Jäqui'ves Pedros 1
1
Tashches voryedyeꞌ Pedros muꞌ
1Yụ Simón Pedro, úñity Jesucristoty muꞌ jutactyiꞌ yụ. Yụ sáñeꞌ ọij miꞌindyes anicjetintety tsuntyiꞌ Jenꞌ, muꞌdye Jesucristo Jiꞌc̣honsinꞌtyiꞌ tsun. Muꞌ soꞌminac anicyedyes miꞌin, mọꞌ damꞌdye yaꞌis, mọꞌyaꞌ c̣hoñi miꞌin chịmoꞌdye tsun soꞌmin chimeꞌ, ĉaĉaij na muꞌ rụijtyity, vaj cäts qui soꞌmisinꞌ. 2Yụ cọdyete Jenꞌ paj qui muꞌ soꞌminac ñịbeꞌjitidyes muꞌ, paj qui chimeꞌ soꞌminac maꞌjodyeꞌ ĉojtyiꞌĉandyes miꞌin, paj qui jam quijnacdyeꞌtum soꞌminac, meꞌ buꞌyi raꞌ yuꞌtyiyinac muꞌ Jenꞌ ĉaĉaij na miꞌin jämꞌ chị́yetinte judyeyaꞌ chimeꞌ chị́yetinte muꞌ Jesús Ayoꞌ tsun.
Meꞌ raꞌ dyijyejaꞌ tsun anicjejaty Jenꞌ
3Jenꞌ ĉụiꞌsiꞌyaꞌ ferdyeꞌ muꞌ räj soꞌmisinꞌ mọꞌ jemonjas tsun paj qui rụij bäꞌjaꞌ, judyeyaꞌ cäc̣häꞌchubija Jenꞌsiꞌ dyijyedyeꞌ muꞌ, meꞌ raꞌ tsun ĉaĉaij na aty chị́yeja muꞌ Cristo. Muꞌ fayisinꞌ paj qui meꞌchubija ferdyeꞌ muꞌ judyeyaꞌ jämꞌyedyeꞌ muꞌ. 4Meꞌ muꞌ soꞌmisinꞌ anic mọjoꞌchas ñịbeꞌyedyes in, mọꞌ p̂eyes mọꞌ p̂eyacdyeꞌ yuꞌtyiyisinꞌsiꞌ tsun. Muꞌ soꞌminac ñịbeꞌyedyes muꞌ paj qui meꞌchubitinte Jenꞌsiꞌ dyijyedyeꞌ muꞌ, paj qui c̣hoñiꞌ miꞌin aꞌc̣hisĉan dyijyedyeꞌ muntyis muꞌin úchetysiꞌĉan in. 5Jemoñeꞌ fer dyijtutiñeꞌ miꞌin paj qui yejĉoij p̂añi Jenꞌdyes miꞌin. Aty anicjetinteyaꞌ Jenꞌ, ferdyeꞌ yụꞌtacac cächjevac paj qui jämꞌyedyeꞌtum bäꞌyi miꞌin. Aty jämꞌyedyeꞌtum bäꞌyi jụijyaꞌ miꞌin, jemoñeꞌ qui chimeꞌ dyijyedyeꞌtum bäꞌyi miꞌin. 6Aty meꞌ dyijyedyeꞌtum jụijyaꞌ miꞌin, jemoñeꞌ qui jämꞌ ĉujcati chimeꞌ miꞌin, aty jämꞌ ĉujcati jụijyaꞌ miꞌin, jemoñeꞌ qui tyumꞌchutidyeꞌtum bäꞌyi miꞌin, aty tyumꞌchutidyeꞌtum bäꞌyi jụijyaꞌ miꞌin, jemoñeꞌ qui jämꞌ cäc̣häꞌchuptinte Jenꞌsiꞌ dyijyedyeꞌ muꞌ chimeꞌ. 7Aty meꞌ jụijyaꞌ jemoñeꞌ qui vojity jítidyeij miꞌin chimeꞌ. Aty meꞌ jụijyaꞌ miꞌin, jemoñeꞌ qui mạꞌjeyacsi bäꞌyi miꞌin, meꞌ meꞌ raꞌ cächjetiñeꞌ miꞌin.
8Meꞌ cächjetiñeꞌ dyijyedyeꞌ jụijyaꞌ miꞌin, meꞌ raꞌ chat Jenꞌdyes bäꞌyi miꞌin, mijam raꞌ fibiꞌ bäꞌyi miꞌin, mijam qui raꞌ chimeꞌ fibiꞌ chị́yetinte Jesucristo Ayoꞌ tsun. 9Tyi chuc jam meꞌ dyijyi jụijyaꞌ, muꞌ jam naijti ĉojtyiꞌĉan, muꞌ jeñej buꞌyi oshnoty muntyiꞌ, ĉaĉaij na muꞌ yaquintubanꞌtyiꞌ junꞌ chuc muꞌ Jenꞌ c̣hiconꞌjajitaque judyeyaꞌ vayacjajibuti juchaj muꞌ. 10Anic meꞌ vojity, cächjevac ferdyeꞌ miꞌin paj qui rụij bäꞌyi muꞌdyes miꞌin, meꞌ buꞌyiꞌ raꞌ miꞌin jịꞌĉoyacsi miꞌin anictyity tsimꞌtactyiꞌ Jenꞌtyiꞌ muꞌ. Meꞌ jụijyaꞌ miꞌin, meꞌ raꞌ chat jam junꞌ peñi miꞌin. 11Chat qui raꞌ ñịbeꞌjitidyesyaꞌ muꞌ Jenꞌyaꞌ yuꞌnac miꞌin, muꞌcheꞌ raꞌ tiĉunꞌnac miꞌin, ayoꞌbuꞌyedyeꞌĉan muꞌ Ayos tsun Jesucristos Jiꞌc̣honsinꞌtyiꞌ tsun, mijam raꞌ jụꞌñisĉan mạyedyeꞌ mọtsiꞌ ayoꞌbuꞌyedyeꞌ muꞌ Ayos tsun.
12Yụ raꞌ yejĉoij jiꞌdyijvebadyeyac ọij jiꞌchäyitidyeꞌ, meꞌ tsanꞌ aty chị́yetiñeꞌ miꞌin, meꞌ tsanꞌ aty jämꞌ cäc̣häꞌchutiñeꞌ ọij p̂eyacdyeꞌ anicsis soꞌminacsiꞌ jiquej, yụ qui raꞌ yejĉoij jiꞌdyijvebadyeyac. 13Tacaꞌ raꞌ yejĉoij yụ rụiꞌcuꞌĉandyemꞌ yụ, mọꞌ carijtacdyeꞌ yụ paj qui jiꞌdyijvebadyeyac ọij jiꞌchäyitidyeꞌ yụ. 14Muꞌ Jesucristo Ayoꞌ tsun aty jiꞌchäquiyin yụ aty c̣hẹiꞌyaꞌ sänꞌdyeꞌ yụ, yạjquiꞌ raꞌ yụ ọij jac. 15Mọꞌdyes q̂uinꞌ yụ ferdyeꞌyaꞌ yụ jịꞌchiqueyeyac ọij jiꞌchäyitidyeꞌ yụ, aty raꞌ yạjquiyacyaꞌ yụ, miꞌindyety qui raꞌ yejĉoij dyijtutiñeꞌ ọij jiꞌchäyitidyeꞌ.
Muꞌin cạveptety Cristos pashquedyeꞌ jiquej in
16Ọij jiꞌchäyitidyeꞌ jéyacsiꞌ tsun miꞌin, mọꞌ p̂eijbites ferdyeꞌ Jesucristos muꞌ Ayos tsun judyeyaꞌ caꞌñibudyeꞌ raꞌ muꞌ, mọꞌ anicsis p̂eyacdyeꞌ, mọꞌ jam muntyis väñädyeꞌ muꞌin, mọꞌ jiꞌshupques ĉụiꞌsiꞌyaꞌ dyijyedyeꞌ muꞌin. Tsun ĉụiꞌsiꞌyaꞌ vej tsun cạvepte tsun pashquedyeꞌ muꞌ. 17-18Tsun penꞌdyetute jiquej Jenꞌtyiꞌcheꞌ mụcuꞌ, yoquiꞌdyemꞌ muꞌ Jenꞌ Ạvatusinꞌtyiꞌ tsun, jasoꞌmiti fer buꞌyedyeꞌ muꞌ judyeyaꞌ timaꞌcacdyeꞌ muꞌ. Seꞌveꞌ chimeꞌ tsun mọꞌ p̂eyacdyeꞌ muꞌ mujuꞌchatysiꞌ Jenꞌ mạyedyeꞌchetysiꞌ, yi muꞌ: "Uts nash mạꞌjeyacdyety Ạvaꞌ yụ, anic maꞌjotacdyety yụ."#1:17-18 Mateos 17:1-5
19Ọij mọmoꞌ cạveꞌ tsun, mọjoꞌchas vatyquej anicsis shupquiꞌ tsundyes mọꞌ tashches p̂eyacdyeꞌ jasoꞌmititysiꞌ p̂eyacdyeꞌ Jenꞌ jiquej in. Mọꞌdyes jemoñeꞌ miꞌin jämꞌ chiquetiñeꞌ ọij p̂eyacdyeꞌ, mọꞌ jeñej buꞌyiꞌ mạijyis tojmadyeꞌĉan, mọꞌ raꞌ yejĉoiꞌ mạij buꞌyiꞌ junꞌ quiꞌ chuc nạijjoiꞌyaꞌ, mọꞌ jeñej buꞌyiꞌ ayidyeꞌ Ayoꞌsimꞌ, chat qui raꞌ muꞌ mạijchubusinꞌtyiꞌ ĉojtyiꞌ tsun, muꞌ jeñej buꞌyi nạijjodyeꞌ tuiꞌtyiꞌ ọ́rotaꞌ, meꞌ buꞌyi raꞌ. 20Jämꞌ seꞌvevac ọij mọjoꞌchas jiꞌchäyitidyeꞌ, yiꞌ: ĉụiꞌsiꞌyaꞌ mọmoꞌ dyijyedyeꞌ jụijyaꞌ tsun, mijam mọꞌ méquiꞌ chicacsebijaꞌ jätäjyiꞌ chuc muꞌinsiꞌ sánacdyeꞌ muꞌin jasoꞌmititysiꞌ p̂eyacdyeꞌ Jenꞌ jiquej in, 21ĉaĉaij na muꞌin meꞌdye chimeꞌ in jam ĉụiꞌsiꞌyaꞌ dyijyedyeꞌ muꞌin p̂eyaqui jiquej in. Jenꞌsiꞌ Ạꞌedyeꞌ soꞌmacsiꞌ dyijyedyedyes muꞌin paj qui muꞌsiꞌ p̂eyacdyeꞌ p̂eijbite in.
S'ha seleccionat:
Jäqui'ves Pedros 1: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'