HOSEA 5
5
Israel le Judah Cung Biaceihnak
1Nannih tlangbawi hna,
hihi thei tuah u;
Nannih Israel mi hna,
hihi ngai tuah u.
Nannih siangpahrang innchungkhar
mi hna, ka bia hi
i chingchiah tuah u.
Nannih cu midang kha bia a ceihtu
ding nan si,
Sihmanhsehlaw biaceihnak kha
nanmah cungah a tlung lai.
Nannih cu Mizpah i chiahmi rap le
Tabor tlang i chiahmi sur rap le
2Shittim i cawhmi khor thuk ah
nan i cang cang;
Sihmanhsehlaw nan dihlak in dan
kan tat ko hna lai.
3Israel cu zei bantuk mi dah a si ti
kha ka hngalh ko,
ka sinin aa thup kho lai lo.
Amah cu ka sinah zumhawktlak loin
khua a sa i mi hna kha
thurhhnawmh an si cang.
4Thil ṭhalo an tuahmi nih khan Pathian
lei i an kirnak ding lam kha a phih;
Siasal biaknak lungthin nih khan
a tei hna i Bawipa kha zei ah
an rel lo.
5Israel sual a phawtu cu amah
aa porhlawtnak lila kha a si ko,
An sualnak nih khan a rilhter hna i
a tlukter hna;
Cun Judah mi zong cu an sinah khan
an tlu ve.
6 Bawipa sin i raithawi awk caah an tuu
hna le an caw hna kha i put hna
hmanh seh law zeihmanh san
a tlai lo;
A kaltak cang hna caah amah cu
an hmu kho lo.
7 Bawipa kha an rawi i a sinah
zumhawktlak in an um lo;
An fale hna cu amah ta an si lo;
Cucaah an ram cu a rawk lai.
8Gibeah ah muko kha tum u,
tuuki kha Ramah ah tum u,
Beth-aven ah raltuknak au khan
au u law:
“Benjamin, nangmah sinah
kan ṭang!” tiah ti u.
9Hi thlen ṭhan khawh lomi rawhnak hi
Israel mi phun cung i tlung dingin
ka thanh cang;
Dantat ni ah Efraim cu a ṭiao
cikcek lai.
10 Bawipa nih aa thawh i, “Judah mi nih
an unau hna an ram kha an fir caah
ka thin a hung i an cungah
dantatnak cu tilian bantukin
ka tlunter lai.
11Israel cu harnak chungah a um cang.
A bawm kho ṭung lomi kha bawmh
hal awkah a fuh lengmang
hna caah,
Amah ta a si hrimhrim komi ram kha
a sung cang.
12Cucaah Israel cungah khan rawhnak
ka tlunter lai i
Judah mi cungah khan lohtlaunak
ka tlunter lai.
13Israel nih zeitluk in dah ka zawt ti kha
aa hngalh i
Judah nih a hma kha aa hmuh tikah,
Israel cu siangpahrang ngan kha
bawmhnak va hal awkah
Assiria ah a kal,
Sihmanhsehlaw a damter kho hna lo i
an hma zong a damter kho lo.
14Israel mi le Judah mi cu a ṭhawngmi
chiandeih bantukin
ka zuanhnawh hna lai;
Keimah hrimhrim nih ka thleh
ka baoh dih hna lai i ka kaltak
hna lai.
Ka hnuh hna lai i ahohmanh nih
an chanh kho hna lai lo.
15Ka mi hna cu an sualnak ruangah
sifah an in i keimah kha an ka kawl
hlantiang cuticun ka kaltak ko
hna lai.
Sifahnak an in ruangah keimah kha
an hei ka kawl phum hmanh
hnga maw,” tiah a ti.
S'ha seleccionat:
HOSEA 5: HCL06
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Lai (Hakha) Common Language Bible © Bible Society of Myanmar 2006