Romano 8
8
Tachi Ak'õre Jaoredepa nipadai k'orea bɨda
1Naapae tachi Cristo Jesú ome p'anɨ pẽra nepɨra mi ãpia pida pará p'anɨane a bɨwẽma.#8:1 Griego pedeade chi eda waapẽarã k'art'ade nãɨ sida bɨ bɨma: ãchi nãɨ k'ak'uapa nemietá oo k'ɨ̃ria bɨdepa nipadawẽ pẽra, mãɨpari Tachi Ak'õre Jaoredepa nipada pẽra. 2Ichidepa Tachi Ak'õre Jaorepa tachi chok'ae bapida pẽra, tachi nemietaadepema, piudai pada pari ãjã́ bɨsima. 3Moisepa bɨdapa tachi nemietaadepema p'ue pari ãjã́ bɨé pasima. Nãɨ k'ak'uapa oo k'ɨ̃ria bɨdepa nipapataɨrãpa mãɨ Moisepa bɨda oodai k'aepẽra nemietá oopatama. Maamina Tachi Ak'õrepa ichi Warra peesima tachi chi nemietá oopataɨrã jĩra bamẽrá. Mãɨne tachi nemietá pari piusima. Mãɨya Tachi Ak'õrepa nemietá tachi k'ak'uadepa oodada ɨtɨasima. 4Ichia mãɨya oosima tachia p'ue jĩp'a oodamẽrá Moisepa bɨdade jara bɨ jĩra. Naapae tachi jĩp'a nipadaipɨ nãɨ k'ak'uapa oo k'ɨ̃ria bɨdepa nipadawẽ pẽra, mãɨpari Tachi Ak'õre Jaoredepa nipapata pẽra.
5Chi nãɨ k'ak'uapa nemietá oo k'ɨ̃ria bɨdepa nipapataɨrãpa abapuru nãɨ k'ak'uapa oo k'ɨ̃ria bɨt'a k'ɨ̃risiapatama. Maamina Tachi Ak'õre Jaoredepa nipapataɨrãpa Ichia k'ɨ̃ria bɨt'u k'ɨ̃risiapatama. 6Chi abaɨpa nãɨ k'ak'uapa oo k'ɨ̃ria bɨt'a k'ɨ̃risia baipɨra piuipɨ. Maamina chi Tachi Ak'õre Jaorepa k'ɨ̃ria bɨt'a k'ɨ̃risia baipɨra ne k'ɨ̃risiawẽa baipɨ mãɨnepa Tachi Ak'õre ome chok'ae baipɨ. 7Nãɨ k'ak'uapa oo k'ɨ̃ria bɨt'a k'ɨ̃risia baipɨra, Tachi Ak'õre ome chi nek'ĩramaapɨ. Moisepa bɨda jĩra ooi k'ɨ̃riak'ama; mi ãpia pida p'ue ook'ama. 8Chi nãɨ k'ak'uapa oo k'ɨ̃ria bɨdepa nipapataɨrã Tachi Ak'õrepa pia unuk'ama.
9Maamina Tachi Ak'õre Jaore piarã mãra sõne bɨ pẽra, ichidepa nipapatama. Nãɨ k'ak'uapa oo k'ɨ̃ria bɨdepa nipadak'ama. Piarã chi Cristo Jaore nea bɨt'a Cristodewẽma. 10Maamina Cristo mãra sõne bɨpɨra, mãra jaore chok'ae bɨma Tachi Ak'õrepa mãra nepɨra newẽa p'anɨane a bɨ pẽra. Mãrapa nãɨ k'ak'uade nemietá oo p'anana k'orea piudaipɨ. 11Maamina ichi Jaore mãra sõne bɨ pẽra, ichidepa mãra k'ak'ua piui bɨt'a chok'ae p'irabaripiipɨ Cristo Jesú chok'ae p'irabaripida jĩra.
12Mãɨpuru ũpẽarã, tachi piarã Tachi Ak'õre Jaoredepa nipadai p'anɨma. Nãɨ k'ak'uapa oo k'ɨ̃ria bɨdepa nipadaiwẽa p'anɨma. 13Mãra nãɨ k'ak'uapa oo k'ɨ̃ria bɨdepa nipadaipɨra piudaipɨ. Maamina chi nãɨ k'ak'uapa nemietá oo k'ɨ̃ria bɨt'a Tachi Ak'õre Jaoredepa itu bɨdaipɨra, Tachi Ak'õre ome chok'ae p'ananaipɨ. 14Jõma Tachi Ak'õre Jaoredepa nipapataɨrã Tachi Ak'õre warrarãpɨ. 15Mãrapa Tachi Ak'õre Jaore jitasidaɨde, mãrá wap'eapié pasima, chi chipari pae pari mimiaparí jĩra. Mãɨpari mãra bɨsima Tachi Ak'õre warrarã padamẽrá mãɨnepa ichiá «¡Mɨ ak'õre!» adamẽrá. 16Tachi sõne Tachi Ak'õre Jaorepa k'awapi bɨma piarã Tachi Ak'õre warrarãt'a. 17Ichi warrarã pẽra Cristo ome ichia uru bɨdepema jitadaipɨ. Tachi piarã Cristo minachia mĩana jĩra minachia mĩa p'ananaipɨra, Tachi Ak'õrepa Cristo ome ará minachia pia bɨipɨ.
Tachi Ak'õrepa ne ãarea ook'oait'a nɨ p'anɨma
18Mɨmá, chi nãɨ ewaride tachi minachia mĩa p'anɨt'a mãɨ ãpia bɨ jĩra bɨma, chi k'aadeapema ewaride Tachi Ak'õrepa tachi pia bɨi k'aepẽra. 19Nejõma Tachi Ak'õrepa ook'oada ãarea nɨ p'anɨma ichi warrarã pia p'aneeuta k'orea isapea unupimẽrá, 20naena piawẽa basi pẽra. Ichi tuaba mãɨya piawẽa beaé pasima, mãɨpari Tachi Ak'õrepa mãɨya beepisima. Maamina nejõma piawẽa beadapa nɨ bɨma, 21Tachi Ak'õrepa mãɨ pia bɨmẽrá ara ichi warrarã pia bɨi jĩra. Chi chipari pae pari mimiaparí pari ãjã́ bɨ jĩra, ara chi Tachi Ak'õrepa ook'oada waa atuaiwẽma.
22Tachia k'awa p'anɨma chi wẽrapa warra t'õrune ɨbɨa t'õpi k'ɨ̃ria bɨ jĩra, nejõma Tachi Ak'õrepa ook'oadapa p'ua bɨdeepuru isapea pia beepi k'ɨ̃ria bɨma. 23Mãɨnepa tachia pida p'ua bɨdepa isapea chepii nɨ p'anɨma, Tachi Ak'õrepa tachi k'ak'ua pia bɨmẽrá. Ichi warrarã atarude mãɨya ooipɨ. Ichi Jaore tachiá naa teasima ichi warrarã piarã k'awadamẽrá. 24Tachi Ak'õrepa tachi k'aripada pẽra mãɨ nɨ p'anɨma. Chi tachia nɨ p'anɨt'a waidi nea p'anɨma. Uru badapara ¿k'ãre k'orea nɨ p'ananai p'anɨma? ¿K'aipa ichia uru bɨt'a, atai k'orea nɨ baima? 25Maamina chi tachia nɨ p'anɨt'a waidi nea p'anɨ pẽra jõma choa p'anɨnepa k'awa p'anɨma piarã atadaipɨ.
26Mãɨ awara ara tachi tuaba chaareawẽa p'anɨ pẽra Tachi Ak'õre Jaorepa k'aripa bɨma. Piarã atua p'anɨma sãmaasã́ Tachi Ak'õrea ará ɨt'aa chiididait'a. Maamina Tachi Ak'õre Jaorepa tachia p'ue jaradak'a pedeadepa tachi k'orea Tachi Ak'õrea ɨt'aa chiidiparima. 27Mãɨne Tachi Ak'õre tachi sõ ak'ɨparipa ichi Jaorepa ɨt'aa chiidi bɨt'a k'awa bɨma, ichia k'ɨ̃ria bɨ jĩra ichidirã k'orea ɨt'aa chiidipari pẽra.
Tachi Ak'õrepa ne ãareaɨne k'aripaparima
28Mãɨ awara Tachi Ak'õrepa k'ɨ̃risia bada jĩra chi ichi k'ɨ̃ria berã t'ɨ̃sima. Tachia k'awa p'anɨma mãɨrã pae Tachi Ak'õrepa ne ãareaɨne pia ooparit'a. 29Mãɨ mãɨya bɨma, ichia naenaena k'awa basi pẽra k'airã ichidirã pait'a. Ãchi bɨsima ichi Warra Jesú jĩra p'ananamẽrá. Mãɨya ichi Warra Jesú ũpẽarã chok'ará p'anɨnepema chi naapemapɨ. 30Tachi Ak'õrepa chi ichia naenaena bɨdarã t'ɨ̃k'oasima ichi Warra Jesú jĩra p'ananamẽrá. Chi ichia t'ɨ̃k'oada mãɨ chi ichidirã jĩp'a berã paara bɨsima. Chi ichia ichidirã jĩp'a berã paara bɨdá, ichi pia bɨdepema teaipɨ.
31¿Mãɨ k'orea sãmaasã́ k'ɨ̃risia p'anɨma? Tachi Ak'õre tachi lawari bɨ pẽra ¿k'aipa tachi p'ueima? 32Piarã Tachi Ak'õrepa ichi Warra wãak'aé pasima mãɨpari jõma tachi k'orea itu peapisima. Mãɨpuru ¿ichia tachiá nejõma pia Cristo ome ará teaiwẽk'ãra? 33¿K'aipa Tachi Ak'õrea ichia jɨrɨ atadaɨrã k'orea p'ue k'achia pedeaima? Ara Tachi Ak'õrepuru tachi chi ichidirã jĩp'a berã paara bɨparima. 34¿K'aipa tachi nepɨra pará p'anɨane aima? Abaɨ pida mãɨya jaraiwẽma Jesucristo tachi k'orea piuda pẽra. Ichi piu bada chok'ae p'irabarisima. Naapae Tachi Ak'õre juaraari bɨma. Mãma tachi k'orea Tachi Ak'õrea chichupuria idi bɨma. 35¿K'aipa tachi Cristopa k'ɨ̃ria bɨdepema p'ue ãyá bɨima? Ewari chaarea cherude, minachia mĩa p'anɨne, ẽpẽrarãpa tachi ẽp'ẽ p'anɨne, jarra cherude, neet'á nea p'anɨne, k'achiade p'anɨne, ẽpẽrarãpa pea k'ɨ̃ria p'anɨne mi ãpia pida tachi Cristopa k'ɨ̃ria bɨdepema p'ue ãyá bɨiwẽma. 36Tachi Ak'õre pedeade nãɨya bɨ bɨma:
«Ewaricha pɨ k'orea tai pea k'ɨ̃ria p'anɨma. Oveja peauta jĩra peadai k'ɨ̃risia p'anɨma».#Salmo 44:22.
37Maamina Cristopa tachi k'ɨ̃ria bɨma. Ichidepa jõma mãɨ tachia p'uepatama. 38-39Mãɨ k'orea mɨa k'awa bɨma tachi piudaipɨra wa chok'ae p'ananaipɨra, Tachi Ak'õrepa k'ɨ̃ria bɨdepema awara p'ananaiwẽma. Nãɨ ewaride mãɨnepa nũpema ewaride pida awara p'ananaiwẽma. Mãɨnepa Tachi Ak'õrepa ɨt'aripa peedaɨrãpa, jaore mietaarãpa, chi atepe berãpa, chi ɨtɨpemarãpa, chi ek'aripemarãpa, wa mi ãpia pida Tachi Ak'õrepa oodadepema pida tachi ichia k'ɨ̃ria bɨdepema p'ue ãyá bɨdaiwẽma.#8:38-39 Jaore mietaarã. Griego pedeade nãɨya bɨ bɨma: chi ateperãpa, jõma p'ue bepa. Ara mãɨ tachi k'ɨ̃ria bɨt'a, Tachi Chipari Jesucristodepa unupisima.
S'ha seleccionat:
Romano 8: tdc
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.