DANIEL 4
4
Nebukhadnezzar Mang Pahnihnak
1Siangpahrang Nebukhadnezzar nih, vawlei cung i a ummi miphun vialte hna le holh phun vialte hna sinah thawng kan thanh hna: 2Thluachuahnak vialte cu nan ta si ko seh. Cung Nung Bik Pathian nih ka caah a tuahmi hmelchunhnak hna le khuaruahharnak hna cu chim ṭhan ka duh hna:
3Hmelchunhnak a tuahmi hna cu
zeitluk in dah an ngan i
Khuaruahhar a tuahmi hna cu
zeitluk in dah an ṭhawn,
A pennak cu zungzal hmunmi
pennak a si i
Bawi a sinak cu chan vialte tiangin
a hmun, a ti.
4Keimah Nebukhadnezzar cu ka inn ah hnangam tein le ka siangpahrang inn ah cun nuam ngaiin ka um i 5ka ihnak i ka ih lioah mang pakhat ka manh i cu nih cun ka thin a ka phanter. 6Cun mang ka manhmi le langhnak ka hmuhmi hna nih cun ka khuaruah an ka harter. Cucaah nawlbia pakhat ka chuah i Babilon mifim vialte hna kha ka mang sullam leh awkah cun ka hmaiah ka auh dih hna. 7Mitlehthiam hna le khuachia thawl thiam hna le Khaldi mi hna le mang ih thiam hna kha an ra i an hmaiah cun ka mang cu ka chim. 8Sihmanhsehlaw annih nih an let kho lo. Asinain a dang pakhat ka hmaiah cun a ra chuak i amah cu Daniel a si, ka pathian min zulh in Belteshazzar ti zongah ti a si; amah cu pathian thiang hna thlarau nih an umhnawhmi a si. 9Amah zong cu ka mang cu ka chimh i, “Mitleh thiam hna lak i a thiam bik, keimah hrimhrim nih pathian thiang hna thlarau nih an umpimi a si ti ka hngalhmi le biathli zeihmanh a hngal kho dihtu a si tiah ka hngalhmi Belteshazzar, ka mang i ka hmuhmi langhnak cu ka ngaihpiak law a sullam cu ka chim tuah,” tiah ka ti.
10Ka ihkhun cung i ka ih lioah ka lu chungah a rung lutmi langhnak cu mah hihi a si:
Khua ka hei cuanh lioah khin,
Vawlei laifang ah thingkung pakhat
a sang ngaingaimi a dir kha
ka hmuh:
11Thingkung cu a hung ṭhang chin
lengmang i
a par nih van a tawngh i
vanhramdeng hmanh in hmuh khawh
a si.
12A hnah cu an i dawh ngaingai i a thei
cu an tam ngaingai caah zeizong
vialte kha a cawm khawh hna.
A toiah cun ram sa kha an i dor i
a nge ah cun vate nih bu an ser;
Thilnung vialte nih amah sin cun
rawl an hmuh.
13Cun langhnak a dang pakhat ka ihkhun i ka ih lio i ka hmuh rihmi cu hihi a si:
Cu ti i ka zoh ko lioah cun,
Vancung in Vengtu Thiang pakhat,
a rung ṭum kha ka hmuh.
14Cu nih cun fak piin a au i,
“Thingkung kha hau u, a nge kha
thlam hna u, a hnah kha zun hna
u law a thei kha ṭhek dih hna u.
A toi i aa dormi ram sa hna kha
zam hna seh law a nge i aa fumi va
hna kha zuang hna seh;
15Sihmanhsehlaw a hmui kha cu
vawlei ah khan kaltak ko u,
thir cikcin le dar cikcin in
khimh u.
Lo lakah khan kaltak ko u law
rambur lakah khan um ko seh.
Vandap nih cin cikcek in tlak seh law
ram hno lak i a tlongmi saram hna
bantuk kha si ve seh;
16A lungthin cu minung lungthin
si ti hlah seh law,
saram lungthin tu kum sarih chung
keng seh.
17Hi kong cu cawngtu vancungmi
hna nih an ruah ciami a si.
Cucaah khuazeika ram i a ummi
minung paohpaoh hna nih,
Cung Nung Bik Pathian nih cun
minung pennak cungah nawl a ngei
ti kha hngal hna seh.
A duhmi paoh kha siangpahrang ah
a ser khawh ko hna,
santlailo bik hmanh kha
a ser khawh ko hna,
ti kha hngal hna seh,” a ti.
18“Hihi keimah Siangpahrang Nebukhadnezzar nih ka manhmi ka mang cu a si; atu cu Belteshazzar, nangmah nih a sullam cu ka chim tuah; ka pennak chung i a ummi mifim vialte nih a sullam kha an ka chim kho lo nain, nang nih cun na chungah a thiangmi pathian hna thlarau kha a um caah na ka chimh khawh lai,” tiah a ti.
Daniel Nih A Sullam A Chim
19Daniel, Belteshazzar ti zongah ti a simi cu, tlawmpal cu ar ṭhup in a hung um i zeihmanh a chim kho lo. Sihmanhsehlaw siangpahrang nih cun aa thawh i, “Ka mang le a sullam nih cun na khuaruah in harter hlah seh,” tiah a ti. Belteshazzar nih cun a leh i, “Ka bawipa, hi mang le a sullam hi nangmah an huatu hna le na ral hna ca tu ah hei si seh law ka hei duh hnga dah! 20Nangmah nih na hmuhmi thingkung, a ṭhang i a ṭhawng i a par van a tawng i vanhramdeng in hmuh khawh a si i 21a hnah aa dawh i a thei a tam i zeizong vialte ca i a tlai rawl a si i a toi i ram sa an tlon i a nge i vate an riahnak cu, cu thingkungpi cu, maw siangpahrang, nangmah na si. 22Nangmah cu na ṭhang i na ṭhawng. Na lianhngannak cu a thang i van a tawng; na bawi sinak cu vanhramdeng a phan. 23Cun maw siangpahrang, nangmah nih na zoh ko lioah cun, Cawngtu pakhat kha van in a rung ṭum i cu nih cun, “Thingkung kha hau u law hrawk u, sihmanhsehlaw a hmui kha cu vawlei chung i a hram hna he khan ngan u. Thir cikcin le dar cikcin khan khit u law lo ah khan rambur lakah khan kaltak u, vandap nih cin cikcek in tlak seh law kum sarih chung saram bantukin um seh,” a ti.
24“Maw siangpahrang, a sullam cu hihi a si: Siangpahrang ka bawipa cung i a tlung ding a chimtu hi Cung Nung Bik Pathian a si. 25Minung bu sinin nang cu ṭhawl na si lai i ram sa sinah na um lai; cawtum bantukin ram kha na ei lai i vandap nih cin cikcek in kum sarih chung an tlak lai. Khi tikah nangmah nih Cung Nung Bik cu minung pennak cungah khan bawi a si i cu pennak cu pek a duhmi hna sinah khan a pek ko, ti na vun hngalh ruangmang te lai. 26Thinghmui cu vawlei chung i a hram hna he khan nganhta si hna seh, tiah vancungmi nih khan an ti: Cu a sullam cu hihi a si, Pathian nih vawlei cung hi a dihlak in a uk dah ee ti na vun hngalh tikah nangmah cu siangpahrang na si ṭhan te lai. 27Cucaah lungthin kan cheuhmi hi ngai tuah, maw siangpahrang: mi sinah siannak tuahnak thawngin na sualnak kha i tlan law retheimi hna cung i ṭhatnak tuahnak khan na ṭhat lonak cu i tlan tuah, cuticun lungdaihnak saupi na hmuh lai,” tiah a ti.
28-29Hi vialte nih hin Siangpahrang Nebukhadnezzar kha a tlunhnawh. Thla hleihnih a dihnak ah siangpahrang cu Babilon i a siangpahrang inn cungah khan aa chawk i, 30“Mah hihi a liannganmi Babilon, keimah nih siangpahrang umnak caah keimah ṭhawnnak a nganmi le keimah upatnak langhternak caah ka sermi a si lo maw?” tiah a au. 31Cuticun a chim lioah cun vancung in aw pakhat a rung i, “Maw Siangpahrang Nebukhadnezzar, ka bia hi ngai tuah: Na pennak cu chuh na si cang. 32Minung bu sinin ṭhawl na si cang i ram sa sinah na um cang lai; cawtum bantukin ram kha kum sarih chung na ei lai. Cu tikah Cung Nung Bik nih hin minung hna pennak chungah hin uktu bawi a si i pek a duhmi hna sinah a pek ko dah ee, ti kha na hngalh lai,” tiah a ti.
33Cu caan hrimhrim ah cun hi biaceihnak cu Nebukhadnezzar cungah cun a tlung. Minung bu chung khan ṭhawl a si i cawtum bantuk khan ram kha a ei; a pum cu van dap nih cin cikcek in a tlak i a sam cu meheh hmul bantukin a sau i a tin cu mupi tin bantukin an zum.
Nebukhadnezzar Nih Pathian A Thangṭhat
34Caan tinhmi cu a tlin dih tikah keimah Nebukhadnezzar nih van lei khi ka hun zoh i ka lungthin kel ah khan ka kir ṭhan. Cung Nung Bik cu ka conglawmh i Zungzal Hmunmi Pathian cu ka hlorh i ka thangṭhat:
Bawi a sinak cu a dong bal lo i
a uknak cu
chan vialte tiangin a hmun;
35Vawlei cung i a ummi vialte hna cu
zeihmanh ah rel awk tlak an si lo i
Van ralkapbu hna cu a duhduh in
a tuah hna;
Amah cu ahohmanh nih an tlai kho lo
i a tuahmi kha zeidah a si tiah
ahohmanh nih an hal kho lo.
36Ka lungthin kel i ka hung kir ṭhan tikah khan ka bawinak le ka sunparnak le ka pennak lianhngannak kha pek ṭhan ka hung si. Ka tlangpi hna le ka bawi hna nih khan ka bia kha an duh. Ka pennak kha fehter a si i ka ṭhawnnak cu tam piin a karh. 37Atu cu keimah Nebukhadnezzar nih vancung Siangpahrang cu ka thangṭhat, ka hlorh i ka conglawmh, zeicahtiah a tuahmi vialte cu ahmaan dih i a lam vialte cu a ding dih, aa porhlawmi paoh cu tangah a ṭhumh tawn hna.
S'ha seleccionat:
DANIEL 4: HCL06
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Lai (Hakha) Common Language Bible © Bible Society of Myanmar 2006