirisito Yesu. 25Akëëndërëra kobhabhoorera ghoose ghano ghakwëndëru ghuköra ambërë e Ryobha, na kinya bhuure abhaato bhakwëndëru kwihööchërëra mo‑mabhe, na kebhuno Eryobha reghotenera ekiina abhaato. Bheriki hano oghwire ghayo, aghatiina chwee. Akamobhoorera Bhawuro akabhugha, “Kwi ibheere noghotora ghuye. Neghokobherekera wiiki hano nekubhöna omweya.” 26Akamara Bheriki akëëndërëra komobherekera Bhawuro, gho ghiri abhe arasiikëra nawe, gho kubha naare na amiitëngʼërö kubha hande abhe Bhawuro nakomuha amasooya.
27Hano ghehetiri emeeka ebhere, Bhorikiyo Bheesito akiimoki omweya o Bheriki. Na gho kubha Bheriki naare arëënda ichömi kwo Bhayahuuti, eghaghëri amotighe Bhawuro mwighërëcha.
S'ha seleccionat:
Amaköri gha Bhatomu 24: ntk
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved