1 Corinth te 4
4
Christ ii Sawltakte
1Kote sia Pathian thumaan thukute a keamcing tu a, hong kikoi Christ ii naseamte hi ci in nong ngaisut tu uh ahi hi. 2Tuabang naseam khat ii a taangsap thu sia a topa tungah a thumaan tu bek ahi hi. 3Tu in kei tungah note na hi uh zong, mihing muna bang ahizong thu nong khen uh hang ka awlmaw bua hi; keima le keima zongh thu ka kikhen bua hi. 4Kithasunna ka nei bua hi, ahihang tuasia in mawnei ngawl tatak hi ci na ahi bua hi. Kei tungah thu hong khen sia in Topa ahi hi. 5Tua ahikom note in a hun tatak hong thet ma in kuama tungah thu na khen heak vun. Thukhenna a khakbel sia in Topa hong pai dong a ngak kul tu hi; ama in khuazing sungah a om thukute, khuavak sungah kilanghsak tu a, tuaciang mihingte thinsung ah a kiseal tupnate a pholaak tu hi. Tuaciang mihing sim in ama taw kilawm Pathian ii pokna nga tu hi.
6Tua ahiciang, suapuite awng, “Ngeina maante na zui vun,” a ci kam tepteena sia ii a cinopna na heak thei natu uh in hi teng theampo sia Apollos le keima tungah ka sin zo uh a, koma nii sia ettee tu lim bangin ka kizangh uh hi. Note in mihing khat pawpo kiphatsak pui in, midang khat pawpo zawngsak heak vun. 7Akua in note ngualdangte sangin a thupizaw in hong piangsak ziam? Na neisa uh theampo Pathian hong piaksa hi ngawl ziam? Tua ahile pha hi, na neisa uhte sia letsong ahi ngawl bang phetin, bangbangin kiphatsak pui thei tu nu ziam?
8Na kisap uh theampo nei zo nu ziam? A hau sa hi zo nu ziam? Ko zongh kumpi suak ngawl lai a, no kumpipate suak zo nu ziam? Pha hi, kote noma taw kumpipate ka sua khop thei natu in kumpi suak takpi le uhte kong oai hi. 9Ko sawltakte sia vantunglalangte le mihing nam bup ii a et tu in mihon mai ah thidaan thuak tu mite bangin Pathian in a tawp khakna mun ma ah hong koi taw kibang ka sa hi. 10Christ atu in kote a mawmaw ka suak uh a, ahihang note in Christ taw na kipumkhatna uh hu in, mihing ciimte na hi uh hi! Kote ka tha uh zawm a, ahihang note sia na hat uh hi: Kote hong kizawngsak ahihang note hong kizatak vawt hi! 11Hi hun dong mama in kote ngilkial dangtaak in ka om uh hi; puansia ngapkaai ka sil uh a; kote hong kisaat hi; mun khat pan mun khat ah ka vak kawkoai uh hi; 12nasep haksate ka sep uh manin ka zawm dikdek uh hi. Hong kitomlaw ciangin thupha ka pia uh hi; hong kivawtsiat ciangin ka thuak uh hi; #Sawl 18:3 13hong kilan ciangin kamthiam taw ka zo kik uh hi. Kote in hi leitung ninteakte bang ka hi lel uh a; tu hun dong mama in, ko sia leitung mihing nilnamte ka hi uh hi!
14Hisia note tungah kong atna in, no hong maizumsak nuam hi ngawlin, keima ii ka it ka tate bang a, kong pau nop hang ahi hi. 15Banghang ziam cile, na Tapidaw nuntakna sungah hong keam hong en tu 10,000 na nei hial uh zong pa khat bek na nei uh hi. Banghang ziam cile Christ taw kipumkhat in na nuntakna sungah Lungdamna Thupha note tungah kong puak hu in note ii pa ka suak zo hi. 16Tua ahiciang keima ettee in nong zui tu uh kong dei hi.#1 Cor 11:1; Php 3:17 17Hi thu hu in, Tapidaw nuntakna sungah ka it a thumaan ka tapa Timothy kong paisak hi. Christ Jesus taw kipumkhat a, nuntakna thak sungah ka zui thubulphute le, mun theampo ah a om pawlpi teng tungah ka hil thu sia ama in hong phawksak tu hi.
18Keima sia note kungah hong haw ngawl tu hi ci in nong ngaisut uh hu in, mihing pawlkhat kiphasak zo uh hi. 19Ahizong Topa deina a om le, note kungah hong pai pal tu khi hi, tuasia ciang, hi mihing kiphasakte in a kam teng bek hi ngawl a, bangza vaangletna nei ziam, ci sia keima tatak ma in ka mu tu hi. 20Banghang ziam cile Pathian Ngam in kammal taw hi ngawlin vaangletna taw kip hi. 21Ciang uai taw kong pai tu ahibuale ki itna le cikna taw kong pai tu a koisia deizaw nu ziam?
S'ha seleccionat:
1 Corinth te 4: SCB2
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Siyin Chin Bible © Bible Society of Myanmar, 2016