Izaiya 13
13
Makalelo kafuna aBabiloniya za gondjihiwa
1Ula gu muselu wenno Izaiya mwana Amoji aonihiwe liye owonga zela Babiloniya.
2Gwelihani bandera vazulu va mwango mohokala yengo, mwaakuwele anyakondo ira kaze, mwaaitane na ndanda uve uve ira kavolowe milango da andimuwa andimuwa. 3Miyo Mulugu mwinnya gwaarumile atwaga daasakunlre miyo, miyo agumaniha anyakondo aga a kopolo anno anahagalala movitukulela ira kaze kalabe ja uwali waga. 4Anovweya madugudugu anaireya mwangoni. Anovweya nnga madugudugu a atu adjindji. Vweya uwa ku gumana wa maumwene, ku gumana wa malogo kagumanaga vamohive. Yehova wa Makuru Matene unagumaniha nikuru na anyakondo ira kaze kawane.
5Aliwa anokumela vilambo dolapela, kuma magomelo wa ilambo. Liye gu Yehova utukunle fwaramento daye motakaleliwa ira aze agudjulena ilambo yatene. 6Nlani mwasiwa siku na Yehova nili vakwikwive. Siku niwa nnoza nifiye nnga gudjula okumela wa Mulugu wa Kopolo Datene. 7Nona manda ewa matene anoza kakale ovuta. Mirima diwa nnoza dinyungulruwe. 8Atu atene anoza kakale okumbanyene, anoza kakukumuwe novwa jopa. Jopa jiwa jinokala nnga muhiyana afunaga bala. Anerege ing'ana morendjeya. Eto kove diwa nnokala dokukumuwa dene muwari moova.
9Kaing'anani, siku na Yehova nnaza. Naza, nnoza nikale siku nohokana tangaranga, siku na uwali na siku notakaleliwa wohokala wa masika ira ilambo ya vati isanduwe ikale isalesale eto atu otega katolotchiwe ira kahakalewove. 10Nyenyedi dili zulu dedo nnawenda nikuru nikuru kadiza dioneyiha moneya wewa. Nzuwa nnoza nikume notima nene. Eto mwedi kanamoneyege.
11Yehova unawonga ira: <<Miyo nnoza daaonihe goyi atu a ilambo ya vati na mwasa wa jotakala jiwa. Nnoza daaonihe goyi atu otakala na mwasa wa jotega jiwa. Nnoza dimalihe jingari wa aliba vitukulela eto nnoza dititihe vitetela wa atu a uwali. 12Miyo nnosakanya ira atu kasauweleyege kwaranya makalelo anasauweleya oru wapama. Atu anerege sauweleya hiyaniha na oru ohogumanihiwa na yengo imohiwa wa Ofiri. 13Nafiya siku na uwali waga owopiha, nnoza ditikinye zulu, eto ilambo ya vati inoza ikumevo vili atu. Jatene eji jinoza jiireye na mwasa wa uwali wa miyo Yehova wa Makuru Matene.
14<<Mwa eno, kada mutu unerege welela wa atu a nlogo naye, kada mutu unerege tawela ilambo ya waniwa, nnga nase aatawaga aliba saya, eto nnga mabila ohokana maliba kumbuza. 15Unafwanyiwe, unoza alatiwe. Unahindiwe, unopiwa na supada. 16Ahimiwa atete anoza katatakanyiwe pesa pesa vamentoni vewa. Mmba mwiwa munoza mukupulriwe, eto ahiyaniwa anoza kagonihiwe mohindeliwa.
17<<Kaing'anani, miyo Yehova nnoza daavenyihe akuda Mediya ira kawane na akuda Babiloniya. Kiza kabalra ja parata, eto kiza kafuna ja oru. 18Anoza kaape azombwe atene na maurwa. Kiza kakana tangaranga na ahima, nne kinakana tangaranga na ahima atete. 19Umwene wa Babiloniya wenno uli umwene ulukulu kwaranya maumwene matene, umwene wenno wavitetelana atu eto wavitukulelana aKalidewu, unoza ukale nnga Sodoma na Gomora, tempu Mulugu agudjunle liye sidadi dile.#13:19 Babiloniya ti nzina na ilambo. Eto aKalidewu ti nzina na atu kakala muwari mwa ilambo ya Babiloniya. Ku wonga aBabiloniya na aKalidewu ba amohive. 20Atu kiza kakalamo eto kiza kamangamo nyumba diwa kala no kala. Kalivo nkuda Arabiyo unafuna za kunga musasaye, eto kalivo namakumbuza unafuna dowa djiha jifuwo jaye wewo. 21Mbwenye anavinyama a mukokolani banafuna kalamo bahi. Mmamba muwa munakalege vizizi, eto pilru da mukokolani nnerege wendawendamo. Anakoro a mukokolani banafuna za lupalupagamo. 22Muwari mwa nyumba diwa dolapa da agwarda munerege nla anangunu. Eto muwari mwa nyumba doriya da umwene munerege nla anambwa a mukokolani. Tempuwa ili vakwikwive, eto malambwiwa kinawendjediwa.>>
S'ha seleccionat:
Izaiya 13: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral