Hecho 23
23
1Pablopa judiorã chaarearãmá pia ak'ɨk'ari jarasima:
—Mɨ ũpẽarã, mɨ ne k'ɨ̃risiawẽa bɨma, k'awa bɨ pẽra idi wapida Tachi Ak'õre k'ĩrari pia baparit'a.
2Mãɨne chi p'aarerã minachia k'awa bɨ Ananiapa chi Pablo k'ait'a p'anɨa jarasima ichi it'aede p'edamẽrá.#23:2 Mãɨ Anania p'aarerã chi atepe chaarea bɨ pasima ãyo 47—59. Ichi minachia k'achia basima. Judio mãɨya bɨmina judiorãpa ichi peasidama ãyo 66de. Capítulo 5de, chi Anania mãɨ ẽpẽra awaraɨ k'orea bɨ bɨma. Ichiaba capítulo 9de mãɨnepa 22de chi Anania mãɨ ẽpẽra awaraɨ k'orea bɨ bɨma. 3Mãɨpuru Pablopa Ananiá jarasima:
—¡Tachi Ak'õrepa pɨ p'eipɨ! ¡Pɨa jarateaparí jĩra ook'ama!#23:3 ¡Pɨa jarateaparí jĩra ook'ama! Griego pedeade nãɨya bɨ bɨma: jãɨrã te mawara ɨ̃rɨpema t'ot'oa p'ɨrɨda. Mateo 23:27-28; Ezequiel 13:10-16. Pɨ jãma suak'abari bɨma Moisepa bɨdadepa mɨ nepɨra ak'ɨi k'orea maamina ¡mɨ p'epi bɨdepa ara mãɨ Moisepa bɨda itu bɨ bɨma!
4Mãɨne chi k'ait'a p'anɨpa Pabloa jarasidama:
—Chi Tachi Ak'õre p'aare minachia k'awa bɨa ¿pɨa jãɨya nemietá jara bɨk'ãra?
5Pablopa jarasima:
—Ũpẽarã, mɨa atua basima ichi chi p'aare minachia k'awa bɨt'a. K'awa badapara mɨa mãɨya jaraiwẽ pasima, Tachi Ak'õre pedeade nãɨya bɨ bɨ pẽra: “Mãra poro chaarea k'orea k'achia pedearãt'ɨ”.#Éxodo 22:28.
6Mãɨya bɨde Pablopa k'awasima chi eda waapẽarã saduceorãpema pasima mãɨnepa chi waapẽarã p'ariseorãpema pasima. Mãɨpuru ãchiá ɨbɨa jarasima:
—Ũpẽarã, mɨ p'ariseopɨ. Mɨ chõarãenapemarã sida p'ariseorã pasima. Mãɨpuru ĩjãa bɨma chi piudaadarã chok'ae p'irabaridait'a. Mãɨ k'orea mɨ ɨtɨa k'ɨ̃ria p'anɨma.
7Pablopa mãɨya jarada k'orea p'ariseorã chi saduceorã ome k'ĩruu pedeadak'ari awara awará k'ɨ̃risia tuaneesidama. 8(Saduceorãpa jarapatama piudaadarã chok'ae p'irabaridak'at'a, Tachi Ak'õrepa ɨt'aripa peedarã newẽt'a mãɨnepa tachi jaore newẽt'a. Maamina p'ariseorãpa mãɨ ãarea ĩjãa p'anɨma). 9Mãɨpuru minachia k'ĩruu ooroa nɨbeesima. Chi eda waapẽarã Moisepa bɨda jarateapataɨrã, mãɨrã p'ariseorãpa p'irabaridak'ari ɨbɨa jarasidama:
—Taipa unu p'anɨma nãɨ ẽpẽra nepɨra newẽt'a. ¿Tachi jaore wa Tachi Ak'õrepa ɨt'aripa peeda ichi ome pedeasiwẽk'ãra? Mãɨyaipɨra ¿sãmaasã́ Tachi Ak'õre ome k'ĩruunaima?#23:9 Mãɨyaipɨra ¿sãmaasã́ Tachi Ak'õre ome k'ĩruunaima? Griego pedeade chi eda waapẽarã k'art'ade mãɨ newẽma.
10Ãchi mãicha atepe k'ĩruu pedea p'anɨ pẽra papaká berã chi atepe chaarea bɨpa wap'ea basima Pablo wawaria p'edait'a. Mãɨpuru papaká berã wãpisima Pablo ãchi t'ãenapema ẽemarinak'ari chi papaká berã tuanapataɨ tede eda ateewãnamẽrá.
11Mãɨ teamasi Tachi Chipari Pablomá unupik'ari nãɨya jarasima: «Pablo, sõpia base. Mɨ k'orea nãma Jerusalene pedeada jĩra Roma p'uurude pida pedeai bɨma».
Judiorãpa Pablo peadai k'orea pedeadada
12Norema chi eda waapẽarã judiorãpa pedea ausidama Pablo peadai k'orea. Mãɨ ẽpẽerãpa piarãnepa pedeasidama ne k'odaiwẽt'a mãɨnepa pania todaiwẽt'a aba Pablo peautadea. 13Chi mãɨ pedea audada ɨmɨk'ĩira cuarenta p'anasidama. 14Ãchi p'aarerã chi mãɨrã chaarearãmá mãɨnepa judiorã chõarãmá wãnak'ari jarasidama:
—Taipa piarãnepa pedeasidama ne k'odaiwẽt'a mãɨnepa pania todaiwẽt'a aba jãɨ Pablo peautadea. 15Mãɨpuru nãɨya oot'ɨ. Mãrapa chi papaká berã chi atepe bɨa idit'ɨ nũ Pablo mãicha mãramá ateewãpimẽrá. Jarat'ɨ mãrapa ichi k'orea jĩrak'aua idi k'ɨ̃ria p'anɨt'a. Ateewãutade nãma chei naena taipa ichi peadaipɨ.
16Maamina Pablo ũpẽawẽra warra arí basima. Mãɨ k'ũtãpa chi ãchia jara p'anɨt'a ũrik'ari chi papaká berã p'anapataɨmá Pabloa jarade wãsima. 17Mãɨpuru Pablopa papaká berã chi mãɨrã chaarea bɨ aba t'ɨ̃k'ari jarasima:
—Nãɨ k'ũtã́ chi atepe bɨmá ateese. Ichia ne jara k'ɨ̃ria bɨma.
18Mãɨne chi k'ũtã́ papaká berã chi atepe bɨmá ateewãk'ari jarasima:
—Pablo, chi eda jɨ̃a nɨbɨpa mɨ t'ɨ̃k'ari jarasima nãɨ k'ũtã́ pɨmá ateewãmẽrá. Ichia pɨá ne jara k'ɨ̃ria bɨma.
19Maapae papaká berã chi atepe bɨpa chi k'ũtã́ juade jitak'ari ãyá ateewãsima. Maapae idisima:
—¿K'ãre mɨá jara k'ɨ̃ria bɨma?
20Mãɨne chi k'ũtãpa jarasima:
—Judiorãpa pedea ausidama nãɨya oodai k'orea: ãchia pɨá chichupuria ididaipɨ Pablo nũ chi judiorã chaarearã ará p'anɨmá ateewãpimẽrá. Jaradaipɨ ichi k'orea jĩrak'aua idi k'ɨ̃ria p'anɨt'a. 21Maamina ãchi pedea ĩjãarãse. Pablo peadai k'orea ɨmɨk'ĩra k'ak'o cuarenta o k'ait'a mĩru p'anɨma. Ãchia piarãnepa pedeasidama ne k'odaiwẽt'a mãɨnepa pania todaiwẽt'a aba Pablo peautadea. Ara nãɨyana ichi peadai k'orea p'anɨma. Abapuru nɨ p'anɨma pɨa jarait'a Pablo ateewãpimẽrá.
22Maapae papaká berã chi atepe bɨpa k'ũtã́ jarasima:
—Chi pɨa mɨá jaradat'a mi ãpia pida jararãse.
Mãɨya jarak'ari wãpisima.
Romanepemarãpa Pablo Cesarea p'uurudea ateewãnana
23Maapae papaká berã chi atepe bɨpa chi chaarearã berã ume t'ɨ̃k'ari jarasima:
—Jɨrɨ atase papaká berã dosciento, papaká berã mũrane wãpataɨrã setenta mãɨnepa papaká berã miasudepa k'ĩruupataɨrã dosciento, maapae nãɨ teamasi las nuevede Cesarea p'uurudea wãt'ɨ. 24Mãɨ awara mũra Pablo pae ateewãt'ɨ nãɨ Judea tuadepema chi poro chaarea bɨ P'elimá pia ateewãnai k'orea.#23:24 Mãɨ P'eli Judeadepema chi atepe chaarea bɨ pasima ãyo 52—60. Cesarea p'uurude bapachima.
25Papaká berã chi chaarea bɨpa k'art'a nãɨya bɨsima:
26Mɨ, Claudio Lisiapa nãɨ k'art'a bɨruma chi atepe chaarea bɨ P'eli pae. Mɨa k'ɨ̃ria bɨma pɨ pia bait'a.
27Judiorãpa nãɨ ẽpẽra jitadak'ari peadai pasima. Maamina mɨa k'awasima ichi romanepemapɨ. Mãɨpuru papaká berã ome wãk'ari judiorã juadepema ẽemarisima. 28Mɨa k'awa k'ɨ̃ria basima ichi mãɨ k'ãre k'orea nepɨra pará bɨade a jara p'anasit'a. Mãɨpuru ichi ateewãsima chi judiorã chaarearã ará p'anɨmá. 29Mãɨne mɨa k'awasima abapuru ãchi Moisepa bɨda k'orea ichi nepɨra paraayade a jara p'anɨt'a. Maamina ichia nemietá oowẽa bɨ pẽra peadaiwẽa p'anɨma wa eda jɨ̃anaiwẽa p'anɨma. 30Mãɨya nak'ari mɨa k'awasima judiorã pedea ausidama ichi peadai k'orea. Ara mãɨne ichi pɨmá peeyade asima. Mãɨnepa mɨa ãchiá jarasima chi ichia nemietá oosiade a jara p'anɨt'a pɨ k'ĩrari jarade wãnai p'anɨ.
Pia base.#23:30 Pia base. Griego pedeade chi eda waapẽarã k'art'ade mãɨ newẽma.
31Mãɨne chi papaká berãpa ichia jarada jĩra oosidama. Teamasi Pablo Antípatri p'uurudea ateewãsidama. 32Norema papaká berã jĩte wãpataɨrã ãchi tedea jĩitea wãsidama. Mãɨne mũrane wãpataɨrãpa Pablo Cesarea p'uurudea ateewãsidama. 33Cesarea p'uurude chesidaɨde chi k'art'a chi atepe poro chaarea bɨa teasidama. Mãɨnepa Pablo sida ichimá ateewãsidama. 34-35Mãɨ k'art'a ak'ɨk'ari chi atepe poro chaarea bɨpa Pabloa idisima sãmapema k'awayá. Pablo Cilicia ĩjũanepema k'awaside nãɨya jarasima: «Chi pɨ nepɨra pará bɨade apataɨrã chedak'ari mɨa pɨá ũriipɨ».
Maapae ichia chi papaká berã́ jarasima Pablo chi Herodepa oopida te atepe bɨdea ateewãnak'ari, ãchia mãma ak'ɨdamẽrá.#23:34-35 Mãɨ Herode «Herode chi Chomaane» apachidama. Ichia warra chak'erã Belén p'uurude k'enapisima. Mateo 2:13-18.
S'ha seleccionat:
Hecho 23: tdc
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.