Hecho 18
18
Pablo Corinto p'uurude bada
1Mãɨya nak'ari Pablo Atena p'uurudepa Corinto p'uurudea wãsima. 2-3Mãma judio Aquila apataɨ unusima. Mãɨ Aquila Ponto tuadepema pasima.#18:2-3 Ponto ichiaba «Bitinia» apachidama. Hecho 16:7. Chi k'ima Priscila ome Italia tuadepa chedada tãaraawẽa basima. Italiadepa wã p'anasima, chi Romanepema chi atepe chaarea bɨ Claudiopa judiorã ãarea Romane bee ãyá jerek'oada pẽra.#18:2-3 Claudiopa mãɨya oosima ãyo 49de. Corinto p'uurude Pablo ãchimá wãsima ãchi jĩra p'aru te oo k'awa bɨ pẽra. Maapae ãchi ome beesima tausia mimiai k'orea. 4Mimianak'apɨ́ ewaricha Pablo judiorã ará pedeapataɨ tede pedea bapachima judiorãpa mãɨnepa griegorãpa Jesude ĩjãanamẽrá.
5Mãɨya bɨde Sila mãɨnepa Timoteo Macedonia tuadepa chesidama. Mãmãɨpa Pablopa ewaricha Tachi Ak'õre pedea jaratea bapachima. Ichia judiorã́ jarapachima Jesú piarã Tachi Ak'õrepa Tachi K'aripaparí teai jaradat'a. 6Maamina ichia jara bɨt'a ãchia itu bɨsidama. Mãɨnepa ichi k'orea k'achia pedeapachidama. Mãɨpuru Pablopa chi neet'á ɨ̃rɨ jɨ̃ bɨ jĩnap'et'asima, chi ãchia oodada ichia mãɨ k'ɨ̃riawẽa bɨt'a k'awapii k'orea. Nãɨya jarasima:
—Mãrapa mãɨ pedea ĩjãanaepɨra, mãɨ mɨ nepɨra newẽma. Chi mɨa mãra pae ooi badat'a, mãɨ ãarea oosima. Idiidepa mɨ judiorãwẽmá wãipɨ.
7Mãɨne Pablo chi judiorã ará pedeapataɨ tedepa wãk'ari, Ticio Justo apataɨ temá jarateade wãsima. Mãɨ ẽpẽrapa Tachi Ak'õre wap'ea basima. Ichi te judiorã ará pedeapataɨ tek'á basima.#18:7 Ticio Justo. Griego pedeade chi eda waapẽarã k'art'ade bɨ bɨma abapuru: Justo. Chi eda waapẽarãpa k'ɨ̃risia p'anɨma mãɨ Justo Pablopa ichi t'ɨ̃ «Gayo» apachit'a. Romano 16:23; 1 Corintio 1:14. 8Judiorã ará pedeapataɨ tedepema chi chaarea bɨ Crispo apachidama.#18:8 Mãɨ Crispo k'orea Pablopa bɨsima 1 Corintio 1:14. Mãɨ Crispopa mãɨnepa ãarea ichidirãpa Tachi Chiparide ĩjãasidama. Mãɨ awara minachia Corinto p'uurudepemarãpa ũrisidama Pablopa Jesú k'orea jaratea bɨt'a. Ĩjãanak'ari porochoasidama.
9Ewariaba teamasi Pablopa k'ãmok'araa jĩra unusima Tachi Chiparipa ichiá nãɨya jararut'a: «Ne wap'earãse. Jaratea base. K'ĩup'earãse. 10Mɨ pɨ ome bɨma. Abaɨ pida pɨ p'ue piawẽa ooiwẽma, mɨa ẽpẽerã minachia nãɨ p'uurude uru bɨ pẽra». 11Mãɨpuru Pablopa ãyo abaak'ari ya estarik'a Tachi Ak'õre pedea mãma jaratea beesima.
12Galión apataɨ Acaya ĩjũanepema chi chaarea bɨ beeside judiorãpa ará pedeadak'ari Pablo jitadak'ari,#18:12 Mãɨ Galión Acaya ĩjũanepema chi atepe chaarea bɨ beesima ãyo 51de. ichi mãɨ Galión k'ĩrari ateesidama. 13Ãchia jarasidama:
—Cha bɨpa ẽpẽerã́ jara bɨma Tachi Ak'õre minachia k'ɨ̃rianai p'anɨt'a maamina tachi romanepemarãpa bɨdade bɨ jĩra jarateak'ama.
14Pablo pedearu paside Galionpa judiorã́ jarasima:
—Nãɨ ẽpẽrapa piawẽa oodapara wa k'achia atepe oodapara mɨa mãra pedea sẽwẽa ũrii pasima. 15Maamina mãrapa chi jaratea bɨ k'orea, mãra Tachi Ak'õre t'ɨ̃ k'orea mãɨnepa mãra Moisepa bɨda k'orea pedea p'anɨma. Mãɨpuru ara mãra tuaba mãɨ ak'ɨt'ɨ. Mɨa mãɨ k'orea ak'ɨi k'orea bɨwẽma.
16Mãɨya jarak'ari ãyá jerek'oasima. 17Mãɨne ãareaɨrãpa chi judiorã ará pedeapataɨ tedepema chi chaarea bɨ Sóstene jitadak'ari ara mãma jok'aesidama.#18:17 Ãareaɨrãpa. Griego pedeade minachia k'art'ade nãɨya bɨ bɨma: griegorãpa. Maamina Galionpa mãɨ k'orea ne ãpia pida ooé pasima.
Pablo jĩitea Antioquiadea wãna
18Pablo Corinto p'uurude tãaraa basima. Mãɨne chi ũpẽarã ará p'anɨrã́ wãyane asima. P'ãp'orrode batooi naena Pablo Cencrea p'uurude poro t'ɨɨpisima, Tachi Ak'õre pae ne ooyade ada mãɨ ãarea ooda pẽra.#Número 6:1-21. Maapaepuru Siria tuadea wãsima, Aquila chi k'ima Priscila ome. 19Wãutade Ép'eso p'uurude padak'ari Pablo chi Aquila, Priscila ome p'anana ãchi ãyá wãsima. Mãɨne judiorã ará pedeapataɨ tedea wãk'ari judiorã ome Jesú k'orea pedeasima. 20Ãchia ichiá chichupuria idisidama mãma tãaraa beemẽrá, maamina beei k'ɨ̃riaé pasima. 21Mãɨpari wãrune nãɨya jarasima:
—Tachi Ak'õrepa k'ɨ̃riasira mɨ mãicha mãra ak'ɨde cheipɨ.#18:21 Griego pedeade chi eda waapẽarã k'art'ade nãɨ sida bɨ bɨma: Mɨ Jerusalene arapaapataɨ ewari cheru pade wãi bɨma.
Maapae p'ãp'orrode batook'ari Ep'esodepa wãsima. 22Cesarea p'uurude chek'ari Pablo Jerusalenea ũpẽarã ak'ɨde wãsima. Mãmãɨpa Antioquía p'uurudea wãsima.
Apolo Ep'esodea cheda
23Pablo mãma tãaraa bak'ari Galacia tuade mãɨnepa P'rigia tuade p'ɨrrɨasima. P'uurucha chi Jesude ĩjãapataɨrã́ jarateasima pia ĩjãanamẽrá. 24Mãɨmisa judio Apolo apataɨ Ép'eso p'uurude chesima. Mãɨ Apolo Alejandría p'uurudepema pasima. Ichia nepia pedeapachima mãɨnepa Tachi Ak'õre k'art'a sida minachia k'awa basima. 25Mãɨ Apoloa naena Tachi Chipari O jarateapachidama. Jesú k'orea minachia sõpia pedeapachima mãɨnepa arí jaratea bapachima. Maamina porochoai k'orea abapuru Juanpa jaratea badat'a k'awa basima.#Marco 1:1-8. 26Mãɨne Apolopa judiorã ará pedeapataɨ tede ne wap'eawẽa jaratea basima. Ichia jaratea bɨt'a Aquilapa mãɨnepa Priscilapa ũrisidama. Mãɨpuru ichi ãyá ateewãnak'ari Tachi Ak'õre O k'orea atepe jarateasidama.
27Mãɨya nak'ari Apolo Acaya tuadea wã k'ɨ̃ria basima. Mãɨpuru ũpẽarã Ep'esodepemarãpa ichi wãit'a pia bɨade asidama. K'art'a bɨsidama Jesude ĩjãapataɨrãpa ichi mãma “pɨ pia chesiade” adamẽrá. Acaya tuade cheside Apolopa ũpẽarã Tachi Ak'õre sõpiadepa Jesude ĩjãanana minachia k'aripasima. 28Ichia jaratea bɨde judiorãpa seaade autacha ãareaɨrã k'ĩrari pia k'awapipachima ãchia Jesú k'orea piawẽa k'ɨ̃risia p'anɨt'a. Tachi Ak'õre pedeadepa minachia k'awapipachima Jesú piarã Tachi Ak'õrepa Tachi K'aripaparí teai jaradat'a.
S'ha seleccionat:
Hecho 18: tdc
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.