मत्ती 28
28
यीशु का जियुंदी हौणा
(मर 16:1-8; लूका 24:1-12; युहन्ना 20:1-10)
1विशांव कै दूसौ कै बाद हफते कै आगलै दूसै झीशीं दी मगदेला गांव कै मरियम औरौ दूजै मरियम क्रब खै दैखदै आए। 2औरौ दैखौ, ऐक बौड़ा भुईचोल़ हौंव, जिथुकै पौरमेशवर का ऐक स्वर्गदूत स्वर्ग शै उतरा औरौ नेड़िक आयौ खै तैणै पाथर आगैई दवारो पौरैशा हौटाए दिया, औरौ तिथपांदी बौठै गौआ। 3तैसका रुप बिजली खै जैशणा औरौ तैसखै खोटणो पालै कै साए चोमकैयौंदे थिए। 4तैसकै डौर लैई सैनिक कांमणै गौवै, औरौ मौरेयौंदे खै जैशणै हौए गौवै। 5स्वर्गदूतै बैटमाणिशौ खै बुलू, “डौरेया नी हांव जाणुए कै तुऐं यीशु खै जू क्रूस पांदी चौढ़ाए गौआ थिया जौए लौआ। 6सै इथै ना आथी, पौरौ आपणै वचन खै हिसाब शै मौरेयौंदे मुंजीदा जियुंदी हौए गौआ, आव, ऐजा ठाँव दैखौ, जिथै प्रभु पौड़ेयौंदा थिया। 7औरौ तावल़ो जायौ खै तैसकै चैलै खै बौल़ौ, कै सै मौरेयौंदे मुंजीदा जियुंदी हौए रोआ, औरौ सै तुऔं दा आगै गलील जिले खै जांदा लागै रौआ, तुऐं तैसी तिथी दैखलै, दैखौ मोऐं तुऔं खै बौल़ै दियु।”
8औरौ सै डौरेयौ औरौ बौड़ै खुशी कै साथै कब्रो पौरैशी तावल़ी पाछु आयौ तैसकै चैलै खै समाचार दैणौ कारिए दोऊड़ै गोई।
बैटमाणिशौ कै यीशु कै दैखिया
9तोबै यीशु तिनु भैटा, औरौ बुलू; “सुखी रौव” तिनिऐ नेड़िक आयौ खै औरौ तैसकै लात पाकड़ेयौ खै तैसीखै ढाल़ कौरा।
10तोबै यीशुए तिनी बुलू, “डौरेया नै; मैरै चैलै खै जायौ खै बौल़ौ कै गलील जिले खै जाव, तिथै मुखै दैखदै।”
सैनिकौ कै सूचना
(मर 16:14-18; लूका 24:36-49; युहन्ना 20:19-23; प्रेरि 1:6-8)
11जोबै बैटमाणिशौ चैलै कै ऐजा समाचार बोताणौ कारिए जान्दी लागी रोई थी तोबै सैनिक जिनिए कब्रो कै रोखवाल़ी कौरे लोए थी, तिनुमुंजी दै कोसीए नोगरो दै आयौ खै सौबै हाल मुख्य यहूदी पुरोहित कैई शुणाए दिया। 12मुख्य यहूदी पुरोहित बुड़ेईको शै भेटिए औरौ तिनुआरी सलाह कौरे। तिनुऐ सैनिकौ कै बैजाए धन देएबा रिशवत दैणौ का फोएसला कौरा, ऐजै बात बौताणौ कारिए कै कब्र खाली औसौ। 13“तिनुऐ सैनिकौ खै बौल़ौ, ऐजै बात सौबी लोगौ कै बौतांव कै रातै खै जोबै आमुए सोतै रौवै थिए, तौ तैसकै चैलै आयौ तैसीखै चुरयों आगु लौए गौवै। 14औरौ जै ऐजी बात राज्यपाल कै कानो तौड़ी पौऊंचै, तौ आमुए तैसीआरी बात कौरदै औरौ तुऐं कियौंई बातौ कै फिकर नी कौरेया।” 15औरौ तिनुऐ रुपये लौयौ जैशै शिखाए राए थिए, तैशैकैई कौरौ, ऐजी बात ऐलो तौड़ी यहूदियों मुंजी पौता औसौ।
चैलै कै दैखिया औरौ आखरी आज्ञा
16ग्यारो चैलै गलील जिले दै तैसी पाहाड़ पांदी हौटै, जू यीशुए तिनुकै बौताए राए थियु। 17तिनुऐ तैसका दर्शन पायौ तैसीखै ढाल़ कौरा, पौरौ कोसी-कोसी कै शक हौआ कै यीशु जिंदा हौए गौआ।
18यीशुए तिनकै धोरे आयौ बौल़ौ, “स्वर्ग औरौ धोरती का सारा औधिकार मुखै दैय राए। 19इथकारिए तुऐं जांव, सौबी देशो कै लोगौ खै चैला बाणौ औरौ तिनु पिता, बैटै, औरौ पवित्र आत्मा खै नांव लैई ऐक निशान कै तौर पांदी बपतिस्मा दैव, कै सै पौरमेशवर औरौ मैरै चैलै बौणै गौवै। 20औरौ तिनु सौबै आज्ञाए जू मोऐं तुऔं खै दैय रैई, मानणी शिखाव औरौ शुणौ, हांव जगत खै अन्त तौड़ी हमैशा तोंवारै साथै औसौ।”
S'ha seleccionat:
मत्ती 28: SRXNT
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.