Jäqui'ves Pedros 3
3
Caꞌñibudyeꞌ Ayos muꞌ
1Chätidyeꞌ mạꞌjeyacdyety yụ, ọij q̂uinꞌ päräꞌyis sánacdyeꞌ yụ, sáñeꞌ yụ miꞌindyes. Pärenꞌcheꞌdye yụ mạꞌjeꞌ quivij jiꞌdyijtuyebadyedyac ọij jiꞌchäyitidyeꞌ paj qui rụij dyijyi miꞌin. 2Dyijtucsebibajshamꞌ miꞌin mọꞌ p̂eyacdyeꞌ muꞌin jasoꞌmititysiꞌ p̂eyacdyeꞌ Jenꞌ jiquej in, judyeyaꞌ p̂eyacdyeꞌ Jesucristos muꞌ, muꞌ Jiꞌc̣honsinꞌtyiꞌ tsun, mọꞌ jiꞌchäyinacsiꞌ in muꞌin jutactyiꞌ muꞌ.
3Jämꞌ seꞌvevac ọij mọjoꞌchas jiꞌchäyitidyeꞌ: jadyiquisĉan tupudyeꞌ pạrej raꞌ muꞌyaꞌ in aꞌc̣his dyijyedyeꞌ aꞌsiꞌ muꞌin bächäcsiꞌ. Muꞌin raꞌ dyisacbusinꞌ in 4judyeyaꞌ raꞌ dyisacbite in p̂eyacdyeꞌ Ayos muꞌ, mọꞌ p̂eyes atsijban raꞌ muꞌ. Yi raꞌ in: "¿Yoj na ca raꞌ atsijban muꞌ Cristo? Muꞌin ishoꞌmuntyiꞌ in räj sänjan in, yejĉoij qui namꞌ jeñejdye urucyaꞌ jiquej yoquiꞌdyemꞌ jämaqueyaꞌ ọij jac jiquej o, uts na tacaꞌ itŝij", yi raꞌ in. 5Muꞌin meꞌ yity in mijam dyijtuiꞌ in junꞌ chuc urucyaꞌ jiquej muꞌ Jenꞌ p̂eyacdyeꞌyaꞌ jämꞌtyeꞌ mạyedyeꞌ judyeyaꞌ ọij jac. Ojñiꞌdye jämꞌtyeꞌ jac, mọꞌdyes qui ojñiꞌĉan shupquiꞌ ọij jac. 6Chiꞌojñiꞌyaꞌdye muꞌ Jenꞌ ac̣hiꞌbanꞌ ọij jac jiquej bänedyeꞌyaꞌ. 7Q̂uinꞌ qui namꞌ q̂uinꞌsiꞌ ọij jac judyeyaꞌ mạyedyeꞌ aty vaꞌtacdyedyes yụꞌtyeꞌ Jenꞌ p̂eyacdyeꞌyaꞌ muꞌ. Mọꞌ yiꞌ p̂udaijjeꞌ ca raꞌ ọij jac, aty ayijyaꞌ tupudyeꞌ jịꞌcäts yụꞌtacsi raꞌ juchadyeꞌyaꞌ muntyiꞌ in, judyeyaꞌ raꞌ vaꞌcacsequi ac̣hiꞌyity in.
8Chätidyeꞌ mạꞌjeyacdyety yụ, jam raꞌ muyetyejcatiñeꞌ ọij p̂eyacdyeꞌ yiꞌsiꞌ: Jenꞌtum, yiris mạyedyeꞌ jeñej yiriꞌ mir yómodyeꞌ tsuntum, judyeyaꞌ yiriꞌ mir yómodyeꞌ jeñej yiris mọmoꞌ mạyedyeꞌ muꞌtum. 9Jeshaꞌ Ayoꞌ tsun jam junꞌ farajjeyaqui ĉụiꞌsiꞌ p̂eyacdyeꞌ muꞌ, mọꞌĉandye raꞌ jịꞌcätseꞌ, jam jeñej ñinaquity in pạrej yi in: "Aty men muꞌ jam raꞌ atsijban muꞌ", yi in. Meꞌdyes muꞌ q̂uinꞌ jambiꞌ atsijban, tacaꞌ dyichchuti miꞌindyes q̂uinꞌ, muꞌ jam mạꞌjeꞌ meꞌ paj qui yirity muntyiꞌ vaꞌcac tsäquiꞌsisĉan, mọꞌ muꞌ mạꞌjeꞌ paj qui räj muntyiꞌ dyijyi juchajcheꞌ in judyeyaꞌ paj jụjjete Jenꞌ in.
10Aty raꞌ ayijyaꞌ mọꞌ tupudyeꞌ Ayoꞌsiꞌ, mọꞌ ayidyemꞌ jeñej yirity shushuꞌaty muntyiꞌ, meꞌ ramꞌ, jam raꞌ chị́vaꞌjoij muntyiꞌ in. Vatyquej raꞌ topyiꞌ mạyedyeꞌches jedyeꞌ, fer raꞌ shäjäꞌjäyetiꞌ tŝọiꞌ taquenꞌdye raꞌ coꞌshaiꞌ judyeyaꞌ ọij jac chimeꞌ pach, räjtumdye jedyeꞌ meꞌchuiꞌsiꞌ ọ́cheꞌ.
11Aty chị́jaꞌ tsun räj raꞌ meꞌ coꞌshaiꞌ, ¿junꞌ qui bu raꞌ jämꞌ bäꞌyi miꞌin q̂uinꞌ? Jemoñeꞌ qui rụij bäꞌyi miꞌin, cäc̣häꞌchuptinte qui raꞌ dyijyedyeꞌ Jenꞌsiꞌ muꞌ, 12bisbitinte raꞌ miꞌin tupudyeꞌ Jenꞌsiꞌ muꞌ, ferdyeꞌ yụꞌtacac carijtaĉamꞌ paj qui cavin ayijbanꞌ tupudyemꞌ. Aty ayijyaꞌ tupudyeꞌ coꞌshaiꞌ raꞌ taquenꞌdye räj mạyedyeꞌches jedyeꞌ in, räj raꞌ jiꞌchiñeꞌ. 13Tsun qui na ramꞌ jam noiꞌyejaꞌ, mọꞌ ramꞌ bisjaꞌ yódyesdyemꞌ yụꞌtyes raꞌ muꞌ Jenꞌ u, mọꞌ mụiꞌsis jac, judyeyaꞌ mụiꞌsis mạyedyeꞌ, mọꞌ p̂eyes Jenꞌsiꞌ p̂eyacdyeꞌ muꞌ. Mọꞌcheꞌ raꞌ yedyej rụijsis dyijyedyeꞌ Jenꞌsiꞌ muꞌ cạc in.
14Chätidyeꞌ mạꞌjeyacdyety yụ, mọꞌ bisvaꞌtiñes miꞌin, ferdyeꞌ yụꞌtacac rụij bäꞌjamꞌ paj qui jam jụꞌñiij daquishunac miꞌin. Jenꞌsiꞌtum maꞌjodyeꞌ bäꞌjamꞌ ĉojtyiꞌĉan miꞌin. 15Chịj miꞌin, muꞌ Jenꞌ tacaꞌ tyumꞌchutidyeꞌtum bisnac miꞌin, tacaꞌ mọꞌyaꞌ yụꞌtyeꞌ tupudyeꞌ tupuj c̣hoñi miꞌin. Chimeꞌdye muꞌ mạꞌjeyacdyety vojity tsun muꞌ Pablo, mọꞌdyemꞌ jiꞌchäyitidyeꞌ sánacdyeꞌcheꞌ muꞌ miꞌindyes. Muꞌ Jenꞌ jasoꞌmiti dyijyedyedyes muꞌ, yoquiꞌdyemꞌ sáñeꞌyaꞌ jiquej u. 16Sánacdyeꞌ muꞌ räj mọꞌcheꞌ p̂eyeꞌ ọij jiꞌchäyitidyeꞌ. Pạrej na mọꞌches jiꞌchäyitidyeꞌ pạrej carij seꞌvac jedyeꞌ yiꞌ chuc mọꞌ junꞌ buꞌyiꞌ chuc cạiꞌ. Muꞌin na itŝity dyijyedyeꞌ in, muꞌin yoc yoc dyijyity in, pạrej muꞌin meꞌtyity in cäjve jịjijcayepte in mọꞌ carijsis jiꞌchäyitidyeꞌ Pablosiꞌ muꞌ, judyeyaꞌ yocsiꞌ sánacdyeꞌ Jenꞌsiꞌ muꞌ chimeꞌjeꞌdye mọꞌ vaꞌve jịjijcayeꞌ in, mọꞌ raꞌ jiꞌmeꞌtacsiꞌ vaꞌtacdyeꞌyaꞌ.
17Chätidyeꞌ mạꞌjeyacdyety yụ, aty jäꞌmij tashcheꞌ chịj miꞌin junꞌ chuc muꞌin cäjsis jịꞌchiyacsity in, mọꞌdyes jämꞌ ĉujcatac miꞌin paj qui jam vaꞌve jịjijcayinac jiꞌchäyitidyeꞌ muꞌinsiꞌ ac̣hiꞌyitysiꞌ in, paj qui jam peñi miꞌin p̂eyacdyedyes Jenꞌsiꞌ muꞌ. 18Yejĉojamꞌ p̂anjamꞌ paj qui dadamꞌ chị́yetinte muꞌ Ayoꞌ Jesucristo, muꞌ Jiꞌc̣honsinꞌtyiꞌ tsun, yejĉojaꞌ dadamꞌ cäc̣häꞌchubimac mạꞌjitidyes muꞌ. Räjĉan raꞌ muꞌ timaꞌqueja Cristo, paj jam jụꞌñisĉan mạyedyeꞌ mọtsiꞌ timaꞌcacdyeꞌ muꞌ. Paj meꞌ.
S'ha seleccionat:
Jäqui'ves Pedros 3: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'