मूक चेलाकू 25
25
पिसतूस मड़ंगरे पउलूस
1कइसरियारे सोदोरनेनखन पेय दिन तयोमरे पिसतूस हंडा अते एरुसलेम अगी तोराय। 2हंडा मरंग पुजउरीकू अरू एहूदा मूक होड़कू हाँय एचेरे वेगकियानखन पउलूसकू बदीतेरा। 3हँकुःआ होड़कू पउलूस दूनूररेकू एचे ञेडगेय लगाकू ओंगलेःआ। हनालगा हँकू पिसतूस एचेरेकू कताया, “अले मयावाडलेखन आम पउलूस एरुसलेम सहररे एचे अगूगेय।”
4मनदो पिसतूस कतातेरा, “पउलूस कइसरिया सहररे तोलतो इदानिया अरू ईंग हों हंडा सेन लगा इदा। 5अपेरिकुःआ अदोम मूक होड़कू ईंग सुदा सेन लगापे वारगोडकू अरू हाँयग होड़ तोनोंगाः गारबारे एचेकेड दो हंडा हाँय बदीकेडखनपे कता उदुःगेय।”
6हँकू सुदा एरुसलेमरे आठ दस दिन दोहोनेनखन हाँय कइसरिया अगी तोराय। अरू हंडा सोदोरनेनखन एटाः दिन कोट कछेरी ओड़ाःरे दुड़ुःकियाखन पउलूस अगूय लगा अगुरा होड़कूय हुकुमवातेरा। 7हँकू पउलूसकू अगूतेरा दो एरुसलेम अतेकू वेजेडा हँकुःआ एहूदा मूक होड़कू पउलूसराः चइरो गतर चड़ाँनेनखन मुरुक बगरा जाः बड़रा हाँय बदीरेकू कता उदुःतेरा। मनदो हँकू आभा मेरकू पुराव अवेगाड।
8हनते पउलूस कता कुदातेरा, “ईंग एहूदाकूराः नियम बदीरे सहे भगवानराः ओड़ाः बदीरे सहे कइसर मरंग राजा बदीरे ईंग तोनोंगाः मेरिंग कसूरगरा।”
9पिसतूस एहूदा मूक होड़कू एचे बहालकू लगा पउलूस एचेरेय कतातेरा, “आम बदीरे जाः बड़रा इदा हना ईंग फड़ियावगे लगा एरुसलेमरे सेन लगाम चहाःतना जा?”
10दो पउलूस कतातेरा, “ईंग रूमी देसराः कोट कछेरीरे चड़ाँत इदानिंगा। अरू ईंगराः फड़ियाव ननंडा होयाः लगा इदा। अरू ईंग एहूदाकू बदीरे तोनोंगाः गारबार मेरिंग एचेगरा। हना नपायतेम सुदीयतना। 11गुजुः इयाःआ तोनोंगाः गारबारिंग एचेकेरा दो गुजुः अते बनसाः लगा मेरिंग चहाःतना। मनदो नँकू ईंगकू जाःतना हना कताकून अते तोनोंगाः कता सताय मेर दोहोना दो तोनोंगीग ईंग हँकू तिःईरे ओरोकू जिमा अवेतिरिंगा। दो नुँहू कनइसर मरंग राजा ईंग फड़ियावगींग लगायिंग असेयतना।”
12हनते पिसतूस आँयगरिकुःआ सलाहदार होड़कू सुदा सलाहनेनखन पउलूसे कतातेरा, “आम कइसर मरंग राजा एचेरे फड़ियावमे लगाम असेकेरा। हनालगा ईंग आम हाँय एचेरे रूमी सहरिंग वारमेता।”
पिसतूस एचेरे अगरिपा राजा
13तोनोंग दिन तयोमरे अगरिपा राजा अरू आँयगरीग मेसेत बेरनिका पिसतूस सुदा जुमाः लगा कइसरियारेकिन वेजेडा। 14हँकिन पिसतूस सुदा मुरुक दिन वरीकिन दोहोना। हनमेला पिसतूस पउलूस बदीरे राजाय कता उदुःवातेरा, “पेलिकस तोलतोय अटूडिया मी होड़ होड़ नंडा इदानिया। 15ईंग एरुसलेमिंग सेनेडा, हनमेला मरंग पुजउरीकू अरू एहूदाकूरिकुःआ मूक होड़कू हाँय बदीरेकू लालिसतेरा अरू हँकू हाँय डंडियावगेय लगाकू चहाःआ।
16मनदो ईंग हँकू एचेरेयिंग कतातेरा, बेगर फड़ियावते तोनोंगीग होड़ डंडियावगे दो रूमी देसराः रिती-बिधी इया कोवानेःआ। डंडियावगेय अते मड़ंग हाँयग होड़ कता कुदाय घड़ीन अनँयग बनसाः लगा दाव एमेवाय लगा इदा, माःआन। 17हँकू ईंग सुदा नंडाकू वेजेडा दो हाँय फड़ियावगेय लगा मेरिंग कुबेरगाड। मनदो एटाः दिन फड़ियावगेय लगा गदीरेयिंग दुड़ुःनेना अरू हाँयग होड़ ईंग मड़ंगरे अगूगेय लगायिंग हुकुमतेरा। 18हाँयकू जाःतेरा हँकुःआ होड़कू बड़रा लगाकू चड़ाँनेना दो ईंग ओंगलेःआ हना इयाःआ तोनोंगाः गारबार पउलूस बदीरे हँकू मेरकू कतागाड। 19मनदो हँकू अँकूराः बिसवास बदीरे अरू, गोएगनेना अरू पउलूस हाँय जीयत इदानिया माःआन पनकियाय कतागेःआ ईसू ञावीग मी होड़ बदीरे हाँय सुदाकू अड़ा-चउकीःआ। 20दो नाःआ कता ईंग करा उड़ीयिंग फड़ियावगेता माःआन ओओंगोलरेयिंग दोहोना। हनालगा ईंग हाँय एचेरेयिंग होंबोरतेरा, नाःआ कता फड़ियाव होयाः लगा आम एरुसलेमरेम सेनता जा? 21मनदो पउलूस कइसर मरंग राजा हाँय फड़ियावगे लगाय असेतेरा। दो हाँय कइसर मरंग राजा एचेरे रूमी सहर अगी, अरीनिंग वारगेय वरी तोलतोय दोहो ओवागेय लगायिंग हुकुमतेरा।”
22हनते अगरिपा पिसतूसे कतावातेरा, “ईंग हों हाँय एचेरे अअयूम लगायिंग चहाःतना।”
दो हाँय कतातेड, “आम गपाम अयूमगेता।”
अगरिपा राजा मड़ंगरे पउलूस
23एटाः दिन अगरिपा अरू बिरनिका फड़ियावगेःआकू हना ओड़ाःरेकिन सेनेडा दो होड़कू मुरुक रीझ-रंगतेकू पइड़घाव अगूतेडकिना। अरू हँकिन सुदा सइनाकूरिकुःआ मरंग हातपात होड़कू अरू हना सहररिकुःआ मरंग मरंग होड़कू होंकू दोहोना। हनते पिसतूस पउलूस अगूगे लगाय हुकुमतेरा। 24दो पिसतूस कतातेड, “ने अगरिपा राजा अरू नंडा ईंग सुदा इदानपेःआ अपे जमा होड़कू, नाँयग होड़पे ञेल। जमा एहूदाकू एरुसलेमरे अरू नंडा हों मुरुक सटीते नाँयग होड़ तोनोंग इया ञेड गोजेय लगाकू असेया। 25मनदो ईंग सुदीगोतेडा, नाँय हना इया तोनोंगाः गारबार मेरेय एचेगरा। अरू हाँय अनँयग आँयगते कइसर मरंग राजा एचेरे एचे फड़ियावगुः लगाय असेतेरा। दो हाँय मरंग राजा एचेरे वारगेय लगायिंग ओंगोलतेरा। 26मनदो नाँय बदीरे कइसर मरंग राजा एचेरे तोनोंग इयाःआ ओजाःगे लगा ईंग एचेरे कोवानेःआ। हनालगा अपे जमाकू मड़ंगरे बिसेक, ने अगरिपा राजा, अनम मड़ंगरे नाँय ईंग अगूकिरिया, जेमहा आम जासकिरिगखन नाँय बदीरे कहिसाः ईंग ओजाःगे लगायिंग पवाः। 27ईंग ओंगोलरे तोनोंगीग तोलतो होड़राः बदीरे तोनोंगाः जाः बड़रा इदान दो हना नपायते मेरिंग ओजाःगे वरी हाँयग होड़ कइसर मरंग राजा एचेरे वारगेय लगा कोवानेःआ।”
S'ha seleccionat:
मूक चेलाकू 25: kfp
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.