Romano 7
7
Moisepa bɨda k'orea Pablopa jarateada
1Ũpẽarã, Moisepa bɨda k'awa p'anɨ pẽra mãɨ k'orea mɨa mãrá pedearuma. ¿K'awa p'anɨwẽk'ãra tachi chok'ae p'anɨmisa Moisepa bɨda ũrinai p'anɨt'a? 2-3Nãɨ jĩra bɨma. Mãɨ Moisepa bɨdade jara bɨma wẽra k'ima pará bɨ ichi k'ima chok'ae bɨde ichi ome bai bɨt'a. Ichi k'ima wapida chok'ae bɨde mãɨ wẽrapa ɨmɨk'ĩra awara ataipɨra, Moisepa bɨdade jara bɨma mãɨ nepɨra pará bɨt'a. Maamina ichi k'ima piusira Moisepa bɨdadepema ãjã́ pari beesima. Mãɨne ichia ɨmɨk'ĩra awara ataipɨra, nepɨra newẽa bɨma.
4Ũpẽarã, ara mãɨ jĩra mãra Cristo ome p'anɨ pẽra, ichi piuk'ari Moisepa bɨdadepema pari ãjã́ p'aneesidama. Naapae mãra Cristoderã pẽra Tachi Ak'õre pae p'ue nepia oodaipɨ. 5Tachi nãɨ k'ak'uapa oo k'ɨ̃ria bɨdepa nipasidaɨde Moisepa bɨdade jara bɨ k'orea nemietá atepe ooi k'ɨ̃riasidama. Mãɨne nemietá oo p'anɨ k'orea piudai p'anasidama.#7:5 Piudai p'anasidama. Griego pedeade nãɨya bɨ bɨma: piudai chau p'anasidama. 6Maamina Moisepa bɨdadepa p'anana tachi pari ãjã́ p'aneesidama. Mãɨnepema piusida pẽra naapae Tachi Ak'õre pae nepia oodaipɨ ichi Jaoredepa. Waa k'ɨ̃risiadaiwẽma Moisepa bɨdadepa mãɨya oodait'a.#7:6 Jaoredepa...Moisepa bɨdadepa. Griego pedeade nãɨya bɨ bɨma: jaore chiwidi...k'art'a chõa.
Nemietá oo k'ɨ̃ria bɨ k'orea bɨda
7¿Mãɨ k'orea sãmaasã́ k'ɨ̃risiadai p'anɨma? ¿Moisepa bɨda mietá bɨk'ãra? ¡Mãɨyawẽma! Mãɨ Moisepa bɨda newẽpara mɨa atua bai pasima k'ãre nemietá. Mãɨ Moisepa bɨdade «abaɨpa uru bɨt'a k'ɨ̃riarãapade» awẽpara, mɨa k'awaiwẽ pasima mãɨ nemietaat'a.#Éxodo 20:17. 8Maamina «k'ɨ̃riarãapade» ada pẽra nemietá oo k'ɨ̃ria bɨdepa mɨa nejõma atepe k'ɨ̃riasima. Piarã Moisepa bɨda newẽpara nemietá atepe oo k'ɨ̃ria baiwẽ pasima.#7:8 Piarã Moisepa bɨda newẽpara nemietá atepe oo k'ɨ̃ria baiwẽ pasima. Griego pedeade nãɨya bɨ bɨma: chi Moisepa bɨdawẽa, chi nemietá piusima. 9Naena mãɨ Moisepa bɨda atua baside mɨ ne k'ɨ̃risiawẽa bapachima. Maamina mãɨ k'awaside mɨa nemietá oo k'ɨ̃ria beesima. Maapae nemietá k'orea piui basima. 10Mãɨ Moisepa bɨda oo bɨdepa mɨ Tachi Ak'õre ome chok'ae bai basima. Maamina ook'a pẽra mãɨ Moisepa bɨdadepa k'awapisima mɨ piui bɨt'a. 11Mãɨ Moisepa bɨdade oopi bɨ pedea k'orea mɨa nemietá atepe oo k'ɨ̃riasima. Maapae nemietaapa mɨ seasima k'ɨ̃risiamẽrá mãɨ Moisepa bɨdadepa jĩp'a bait'a. Maamina mãɨ ũrik'a pẽra piui basima.
12Piarã mãɨ Moisepa bɨda Tachi Ak'õrenepɨ, mãɨnepa chi mãɨne oopi bɨ pedeat'a Ichidipɨ, jĩp'a bɨma mãɨnepa pia bɨma. 13Mãɨyara ¿Moisepa bɨda pia bɨpa mɨ piupisik'ãra? ¡Mãɨyawẽma! Mãɨpari nemietá oo bɨ k'orea mɨ mãɨya piui basima. Mɨa nemietá oo bɨ k'orea mãɨ Moisepa bɨda pia bɨpa jara bɨma mɨ piui bɨt'a. Mãɨya pia unupi bɨma chi nemietá sãmaasã́ bɨt'a. Mɨa nemietá oo bɨt'a piarã minachia mietá bɨma.
14Tachia k'awa p'anɨma Moisepa bɨda Tachi Ak'õre Jaoredepa chesit'a. Maamina mɨ nãɨ k'ak'uade bɨma. Mɨ netoda jĩra bɨma, nemietá pae pari mimiaparí bamẽrá. 15Mɨa atua bɨma k'ãre k'orea jãɨya ooparit'a. Mɨa nepia oo k'ɨ̃ria bɨt'a ook'ama, mãɨpari mɨa nemietá oo k'ɨ̃riawẽa bɨt'a ooparima. 16Maamina mɨa nemietá oo bɨt'a oo k'ɨ̃riawẽa bɨ pẽra mãɨpa pia unupi bɨma Moisepa bɨda mɨa pia unu bɨt'a. 17Mãɨpuru ara mɨchia k'ɨ̃ria bɨdepa nemietá oo bɨwẽma, mãɨpari nemietá mɨ sõne bɨpa mãɨya oopiparima. 18Mɨa k'awa bɨma mɨ sõne nepia newẽma. Pia jaraipɨra, mɨ nãɨ k'ak'uade bɨ pẽra ara mɨchia k'ɨ̃ria bɨdepa nepia p'ue ook'ama. Mɨa pia oo k'ɨ̃ria bɨmina p'ue ook'ama. 19Piarã mɨa pia oo k'ɨ̃ria bɨt'a ook'ama, mãɨpari nemietá oo k'ɨ̃riawẽa bɨt'a ooparima. 20Mɨa nemietá oo k'ɨ̃riawẽa bɨt'a oo bɨmina, ara mɨchia k'ɨ̃ria bɨdepa mãɨya oo bɨwẽma. Mãɨpari nemietá mɨ sõne bɨpa mãɨya oopi bɨma.
21Mãɨpuru nãɨ k'awa bɨma: mɨa nepia oo k'ɨ̃ria bɨmina nemietá mɨ sõne bɨpa nemietá oopiparima. 22Piarã mɨa sõnepa Moisepa bɨda minachia pia unu bɨma. 23Maamina k'ɨ̃risia awara pida mɨ sõne bɨma. Mãɨpa mɨ eda jɨ̃a nɨbɨ uru bɨ jĩra, mɨá nemietá oopiparima. Chi mɨa pia oo k'ɨ̃ria bɨt'a mãɨ k'ɨ̃risiapa itu oopii k'ɨ̃riak'ama, nepia ooi k'ɨ̃risia ome chõo bɨ jĩra.
24¡Mɨ chupuri bɨma! ¿K'aipa mɨ nãɨ k'ak'ua chi piui bɨdepema pari ãjã́ bɨima? 25Aba Tachi Ak'õrepuru Tachi Chipari Jesucristodepa mɨ k'aripaipɨ. Mãɨ k'orea mɨa ichiá pia bɨade aruma. Piarã mɨ k'ɨ̃risiade Moisepa bɨda oo k'ɨ̃ria bɨma, maamina nãɨ k'ak'uade bɨ pẽra nemietá mɨ sõne bɨpa nemietá oopiparima.
S'ha seleccionat:
Romano 7: tdc
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.