Romano 5
5
Jesudepa Tachi Ak'õre ome sõpia p'anɨma
1Tachi Chipari Jesucristode ĩjãa p'anɨ pẽra Tachi Ak'õrepa tachi chi ichidirã jĩp'a berã paara bɨsima. Mãɨpuru Cristodepa Tachi Ak'õre ome sõpia p'anɨma. 2Mãɨ awara Jesucristode ĩjãa p'anɨ pẽra Tachi Ak'õrepa ichi sõpiadepa tachi ewaricha k'aripaparima. Mãɨnepa arapá p'anɨma k'awa p'anɨ pẽra Tachi Ak'õre pia bɨdepema jitadait'a. 3Mãɨ awara tachi minachia mĩa p'anɨne arapá p'anapatama k'awa p'anɨ pẽra makɨɨdepa pia choa k'awadait'a. 4Mãɨ choa p'anɨnepa k'awa p'anɨma Tachi Ak'õrepa tachi pia unu bɨt'a. Makɨɨdepa k'awa p'anɨma Tachi Ak'õre pia bɨdepema jitadait'a. 5Mãɨ seawẽma, mãɨpari piarã jitadaipɨ. Mãɨya k'awa p'anɨma Tachi Ak'õrepa ichi Jaore tachiá teada pẽra. Ichi Jaoredepa tachi sõne k'awapi bɨma tachi piarã minachia k'ɨ̃ria bɨt'a.
6Ara tachit'u tachi nemietaadepema p'ue ãyá wãnawẽa p'anasidaɨde Tachi Ak'õrepa bɨda ewaride Cristo tachi chi k'achia berã k'orea piusima. 7Ewariaba pida ẽpẽra jĩp'a bɨ k'orea abaɨ piuiwẽa bɨma. Maamina ẽpẽra pia k'orea ¿abaɨpa ara ichi itu peapii bɨejã? 8Maamina Tachi Ak'õrepa tachi minachia k'ɨ̃ria bɨt'a unupisima wapida nemietaade p'anɨne Cristo tachi k'orea piuda pẽra. 9Cristo oa ãrinanepa Tachi Ak'õrepa tachi chi ichidirã jĩp'a berã paara bɨparima. Mãɨpuru Cristodepa Tachi Ak'õrepa tachi ɨtɨai pada piarã k'aripaipɨ. 10Tachi wapida Tachi Ak'õre ome chi nek'ĩramá p'anasidaɨde ichi Warra piudadepa tachi ichi ome sõpia bɨsima. Mãɨya tachi piarã k'aripaipɨ Cristo chok'ae bɨ pẽra. 11Mãɨ awara Tachi Chipari Jesucristodepa Tachi Ak'õre ome pia p'anɨ pẽra ichidepa Tachi Ak'õre ome sõpia p'anɨma.
Adán mãɨnepa Cristo
12Ẽpẽra abadepa nemietá nãɨ ĩjũane chesima. Mãɨnepa mãɨ nemietaadepa tachi piudai p'anɨma. Jõmãɨrãpa nemietá oopata pẽra piupatama. 13Tachi Ak'õrepa ichi pedea Moisea bɨpii naena, ẽpẽrarãpa nãɨ ĩjũane nemietá oopachidama. Maamina mãɨ Moisepa bɨda nea bada pẽra jaraé pasima ẽpẽrarãpa nemietá oo p'anɨ k'orea, nepɨra pará p'anɨne aé pasit'a. 14Mãɨya bɨmina Adán ewaridepa waa Moisé ewaridea ẽpẽrarã piupachidama nemietá oopachida pẽra. Adanpa Tachi Ak'õrepa ichiá jarada itu bɨsima maamina ãchia Adán jĩra mãɨya nemietá oodaé pasima.
Adannepa jõmãɨrã piawẽa p'aneenana jĩra chi chei badadepa jõmãɨrã p'ue pia p'aneesidama.#5:14 Griego pedeade nãɨya bɨ bɨma: Adán chi chei bada jĩra basima. 15Piarã ẽpẽra aba bɨpa nemietá ooda k'orea jõmãɨrã piusidama. Maamina ẽpẽra aba bɨdepa Tachi Ak'õrepa ichi sõpiadepa pari chok'ae bapisima mãɨ ãarea chok'ae p'ananamẽrá.#5:15 Mãɨ ãarea. Griego pedeade nãɨya bɨ bɨma: chok'ará. Jesucristopa ichi sõpiadepa tachi pae ooda, chi Adanpa nemietá oo bada k'aepẽra atepe piipará bɨma. Mãɨpuru chi Tachi Ak'õrepa pari tea bɨt'a Adanpa nemietá oodadepa cheda jĩra bɨwẽma. 16Mãɨ awara Adanpa nemietá ooda k'orea Tachi Ak'õrepa ẽpẽerã ak'ɨk'ari jõmãɨrã nepɨra pará p'anɨane asima. Maamina ẽpẽrarãpa nemietá minachia oodaadamina, Tachi Ak'õre ichi sõpiadepa, ãchi chi ichidirã jĩp'a berã paara bɨparima. 17Piarã ẽpẽra aba bɨpa nemietá oodadepa jõmãɨrã piupatama. Maamina abaɨ ẽpẽra Jesucristodepa, mãɨ Adanpa ooda k'aepẽra ewaricha ichi ome minachia k'awa p'anɨrã jĩra p'ananaipɨ. Ichidepa Tachi Ak'õrepa ne mi ãpia pida teapade awẽa basima mãɨnepa ichi sõpiadepa minachia k'aripak'ari, ẽpẽrarã nepɨra newẽa p'anɨane aparima.
18Mãɨya ẽpẽra abaɨpa nemietá ooda k'orea Tachi Ak'õrepa ichi nepɨra ak'ɨk'ari jõmãɨrã sida nepɨra pará p'anɨane aparima. Mãɨnepa ẽpẽra abaɨpa jĩp'a ooda k'orea Tachi Ak'õrepa jõmãɨrã chi ichidirã jĩp'a berã paara p'ue bɨipɨ ewaricha ichi ome chok'ae p'ananamẽrá. 19Piarã ẽpẽra aba bɨpa Tachi Ak'õrepa jarada oodawẽ pẽra chok'ará ẽpẽrarã nemietá oopataɨrã p'aneesidama. Mãɨnepa ẽpẽra abaɨpa Ichia jarada jõma ũrisi pẽra chok'ará ẽpẽrarã Tachi Ak'õrepa jĩp'a p'anɨane aipɨ.
20Tachi Ak'õrepa Moisea ichi pedea bɨpisima ẽpẽrarãpa k'awadamẽrá nemietá minachia oo p'anɨt'a. Maamina ẽpẽrarãpa nemietá minachia oosidaɨde Tachi Ak'õrepa ichi sõpiadepa pia k'ĩra chupuriasima. 21Piarã ẽpẽrarãpa nemietá oopata pẽra piupatama. Maamina Tachi Ak'õrepa ichi sõpiadepa ẽpẽrarã chi ichidirã jĩp'a berã paara bɨparima Tachi Chipari Jesucristodepa ewaricha ichi ome chok'ae p'ananamẽrá.
S'ha seleccionat:
Romano 5: tdc
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.